Удмурт Изольда — кивалтыны яратӥсь?

Удмурт Дунне
By Удмурт Дунне 26 февраля, 2015 13:01
Тристан но Изольда

Тристан но Изольда

Ижысь Генерал юртын «Тристан и Изольда» постановкаез видео пыр возьматозы шуыса тодӥ но, вань ужъёсме куштыса, учкыны мынӥ. Угось туж яратӥсько ваньзэ, мар герӟаськемын Ирландиен.

Мылкыды тужгес но ӝутскиз, та спектаклез Ольга Александрова пуктӥз шуыса, тодэме бере. Та режиссёрлы мон синмаськи ай, «Три свадебных напева» постановказэ учкыкум.

Егит артистъёс. Чебересь, йӧноесь соос. Алексей Ложкин шудэ Тристанэз. Ох, кыӵе со поромытэ нылъёслэсь йыръёссэс! Ольга Ганева шудэ Ирландиысь Изольдаез, нош ачиз Ольга Александрова — удмурт Изольдаез.

Удмурт Изольда? Кытысь мар, тӥ шуоды. Озьыен, сюжетсэ, туж вакчиятыса, верало. Нырысетӥ акт. Тристан но Изольда шӧдтэк шорысь юо яратон напиток, ог-огзылы туж-туж синмасько. Соослэн лушкем кусыпъёссы ӝоген ваньзылы тодмо луо. Тристан Ирландиысь кошконо кариське мукет музъемъёсы. Отын со кышнояське, собере берен бертэ Изольда доры. Но яратоно нылмуртэз вожез потыса улля Тристанэз. Тристан берытске кышноез доры, отын кулэ. Ирландиысь Изольда но, тае тодыса, кулэ. Соосты ӵош вато. Шайгу вылысьтызы писпуос будыса ӵошен бинисько. Сыӵе, пе, зол яратон.

Ольга Александровалэн постановкаезлэн кыкетӥ люкетаз Тристан вуэ аръёслэн музъемазы. Кутске трэш. Герой малпамтэ шорысь сюре вӧсяськонэ (зэмзэ ке, мон ӧйгес вала, вӧсяськон вал-а со яке мар), кытын удмурт нылкышно йӧн-йӧн пуке пиосмуртъёслэн пельпум вылазы, возьматэ, кин кузё. Сыӵе чылк-чылк матриархат. Тристанлы тае адӟоно ӧй вал, соин ик солы удмурт Изольдаез кышно басьтоно луиз. Собере ини Тристан, зэмос романын кадь ик, солань-талань ветлэ.
Монэ мар паймытӥз? Конечно, туж зол постановка. Мар ке мында символъёсын, умой-умой валан вылысь, соосты выльысь учконо, малпаськод. Туж тунсыко возьматэмын эротика сценаос — пайми. Кылӥськизы удмурт кырӟанъёс. Татын аръёс кыӵе ке секталы укшало. Туж аспӧртэмлыко дӥсьёсын. Ирландской костюмъёслы матын йӧтӥзы (кылсярысь, айшон укша фатаен кузь колпаклы). Монэ туж зол паймытӥз, кыӵеен татын возьматэмын удмурт нылкышно. Со туж кивалтыны яратӥсь, быдэсак яратонлы сётӥськись но пунэмзэ котьку берыктӥсь (Ирландиысь Изольда уйвӧт адӟе, кызьы со доры лыктэ удмурт Изольда но вандэ солэсь йырсизэ). Юзыр-кезьыр луыса кошконо, тае адӟыса.
Зэмзэ, та туж дӥсьтӥсь постановка. Мыным кельшо экспериментъёс!
Нош кыӵе кырӟанъёс гожтэмын та постановкалы! Туж чебересь балладаос, соос тонэ вутто кадь Ирландие. Кырӟало Надежда Уткина но Игорь Шкляев.

Табере та постановкаез сцена вылысь одно адӟеме потэ!

Марина Сергеева

Удмурт Дунне
By Удмурт Дунне 26 февраля, 2015 13:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<