Нунал бӧрсьы нунал

Удмурт Дунне
By Удмурт Дунне 27 февраля, 2015 09:31
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Ивор суред

Ивор суред

ГЛАЗ

Шудон машинаос бордысен

Кылем шутэтскон нуналъёсы Глазын ортчиз Россиысь пиналъёслэн автомодель но аэросани лэсьтонъя ӵошатсконзы. Ужрадэ 60 пинал пыриськиз. Удмуртилэсь данзэ утизы Глазысь, Якшур-Бӧдьяысь но Ижысь нылпиос. Асьмелэнъёс, мукетъёсыныз ӵошатыса, лябгес адӟисько. Глазысь Антон Обуховлэн гинэ куас вылын ворттылӥсь машинаез зол вал.

ЮКАМЕНСК

Жуг-жаг пӧлын — пинал

17-тӥ феврале Юкаменскысь жуг-жаг куян интыысь вож нунылэсь шӧйзэ шедьтӥзы. Со быдэс йӧӟектэмын вал. Дыдылэн шӧез Иже келямын эскеронъёс ортчытыны. Следовательёс верамъя, нуны кынмыса кулэмын, со февраль шорын луло вордскемын вылэм. Та вакытэ солэсь анайзэ утчало.

ЯР

Кык кечез кутӥзы

Гурт тол шудонъёслы Яр ёросысь команда выль дӥсь вуриз. Каргуртысь спорткомплексэн кивалтӥсь Юлиана Дмитриева ивортэмъя, 2015-тӥ арын ёросысь спортэз азинтонлы 200 сюрс манет висъямын, со пӧлысь ӝынызэ костюмъёслы быдтӥзы. Дӥсь утчаса, нырысь соос Иже ветлӥллям. Ваньзэ лыдъямзы-чакламзы бере командазылы костюм Яр каргуртын ик вуриллям. Озьы соос 2 кечез кутӥзы: котькуд спортсменлы мугорызъя дӥсь вуризы, яръёсты ужатӥзы.

АЛНАШ

Питран улэ шедиз

20-тӥ феврале 20 час котырын Алнаш ёросысь Блатгуртысь 3 аресъем пиналэз анай-атаез салазкиен нуо вылэм. 37 аресъем воргорон, нылпиез адӟытэк, салазки вылэ пырем. Та вакытэ эмъясьёс нюръясько пиналлэн улонэз понна, со Ижысь больницае вуттэмын.

ШАРКАН

Юрттӥськисьёс

1-тӥ февральысен Шарканын выльысь улӟизы калык дружинаос. Предприятиосын но огазеяськонъёсын ужасьёс ас мылкыд каремзыя полицилы юртто, понятойёс луо. Югдурез утисьёсын ӵош пятница но суббота нуналъёсы трос калык люкаськон интыосы, жугиськон учыръёсы потало, ульчаосты чаклало. Нуналаз 3 мурт ӝытазе 21 часысен 24 часозь озьы ветло. Котькуд потамзы понна дружинникъёслы одӥг шутэтскон нунал сётӥське. Пусйыны кулэ, соослэн ужан графиксы ӝыны арлы азьпал лэсьтэмын ни.

СЮМСИ

Тыл ӝуалоз ялан

Быдӟым Вормонлы 70 ар тырмонэз пусъён азьын шараяськиз: Ялан ӝуась тылъёс Ижын но Пичи Пурга черкогуртын гинэ вань, нош Камбарка, Дэбес, Каракулино, Красногорск но Сюмси ёрос центръёсын пичи тылъёссы гинэ но уг ӝуало. 9-тӥ майлы югдурез тупатозы. Кызьы вераз Сюмси черкогурт муниципал кылдытэтлэн йырыз Анатолий Чагин, памятник котырез, куазь шулдырскыса, чеберъяны кутскозы, Вормон Нуналэ митинг ортчоз, оже бырем солдатъёсты буре вайыса, пичи ке но тыл ӝуатэмын луоз.

УВА

Тулысэз матэктыто шулдыръяськыса

Кылем арнянуналэ Ува ёросысь Сюрзиысь эштосын ужасьёс Вӧйдырез пумитазы. Тол келян шулдыръяськоназы куное вуылӥзы бускельёссы — жужгесъёс но кыйлудъёс. Люкаськемъёслы тэк сылыны маза ӧй вал: шулдыр стартъёс ортчизы, мылкыд карисьёс хоккеен, футболэн шудӥзы, нылпиос вылэн ворттылӥзы, гурезьысь нискылазы. Тулысэз пумитазы, сям-йылолъёсты чакласа: Вӧйдыр мунёез сутӥзы, гомась тыл вылтӥ тэтчазы, мильымен но табанен куноятӥськизы.

Валентина Емельянова

Удмурт Дунне
By Удмурт Дунне 27 февраля, 2015 09:31