«Udmurt kalyk uz byry, uz!»

Удмурт Дунне
By Удмурт Дунне 5 марта, 2015 14:35

«Айшет будущего» — выль удмуртлэн манифестэз

айшет будущегоКемалась возьмасько ни вал Богдан Анфиногеновлэсь кылбур книгазэ. Тани али, ар пумын, йӧспӧртэм удмурт кылбурчи нырысетӥ бичетэныз шумпоттӥз.

Книгалэн вылтусыз ик синмез кыске ини — со ачиз арт-арбери: пичигес зӧк квадрат выллем, вылбамаз Дарали Лелилэн «Удмурт ковёр» нимо тодмо стрит-артэз вылэ футуристической шрифтэн гожтэмын «Айшет будущего».

Валамон, малы Богдан обложкалы Ижкарысь юртлэн борддорез вылэ кельтэм удмурт суредэз быръем. Со туж ӟеч усьтэ авторлэсь малпанзэ: туала глобальной поп-культураез киултыса, сое удмуртомытон но асьме лулчеберетлы выль шокан омыр сётон. «Айшет будущего» книгалэн та идеяез туала удмурт культуртрегеръёсты но соос котырысь тусовкаез огазея. Оглом вераса, та книга — туала выль удмуртлэн манифестэз.

Б. Анфиногеновлэн кылбуретэз — асфальт вискысь шӧдтэк шорысь чуртнаськем италмас выллем. Солэн книгаез — анай кылызлэсь люкем удмурт пилэн мурт кылын кырӟамез но берен ас калыкез доры берытскон сюресэз.

Адямилы тодыны кулэ, мар понна со дунне вылын улэ. Б. Анфиногеновлэн героез мылкыдзэ бурдъясь, визьзэ ужатӥсь малпан утча: «Не пойму: чего ради я?» («В автобусе»). Нылмуртлы синмаськон огдырлы гинэ бурдъя, мукетыз малпан героез сюлмаськытэ:

Нужен ли буду

своей

стране?

и своей

камско-вятской

нации?

(«Мысли за неделю до 18-летия»)

2007-тӥ — 2008-тӥ аръёсысь кылбуръёсын валтӥсь темаос — нылмуртэз яратон но калыкез гажан — бус пыр адӟисько гинэ ай, нош 2009-тӥ — 2014-тӥ аръёсы гожтэмъёсаз соос кылбурчилэн аслыз гинэ тупась манереныз яркыт усьтӥсько ини.

Тани, шуом, ӟуч текст пӧлы удмурт веранэз (предложениез) пуктон. Нырысьсэ, 2009-тӥ арын, Б. Анфиногеновлэсь та кылбурзэ лыдӟыса, пайми но синмаськи: озьы но луэ вылэм!

Шайвылын.

Вы лыком шиты!

Нынче — раньше — впереди

Поедим в великом быте

блинчик теплый —

табани.

(«Шайвылын»)

Выль пуштрос кылдэ, удмурт но ӟуч веранэз одӥг кылбуре пыртыса!

Б. Анфиногеновлэн кылбуръёсаз адӟиське туннэ нуналысь адямилэн тусыз, солэн малпаськон но вераськон манереныз. Удмуртъёс быризы — соос интые мукет выль удмуртъёс вуизы:

Не эльфы мы, не хоббиты, не гремлины,

А этносы, обкраденные временем…

Ну, вытрем слёзы!

Нарыдали озеро.

Аста ла виста.

Деревянная эпоха,

Эпоха моха,

Мне на тебя по…!

Я чувствую: уже летят плевки,

Плевки профессоров и прочих фольклористов,

Уколы их болезненны, ловки.

Но всё же зря,

Ведь я сказал:

Аста ла виста

FU Мизантроп»)

Кыӵе со — Анфиногеновлэн поэзиысьтыз выль удмурт? Со весяк диалогын, гожъяське вакчияк. Кылбур кылдэ, назывной предложениосты яке кылъёсты-тэгъёсты сузьйыса. Лирической герой тодмо нимъёсын шудыны яратэ: Репин, Есенин, «Дело веры» но Басё.

Удмурт творческой егитъёсын пумиськыса, солэн сюлмаз тыл ӝуатске («Дарали», «Декларация нового лейбла», «Чудьяос»), со синмаське сыӵе ныллы, кудӥз удмурт луэменыз данъяське («Зангариклы»). Со вала: удмурт шӧм модае пыре:

Я пил Kumyshku. Мешая с Brendy.

Крутая фишка

(«Бред»)

Б. Анфиногенов — нырысь ик удмурт-интернет тусовкалэсь улонзэ возьматӥсь кылбурчи. Со интернет-огазеяськонысь адямиос понна дуно нимъёсты но валатонъёсты кылбураз кутэ. Silent Woo Goore, Эктоника, Yumshan, удмурт ремикс но аниме, dj Darali, Mademoiselle Oudmurte солэн нуналмысь улоназ пыро Lady Gaga-лэн кырӟанэныз, GQ журналэн но LM сигаретэн валче.

Озьы тунсыко удмурт «масс-культура» глобальной поп-культураен оградэ султэ но… лирической геройлэсь удмурт лулчеберетэн тунсыкъяськонзэ сайкатэ:

Дугдӥ. Лыдӟисько:

«Кузебай. Герд».

Тани со пуке —

Гань-гань.

Тани со учке —

Азьлань.

— Чырткемесь-а, Герд агай!

Мон лыдӟи тон сярысь, мон лыдӟи кылбуръёс,

Мон валай, кин вал тон но Трокай.

Мон шуи ӟуч сямлы — «adiose

Вай мыным кужымдэ!

Мон али — ӟустари, табань кадь.

Акыльтӥз Джонни Депп, 3D

Жириновский, Русь, банька…

Кытын-о чебер удмурт кыл?

Сюрес, бубыли, Кам…

Ullapala»)

Б. Анфиногеновлэн кылбуретэз — туала гражданской лирика. Со буш интыын кылдэмын ӧвӧл, со ӵуказе нунал сярысь сюлмаськись удмуртъёслэн будэтэм емышсы. Тодмо ӧвӧл, кудпала берытскоз ӵуказе нунал, тодмо ӧвӧл, кинлы но малы оскыны. Но югыт, лулэз чылкытатӥсь малпантэк, сое быдэстыны тыршытэк, адями ӝог ыштэ адями туссэ. Огез сыӵе малпан — удмуртлык — «Айшет будущего» бичетысь геройлэсь улонзэ югдытӥз.

Лариса Дмитриева

Удмурт Дунне
By Удмурт Дунне 5 марта, 2015 14:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<