Мукет ӧвӧл мултэс

Удмурт Дунне
By Удмурт Дунне 26 февраля, 2015 13:19
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

4-24-2Кызьы ми гожтӥм статья йӧспӧртэм адямиос сярысь

Та номермес нылкышноослы но пиосмуртъёслы сӥзиськом бере, малпамы бугыртыны сыӵе юанъёсты, кудъёсыз сярысь асьмеос вераськыны дышемын ӧвӧл.

Гожтэт

Терминологимы но ӧвӧл со сярысь вераськыны. Нош адямиос котырамы — вань. Улэп адямиос, кудъёсыз висъясько калыкен, обществоен пуктэм кабъёслэсь, адямиос, кудъёсыз — ма ватонэз — ӵемысь курадӟо со катъёсын йырин. Вераськон мынэ гейёс, трансгендеръёс сярысь.

Малпамы вераськыны калыклэсь пӧртэм адямиен.

Нырысь ик, 2 арня ӵоже, дыр, малпаським, кызьы но ма солы гожтоно, оло, гожтыны но кулэ ӧвӧл — этика ласянь ке учконо? Оло, со юан сокем висьытӥсь со понна, пал кыл но поттылэмез уг поты? Нош мукет паласен учконо ке, оло, адямилэн сюлэм бугыръяськонъёссэ шара поттэмез, адямиослы вазиськемез кемалась потэ вал, но со уг вала, кызьы? Малпаськыса, кенешыса, кӧтшугъяськыса гожтӥм ик со адямилы. Валаса, со адями милемыз кыдёке келяны быгатоз шуыса — асьмеос ик янгыш. Гожтӥм, келям, пӧсьвуаським.

Ответ лэзиз со милемлы. Туж кышкыт вал учкыны — оло, ми мылмы потытэк адямиез вӧсь карим? Ваньмыз умой. Сыӵе югыт со вылэм! «Мон адями. Улонэз яратӥсько. Тае гинэ вераны быгатӥсько. Ваньзэ умойзэ тӥледлы», — сыӵе вал веранэз. Зэм но, нимдэ-ымнырдэ усьтытэк ке но, секыт ик висьытӥсь малпанъёс сярысь вераськыны.

Ӝыны час ортчыса, со выльысь гожтӥз.

Мон малпаськи но валай: мынам вань ик, ма вераны. Пусъем потэ, таӵе югдур чик но капчи ӧвӧл шуыса. Улыны туж секыт, нош ӵемысь — нокыӵе кужым уг тырмы, ваньмыз чидантэм потэ. Туж трос возисько пушкам, ма сярысь нокин ноку но уг малпаськы. Малпасько, та пушкын бугыръяськыны но кулэ ӧвӧл. Мон ачим куддыр уг валаськы, ма со — оло, зэм но висён, нормалэсь палэнскон. Уг тодӥськы! Куд-ог адямиос та пыр ортчо пинал дыръязы, собере воштӥсько. Нош адямиос, общество кылдытэмын озьы — куке соослы валэктыны тыршиськод мае ке, мае соос уг валало, ма соослы тодмотэм, соос мыжгыны дасесь. Одӥгзэ вераме потэ: луэ лякытэсь но мукетъёссэ чидасесь, луэ нырысь ик АДЯМИОС.

Валантэм ке, кулэ ӧвӧл?

Та вакчи гожтэмез пыр тодыны уг луы, кыӵе шуг-секытъёсын пумиськылӥз та адями улонэз ӵоже. Кызьы учкизы со шоры анай-атайёсыз, эшъёсыз, ӵошен дышетскись пиналъёс, бускельёсыз, ӵыжы-выжыосыз. Кыӵе секыт вал солы школаын, кытын ваньзэс, кин мукетызлы уг кельшы, капчиен саптало но дэрие лёгало асьсэос ик пиналъёс. Но озьы ке но, юзыр-кезьыр луоно, тае гинэ но лыдӟыса, валано, кыӵе секыт улыны мукет адямиослы, тужгес но обществоын, кудӥз та юанъёсты яке чылкак палэнын возе, яке сьӧд буёл пыр гинэ возьматэ. Нош ми ай вераським адямиен, кудӥз (палэнысен ке учконо) туж шаплыен, дуннелы усьтӥськыны кышкасьтэмен адӟиське. Но солы но та сярысь вераськыны секыт — ма ини веранэз востэм, ватӥськем адямиос сярысь, кудъёсыз асьсэос асьсэзыз яратыны, асьсэлы усьтӥськыны дась ӧвӧл, кудъёсызлэн пушказы ялан мынэ нюръяськон. Соос уло, асьсэзыз адӟемпотостэм карыса. Куке учёнойёс верало, со висён ӧвӧл шуыса, куке мукет кунъёсын ужало мукет луись егитъёслы юрттӥсь организациос, дышето соосты асьсэзыз валаны — асьмелэн кутӥсько гей пропагандаен нюръяськись законъёс. Вань пӧртэмез, валантэмез — со, пе, кышкыт но кулэтэм.

Егит актриса Эллен Пейдж, «Адямилэн правоосыз понна кампанилэн» конференцияз вераськыкуз, таӵе кылъёс вераз: «Та дунне трос поллы умойгес луысалыз, асьмеос огшоры тыршысалмы ке ӧжытгес уродзэ лэсьтыны но уродзэ малпаны мукет адямиос сярысь». Уд ке быгатӥськы умойзэ лэсьтыны — эн люкеты мукетъёсызлы асьсэзыс утчаны, асьсэзыс шудо карыны. Оло, со инкуазьлэн янгышез, куке нылмуртлэн мугораз пиосмурт лул пыре яке пиосмурт ассэ нылмуртэн шӧдэ? Куд-огезлэн, зэм но, вань луонлыкез тае тупатыны (операциосын, гормонъёсын). Учке ай Лана Вачовски шоры — (азьвыл со вал Ларри — «Матрица» кинолэн огез кылдытӥсез) — ма воштӥськиз, со сю поллы тросгес мыняны но йырсизэ льӧль буяны кутскем сяна? Сыӵе ик, копак сыӵе ик быгатӥсь адямиен кылиз, шудогес гинэ луиз, дыр.

Игорь Кон социолог верамъя, учёнойёс али но быдэсак уг валало валэктыны, малы генетикалэн логикаез кулэтэм ӧз кары гомосексуальностез, солэн нокыӵе биологической кулэлыкез ӧвӧл ке, оло, солэн вань мукет кулэлыкез, кудзэ наука ӧз на быгаты усьтыны. Асьмеос гетеросексуальной кусыпъёсты утьыны тыршиськом, со инкуазен сётэмын, нош гомосексуализм эволюцилы но адямилэн йылон-пушъёнэзлы люкетэ шуыса.

Али Западын тросэз серекъяса верало: ӝоген кулэ луоз утьыны тӧдьы таза гетеросексуальной пиосмуртлэсь правооссэ — малы ке шуоно отын тыршо меньшинствоослэсь улонзэс умойгес карыны. Но асьмелы со сярысь вераськыны вазь на — асьмелы ай тыршоно адӟыны мукет адямиослэсь шуг-секытъёссэс, дышоно луыны — возьматэк куремез — шарагес но лякытгес.

 

Анастасия Шумилова
Вера Штыкова

Удмурт Дунне
By Удмурт Дунне 26 февраля, 2015 13:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<