Лымы вылысь — йӧ вылэ

Удмурт Дунне
By Удмурт Дунне 27 февраля, 2015 10:27
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

2-20-2Кин вормиз, со ик куно пумиталоз

Кылем арня пумын Юкаменск черкогуртын удмурт Олимпиада ортчиз. Вань ёросъёсысь сюрс пала гурт спортсменъёс 21-тӥ тол шудонъёсы пыриськизы. Бадӟым ужрад котыр ласянь синмаськымон ортчиз.

Кезьытэз улляз Юка

Куноосты пумитась ёрос маин ке паймытыны выре. Юкаменск ульчаосты шулдыртӥллям чебер флагъёсын, нош юбоосы ошылэмын вал спортсменъёслэн кортлэсь лэсьтэм мугоръёссы, уйин соос тылын пиштӥзы. Ужрадэз усьтон нырысьсэ йӧ вылын ортчиз. Йӧлэсь зӧкталазэ пыр-поч эскеризы спасательёс. Ӵыпетлэн мурдалаез 1 метр пала, пе, йӧ 80 сантиметр. Люкаськемъёслы нокыӵе кышкытлык ӧвӧл.

Йӧ вылын пуктэмын вал бадӟым экранъёс, отын возьматӥзы азьвыл аръёсы ортчем Гурт шудонъёсысь суредъёсты но видеороликъёсты. Ужрадэз сӥё-дано усьтонэ 100-лэсь ятыр адями пыриськиз. Гурт шудонъёслэн утисьсы — Юка лудкеч. Спортсменъёслы ачиз кадь шаплы, сэзь луыны сӥзиз.

Юкаменск ёрослэн командаез одӥгез бадӟымез вал — 70 мурт. Пӧлазы полиатлонъя калыккуспо классъем спортъя мастер Николай Злобин, спортъя мастере кандидатъёс Надежда Шутова (армспорт) но Анатолий Невоструев (полиатлон).

Спортысь кизилиосты данъям сяна, гурт удысын ужасьёсты но ушъязы. Уно аръёс ӵоже «Урняк» хозяйствоын азьветлӥсь скал кыскись луэ Галина Ившина, «Звезда» хозяйствоын — Насия Абашева. Пудо утем сяна, спортэн эшъясько, кыкназы ик соос Россиысь Гурт шудонъёсы пыриськылэмын, Галина Ившина Россиысь чемпион луэмын.

Удмурт Республикалэн Тӧроез Александр Соловьёв, Юкаменск черкогуртэ вуыса, Глаз но Юкаменск ёросъёсысь хоккеистъёслэсь шудонзэс мытӥз, нырысетӥ шайба куштыса. Отӥяз шаерысьтымы вылӥ кивалтӥсьёс куас сюресэз эскеризы.

Гурт шудонъёс дыръя спортэн эшъяськемзэс возьмато кивалтӥсьёс. Правительстволэн но ёрос йыръёслэн командаоссы волейболэн шудӥзы. Шудонын, азьвыл аръёсы сямен, Правительстволэн командаез 3:1 лыдын вормиз. Солэн капитанэз Владимир Варламов пусйиз: арнялы 2-3 пол волейболэн шудыны ветлӥськомы ке но, арысь аре вормон понна тросгес пӧсяно луэ. Ёрос кивалтӥсьёс выльдӥсько, шумпотоно, кивалтон удысэ кужмо егитъёс вуо шуыса.

Кытын ке ӵем, кытын ке шер

Куд-ог ёросъёсын Гурт шудонъёс 2-тӥ-3-тӥ ползэ ортчо ини. Юкаменск ёрос но гурт спортсменъёсты 3-тӥзэ пумитаз. Со понна Сьӧлта, Сюмси но Кияса ёросъёсы гуртысь спортсменъёс одӥг пол но ӧз вуылэ на. Кызьы ивортӥз мугор кыдатон культурая, спортъя но егитъёсын ужан политикая министр Игорь Краснов, матысь 5 ар куспын югдур тупатэмын луоз. 2017-тӥ арысен кутскыса, та пичи ёросъёс но куно пумитасьёслэн списоказы пыртэмын ни. Со понна асьсэлы но гуртоослы тыршоно гурт удысын но спортын вормонъёс басьтыны.

Юкаменскын одӥг школа но кӧня ке нылпи садъёс. Ӵапак отчы улыны интыямын вал спортсменъёс. Кӧлан но сиськон интыосын ӟоскытгес вал ке но, ӝожтӥськисьёсыз ӧй вал. Баскетболэн шудӥсь воргоронъёс медаль понна воксё но Яр каргуртын вожвылъяськизы.

Пу медаль ке луысал

Куасэн бызьылон, ыбылӥськон но турникын ӝуткаськон мугорез кыдатэ кадь, лыдъяны-чотаны быгатэм но кулэ вылэм. Котькуд очкозэс лыдъяло полиатлонистъёс.

— Вань спортсменъёс 2 группалы люкисько: 18-39, 40 арес но солэсь бадӟым. Куасэн бызьылон дыръя лыдэ басьто спортсменлэсь арлыдзэ, — шуэ Дэри ёросысь 55 аресъем полиатлонист Александр Дмитриев. — Ыбылӥськонын но гимнастикаын ваньмыз умой пӧрмиз ке, куасэн бызьылон дыръя берпуметӥ кужымме сётоно луиз. Ачим ик пайми, Эграысь 63 аресъем Вениамин Ефремовез 3 секундлы азьпалтӥськем. Озьы огъя зачётын ми соин одӥг мында очко люкаськеммы, но куас сюрес вылын шаплы луэме понна вормонэз мыным сётӥзы.

Полиатлонистъёс ваньзы ӧрӟиос выллем. Арлыдо спортсменъёс пӧлын 3-тӥ инты басьтӥз Якшур-Бӧдья ёросысь 68 аресъем Николай Замыров, турникын со 36 пол ӝуткаськиз. Арлы быдэ паймытэ тужгес арлыдоез спортсмен — Камбарка ёросысь 73 аресъем Юрий Евдокимов. Турникын со 17 пол ӝуткаське. Нылкышноос пӧлын суй кужымзэс эскеронын котькинлэсь трос, 106 пол, ӝуткаськиз Юкаменскысь Карина Зямбаева. Нимо-дано спортсменъёсын артэ кужымзэс кыдато пиналъёс. Тужгес пичи спортсмен лыктэмын вал Сьӧлта ёросысь. 7 аресъем Антон Шутовлы ваньмыз туж кельшиз, вуоно ӵошатсконлы ӟечгес дасяськыны кылзэ сётӥз.

— Малы меда Гурт шудонъёсын пу медаль уг сёто? — серекъяса шуэ Балезино ёросысь Галина Наговицына. — Одӥгзэ но Гурт шудонъёсыз ӧй кельты на, егитгес дыръям вормисьёс радысь ӧй пота, нош берло аръёсы ялан 4-тӥ интыын. Пу медальёсы лыдъяса быдтонтэм луысалзы ни.

Воштӥськонъёс но вормисьёс

Шаерысьтымы Гурт шудонъёс йылпумъяськизы гинэ, Удмуртиысь команда нош ик сюрес вылэ потӥз. Та нуналъёсы Чайковский городын Россиысь Гурт шудонъёс ортчо. Отчы мынэмын шаерысьтымы спортэн эшъяськись тужгес кужмо муниципал кылдытэтъёс: Можгаысь 3 команда, Юкаменскысь 2, быдэн одӥг Шаркан, Эгра, Глаз ёросъёсысь. Семьяослэсь данзэ утёзы Можгаысь Алексеевъёс. Россиысь Гурт шудонъёсыз чакласа ик, Юкаменскысь шудонъёсы но куд-ог воштонъёс пыртэмын вал.

— Дартсэн шудэм сяна, семьяос 2 пол куасэн бызьылӥзы: командаен но эстафетаын, — шуэ Гурт шудонъёсты радъясь, валтӥсь судья Вячеслав Беляев. — Нылпиослэсь мылкыдзэс ӝутон, ӵошатсконъёсыз шулдыргес карон вылысь комбинированной эстафета пыртӥмы. Пиналъёс шарез питыръяса капкае пыртӥзы, анайёс ведраен ву нуизы, атайёс быдэс семьязэс дӧдьыен ворттылытӥзы. Ӵошатсконэ пыриськон понна семьяослы одӥг курон пуктэмын вал: кутчано гын сапег. Ӵапак та выллем ӵошатскон луэ Россиысь Гурт шудонъёсын.

— Ведраен, карнанэн ву но нуллэм вунӥз ни вал, — шуо Кизнер ёросысь Наталья но Михаил Беловъёс. — Ведраосысь вуэз пальккам понна штраф сёто. Туала вакытэ шуг вылэм гын сапег шедьтыны, быдэс гуртысь утчамы, ярано коть, бускельёсмы — алнашъёс — юрттӥзы. Кулэ дыръяз семьяос котьку но ог-огзылы кизэс мычо.

Юкаменскын ортчем Гурт шудонъёс дыръя мукет выльдон но пыртэмын вал. Азьвыл аръёсы куасэн бызьылӥсьёс одӥг линиысь стартэ потылӥзы, нош табере лыдэ басьтӥське спортсменлэн азьвыл Гурт шудонъёсын басьтэм вормонъёсыз. Котькинлэсь трос очко люкам мурт нырысетӥ интыысь стартэ потэ. Вань спортсменъёс куас сюресъёслэсь ӟечлыксэс пусйизы, соос, пе, Сочиын выллем — паськыт но гурезё.

Ӵошатсконлэн берпуметӥ нуналаз эстафетаос вал. Нылкышноослэн нырысетӥ этапазы котькинлэсь ӝӧг ортчиз Дэри ёрос понна бызьылӥсь Екатерина Воронцова. Жаляса верано, эшъёсыз со вормонзэ утьыны ӧз быгатэ, 7-тӥ интые кылизы. Азьвыл аръёсы сямен ик, вормизы Шарканысь нылъёс: Ольга Баталова, Светлана Турова, Юлия Широбокова но Алёна Перевозчикова. Воргоронъёс пӧлын котькинлэсь шаплы вал Вавож ёросысь команда.

Вормись командаос азьвыл аръёсы сямен ик 3 группалы люкемын, ёросын улӥсьёслэсь лыдзэс чакласа. Вормизы эграос, шарканъёс но юкаменскъёс. Вуоно арын Гурт тол шудонъёсыз ортчытозы эграос, нош табере спортсменъёс дасясько гужем шудонъёслы, соос ортчозы Сарапул городын.

_DSC0005

Гурт шудонъёс ворсасько

Спортсменъёслэн кортлэсь лэсьтэм мугоръёссы уйин ӝуазы

Ёросъёсысь спортсменъёсты пумитало

_DSC0054

Табанен куноято

Ыбылӥськон

Вормонъёслы шумпотон

Шашкаосын шудон

_DSC0287

Куасэн бызьылон

_DSC0303

_DSC0417

_DSC0478

_DSC0585

_DSC0609

Валентина Емельянова

Удмурт Дунне
By Удмурт Дунне 27 февраля, 2015 10:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<