Дизайнер + таксист

Удмурт Дунне
By Удмурт Дунне 26 февраля, 2015 13:37

kinopoisk.ruБерло дыре «выль ӟуч нылкышно кино» веран сокем серем но осконтэм уг ни кылӥськы.

Егит нылмуртъёс киноиндустриын пиосмуртъёсын оградэ калленэн султо, учке ай А. Меликян («Звезда») яке Н. Мещанинова («Комбинат «Надежда») шоры — соос куке асьме софия копполаос луозы!

Нош али верам потэ вал О. Бычковалэн «Ещё один год» киноез сярысь. Нырысь ик, О. Бычкова тодмо луэ тужгес но усто ӟуч романтической комедиосын — «Питер ФМ» но «Плюс один». «Ещё один год» кинозэ мон таосын оградэ пуктысал — со озьы ик яратон сярысь, туж ненег но лякыт.

Режиссёр вань кужмысьтыз тырше дырлэсь аспӧртэмлыксэ возьматыны — коркапуш но инкуазь, модной адӟытонъёс но огшоры жугиськонъёс — шӧдтэк шорысь ваньзэ асьме карен, аслад улонэныд ӵошатыны кутскиськод.

Малы ке ӵемысь ӟуч режиссёръёс киноосазы крезьгур уг куто, татын но саундтрекъёсыз чик но ӧвӧл — соин ик кино документальной выллем потэ. Кинъёс ке асьсэлэсь историзэс, гуртын ас киынызы лэсьтэм видеозэс возьматыса, мадё кадь.

Кино возьматэ Москваын улӥсь егит семьяез, кызьы соослэн кусыпъёссы ар ӵоже вошъясько. Нылаш — веб-дизайнер, ужа тодмо изданиын, нош пияш — огшоры таксист. Огезлэн потэ пӧртэм адӟытонъёсы ветлэмез, нош мукетыз вань ваньмон дырзэ компьютер азьын шудыса ортчытыны дась. Куртка басьтон гинэ но ченгешонлы пӧрме — огезлэн потэ яркыт буёлозэ нуллэмез, нош мукетыз сьӧдэзлы гинэ соглаш. Режиссёр эскере кадь, быгатозы-а яратонзэс утьыны воксё пӧртэм социальной группаосысь адямиос. Та пӧртэмлык понна ик соос куддыръя ог-огзэс адӟемпотостэм каро, нош куддыръя — эшшо золгес ог-огзы борды ӝиптӥсько. Соослэн яратонзы — куасэн бызьылон кадь: выллань, уллань, нош ик выллань. Медаз гинэ усе вал!

Вера Штыкова

 

Удмурт Дунне
By Удмурт Дунне 26 февраля, 2015 13:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<