Кейлы сётскисьтэм мода

Удмурт Дунне
By Удмурт Дунне 26 февраля, 2015 12:56
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Burberry-Scarf1822-тӥ арын Мария Антуанетталэн модисткаезлэн, мадемуазель Бертэнлэн, тодэ ваёнъёсыз потӥзы, кытын со вера: ваньмыз вылез — со кемалась вунэтэм вужез. Та малпанэз солэн кылдӥз Франциысь кильтро королевалэсь вуж дэремзэ выльдэмез бере.

Мон ачим но, анаелэсь-а, песянаелэсь-а шыкысысьтызы дӥсьсэс бугыръясько ке, одно ик шедьтӥсько аслым кельшымон дэрем яке кофта, эшшо ке соос модной показъёсын но журналъёсын адӟисько на. Берлозэ гуртам бертылыкум, чуланын утялсконъям шедьтӥ анаелэсь егит дыръяз ветлэм пальтозэ. Анае вераз, 1980-тӥ аръёсы туж тузӥ вылэм «честерфилд» нимаськись фасон. Верамез мылкыдме ӝутӥз тросгес тодыны пальто модельёс сярысь, кудъёсыз али куазьлы тупало но трендъёслэсь бере уг кылё.
Озьыен, кутском честерфилд пальто бордысен. Та фасонэз классической шуыны луоз. Востэм, консервативной, шонер, кузь, V-тусо вырезэн но отложной воротникен — ужаны ветлыны тупась. Та унисекс пальто, сое нуллыны ярато Англиысь актриса Эмма Уотсон но Уильям принц.
Кыкетӥ фасон — оверсайз. Солэн размерез ӧвӧл, шуыны луоз. Та стиль егит на, потӥз 1950-тӥ аръёсы но туж тодмо луиз, малы ке шуоно актриса, Монакоысь княгиня Грейс Келли туж яратӥз та фасонэз. Но сое туж чакласа нуллоно, угось ватэ мугорлэсь чеберлыксэ, со ваньмызлы уг мыны.
Тренч яке тренчкот — векчи басмалэсь вурем пальто, V-тусо сиресэн, кык радэн вурем бирдыосын но одно ик кускерттонэн. Та фасон ноку уз поты модаысь, честерфилд кадь ик, пиослы но, нылъёслы но тупа. Яратыса сое нуллӥллям кырӟась Марлен Дитрих но Англиысь модель, актриса Твигги. Та фасонэз кылдытӥз 1850-тӥ арын Томас Брэдбери англи солдатъёслы: мед быгатозы траншеяос кузя капчи ветлыны, «траншея» кыл бордысь ик потӥз фасонлэн нимыз.
Шинель, яке А-тусо пальто, огласянь, туж ненег, мукет ласянь, трос секыт детальёсыз — бадӟымесь угрум бирдыосыз кык радэн тыремын, кускерттонэзлэн герӟетэз кортлэсь, зӧк но секыт басмалэсь вуремын, бадӟым ошиськись воротникен. 1950-тӥ-1960-тӥ аръёсы та пальто вань кильтро нылъёслэн дӥсь пӧлазы шедиз. Нош вуиз со отчы, историез эскерисьёслэн малпамзыя, война бере уксё окмымтэен: нылкышноос кузпалъёссылэсь шинельёссэс асьсэлы нуллыны тупатъяллязы. Пальто чебер пуке векчи кускоё нылъёс вылын. Сое яратэ Голливудысь модали но актриса Кэти Холмс.
Бушлат — вакчи пальто. Бушлатэз кузьмазы милемлы морякъёс, со укша шинельлы, но вакчигес, кускыз ӧвӧл. Модае сое пыртӥз Ив Сен Лоран модельер 1962-тӥ арын. Бушлатэз нулло, дэрем вылэ дӥсяса, сурало секыт но ненег, небыт стильёсты. Бушлатэз ярато нуллыны Англиысь актриса Хелена Бонэм Картер но актёр Роберт Паттинсон.
Али шедьтыны луэ котькыӵе дӥсь: пӧртэм буёло, пужыё, дунтэм но дуно. Но, оло, тӥляд но анайдылэн я песянайдылэн сандыказы тӥледыз вите дӥськут, кудӥз огвакытэ ортчем вакытлэсь шӧмзэ возьматэ но туала модалы тупа.

Виктория Фёдорова

Удмурт Дунне
By Удмурт Дунне 26 февраля, 2015 12:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<