Пиосмуртэн одӥг тубат вылын

Удмурт Дунне
By Удмурт Дунне 26 февраля, 2015 13:10

Малы «феминизм» лыдъяське тышкаськон кылэн?

«Феминизм» кылэз асьмеос ӵемгес вераськонамы серемес карон яке тышкаськон понна кутӥськомы.

Пырдэм ымныр

«Мон феминистка» шуид ке, тон шоры кырыж учкозы — озьыен, тон вань пиосмуртъёсты курласькод, куриськод аслыд ваньзэ, нош аслад номыр каремед уг поты. Тросэзлэн, дыр, соку ик син азязы пуксе «кужмо но эрико кышномурт» — бызьымтэ но 40 коӵыш гуртаз возись.

Тросэз нылашъёс туала дыре данъяськыса шуо: «Мон феминизмлэсь кулэлыксэ уг адӟиськы, мынам потэ луэме зэмос кышномурт, картэн но нылпиосын». Зэмзэ ик-а меда озьы?

Jezеbel.com сайтлэн кылдытӥсез Анна Холмс вера: «Зэмзэ но, котьку сюроз кышномурт, кудӥз ассэ лыдъя феминисткаен но адӟемпотостэм каре пиосмуртъёсты. Но со ӧвӧл ук феминизмлэн пуштросэз. Феминизм синазькыль каронэн герӟаськемын ӧвӧл — нырысь ик, со пиосмуртлы но нылкышнолы огадь право сётон: социальной удысын, политикаын, экономикаын».

«Феминизм» кыл мултэс трос пушказ люказ уродзэ — малпасько, со терминлэсь али палэнсконо ни. Нош ас вакытаз со туж бадӟым пайда вайиз нылкышноослы. Феминизмлэн «нырысетӥ ӧрез» (19-тӥ даурлэн пумыз — 20-тӥ даурлэн кутсконэз) сётӥз кышномуртъёслы луонлык политикае но экономикае пыриськыны. «Кыкетӥ ӧр» (1960-тӥ-1980-тӥ аръёс) сексэн, нылпи куштонэн, дышетсконэн герӟаськем юанъёсты ӝутӥз, тыршиз кышномуртэз но пиосмуртэз огкаден адӟыны. Та вакытэ ик феминизм пушкын трос вайёс кылдӥзы (шуом, радикальной, либеральной, марксистской но мукет). «Куинетӥ ӧр» (1990-тӥ аръёс) куашкатӥз стереотипъёсты, утиз кышномуртъёсты семья пушкын ултӥямлэсь, сантэмамлэсь. Феминизм копак огмылкыдо луэмысь дугдӥз, кылдӥзы психоаналитической, экзистенциальной, культурной, анархистской, лесбийской но мукет ӧръёс. Сыӵе «пырдэм» ымнырын ик феминизм улэ али, ӵемысь исамез но мыскыллямез чидаса.

 

Lvd2cvGalAA

Феминизм — пиосмуртъёсты адӟемпотостэм ӧвӧл

Кинэ малэсь утёно?

Россиын но феминизмен герӟаськем юанъёс лэчытэсь вал, тужгес но революцилэсь азьвыл. Туала дыре феминизм сярысь малпанъёсты ӵемгес асэсто Западысь ик, кытын соос пыр-поч эскеремын но кытын кышномуртлы сӥзем эскеронъёс ортчытӥсько.  Нош трос-а вераськемын со сярысь Удмуртиын, удмурт кылын?

Феминизм — со котьку нюръяськон: таяз учыре — обществоен юнматэм катъёсын, кудъёсыз верало, ма умой, нош ма урод, ма карыны яра, нош ма уг яра. Феминизм — пиосмуртъёсты адӟемпотостэм карон ӧвӧл, со кышномуртъёс сярысь измем, вужмем малпанъёсын нюръяськон, «кышномуртлэн интыез» шоры мукет паласен учкыны тыршон.

Удмурт обществоын феминизм уг шӧдӥськы. Угось, нырысь ик, нюръяськон мынэ мукет ӧрын — удмуртлыкез утьыны тыршон — та радын ваньмыз, нылмуртъёс но, пиосъёс но, огкадесь. Блог гожъясьёс пӧлын асьмелэн нылъёс кузёясько. Нош дышетонын, СМИ-ын ужасьёсты ке учконо — отын данакез нылкышноос — Европаысь феминисткаос туж паймысалзы, дыр, талы.

Нылкышно но пиосмурт кусыпъёс сярысь ке малпаськоно, одӥг гожен суреданы уз луы, дыр, югдурез. Огласянь, семьяос пушкын жугиськон али но пумиське (ӵемысь юонэн йырин). Кылэме вань таӵе верамез но: семьяын, пе, кышноез картсэ жуге. Яке эшшо одӥг учыр: мынам вань одӥг пи эше, кудӥз нылъёсты серекъяны яратэ, «феминизм» кылэз кылыса, «пфф» каре, нош ачиз нылашезлэн каблук улаз улэ. Ӧжыт-а меда сыӵе пиос? Оло, асьмелы кышномуртъёсты ӧвӧл, пиосмуртъёсты утьыны тыршоно? Но, серемес учыръёс сяна, вань зэмос лэчыт юанъёс но: жугисько-а семьяосын, трос-а нылъёсты мыскыллян учыръёс, пӧртэм-а уждун басьто кышномуртъёс но пиосмуртъёс но мукет.

Удмурт литератураысь ӵемысь адӟыны быгатӥськом социальной ужпумъёсты — татын сюро лэчыт юанъёс. Шуом, Кузебай Гердлэн «Матӥяз» возьматӥське семьяын кышномуртэз жугон, ултӥян, кышномурт сярысь супыльтонъёслэн кужымзы. Филипп Кедровлэн «Катяяз» возьматӥське, кызьы нылмурт уг быгаты аслэсьтыз кылзэ вераны, аслэсьтыз улонзэ ачиз радъяны. Михаил Коноваловлэн «Вурысо бамаз» Нушин Линаез сантэма. Геннадий Красильниковлэн «Арлэн кутсконаз» адӟиськом, кызьы егит кышномурт улонзэ радъя, яратонэн герӟаськем ужпумъёс шоры учке, феминизмлэн «линзаосыз» пыр тунсыко учкыны Лариса Михайловналэн образэз шоры.

Кин тунсыкъяське кышномуртлэн удмурт культураын интыеныз, дэмласьком лыдӟыны Л. Христолюбовалэсь «Женщина в удмуртском обществе» книгазэ, Кузебай Гердлэсь удмурт нылкышноос сярысь очеркъёссэ, Л. Фёдоровалэсь удмурт литератураын феминизм сярысь ужъёссэ.

Зэмзэ ке, шуг вераны, вань-а чылк-чылк удмурт феминизм — ӟуч культуралэн зӥбетэз туж зол шӧдӥське. Озьыен, выльысь берытскиськом калык культураез, солы тупась кусыпъёсты  утён ужпум борды.

 

Анастасия Шумилова

Суредаз Чудья Жени

Удмурт Дунне
By Удмурт Дунне 26 февраля, 2015 13:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<