Берло луоз мае возьматыны

Удмурт Дунне
By Удмурт Дунне 26 февраля, 2015 09:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Андрей Першин

Андрей Першин

Кино но мультфильм кылдытӥсен Андрей Першинэн вераськон

Берло дыре Андрей Першин сярысь трос кылӥськыны кутскиз — «Дружба» киновозьматонниын одӥг ӝытэз солы сӥзизы, «Галерея» адӟытон центрын фото но видео выставкаез ортчиз, вылаз ик, Андрей «Курка, ӵӧж но мукетъёсыз» удмурт мультфильмез суредаз.

— Берпуметӥез, мае ми адӟим тынад ужъёсыд пӧлысь, со «Гагино» но «Север» нимо вакчи киноос.

— Та киноосты лэсьтэмлэсь азьло мон вуылӥ Шор Россилэн пӧртэм интыосаз. Удмуртиен ӵошатыса, отын эшшо но начаргез уло. Эшшо кунгож сьӧры, Германие, потаме пытьы кельтӥз на: отын туж мӧзмыт. Мыным потэ, Россиын ваньмыз трослы тунсыкогез — сӥльтыр-сальтыр, ассиметричной, кырыж. Нош отын… отын ваньмыз одӥг кадь чебер, нюлэм кадь ик, нош милям ваньмыз улэп, лопыръяськись кыӵе ке. Ваньмыз, мар вань Россиын, мыным золгес кельше. Татын мон ваньзэ, мае адӟисько, яратӥсько, нош Удмуртиын — эшшо но золгес. Татын мон котькуд куаклэсь куанӥсько.

Нош туспуктон интыос кызьы ке асьсэос сюризы. «Север» — со Удмуртилэн уйпал ёросъёсыз. Мон ачим Кезын вордскемын. Киноын возьматэм песянай — со мынам бабуше. Нош Новгород котырысь Гагино гуртэ мон малпамтэ шорысь шеди, куное мынӥ, сьӧрам эскерон вылысь кутӥ выль камераме. Созэ-тазэ пуктӥ, пересьёсын вераськи но валай, талэсь маке зэм но тунсыкоез пӧрмоз шуыса.

— Та киноосад тон возьматӥськод гуртъёслэсь пумен быремзэс. Кыӵе ке апокалипсис выллем. Нош мукет ласянь, валано: инкуазьлы дунне, вань-а адями, ӧвӧл-а, со адямитэк эшшо но золгес пушъёз.

— Со умой но, урод но ӧвӧл, со — озьы кызьы вань. Адямиос но уло но куло ук. Кез школаын дышетскыкум, историяя дышетӥсе шуиз огпол: «Тодӥськоды-а, кун вордске, улэ но кулэ. Кылсярысь, Совето Союз, Египет. Милям но кунмы озьы ик вордскиз, али улэ но куке но быроз». Ми ӟольгыриос быдӟа вал ай, воксё бакомим. Нош со огшоры зэмлык.

— Режиссёръёс пӧлысь кин дуннеяд пытьы кельтӥз?

— Франциысь Мишель Гондри, асьме Арсений Тарковский. Али мон шер учкисько киноосты. Ваньзэсты, кудъёсыз мыным кельшо, мон дышетскыкум учки. Берпуметӥосыз пӧлысь, мае адӟи — «Левиафан» но «Интерстеллар». «Интерстеллар» кельшиз, шедевр ӧвӧл ке но, кельшиз. Нош «Левиафан» бушгес-а мар-а. Пуштростэм кыӵе ке но. Мон шумпотӥсько, сое дуннеын синйылтӥзы шуыса, но отын номыр вылез ӧвӧл ук. Куд-ог интыосын уродгес но уло. Одӥг суредэз ӵабыштӥз: соос уло куашкам гуртын, нош кышно душысь потэ. Кыӵе душ куанер коркаын? Мынчо луыны кулэ ук! Вылаз ик — ваньмызлэн дуно машинаос… Тумошо. Я, со чыры-пырыос ни. Мӧзмыт кино, тодэ номыриныз уз кыльы. Вань на та выллемгес «Дурак» фильм: озьы ик урод кун но пичи адямиослэн кусыпъёссы. Таиз трослы кужмогес. Ма, трос сыӵе киноос. Нош огыр-бугыр поттӥз «Левиафан» гинэ. Малпасько, со понна продюсерлы тау карыны кулэ. Эшшо «Горько!» киноен ӵошатэм потэ. Отын ведь кунмы трослы уродгес возьматэмын, но со вылэ малы ке нокин уг чагиськы. «Левиафан» но «Горько!» огвыллемесь — огез ӝожмыт возьматэмын, мукетыз — серемес.

— Тон астэ нырысь ик мультфильм яке кино лэсьтӥсен шӧдӥськод?

— Огез мукетызлы уг люкеты. Али нырысетӥез вылын коньдон поттӥсько, нош кыкетӥез лулэлы кылиз. Мультфильмъёсты али мылкыдыя уг суредаськы — дыр уг тырмы. Но алигес удмурт выжыкылъя мультфильм лэсьтӥ, поди историе таре кылё (серекъя). Удмуртъёслэн сыӵе выжыкылъёссы — йырпорымонэсь! Тани ӝоген мукет мультфильм бордын ужаны кутско — соиз зэмос арт-хаус! «Север» киноме дасякум, мон нырысьсэ фольклоре выйи, кырӟанъёсты кылзӥськи, лыдӟиськи. Шедьтӥ таӵе кылъёс: «Возьвыл кызьпуос, мон но кулэм бӧрсям татын тӥ пӧлын будо». Юзыр-кезьыр ик луоно!

— Киноосад но мультфильмъёсад крезьгурлы бадӟым инты висъямын.

— Шонерзэ ке верано, крезьгур валтэ. Рос-прос сценарий ӧвӧл дыръя, крезьгур быдэс киноез ас вылаз нуэ.

— Вань киноосыд бордын тон ужаськод огнад: режиссёр но, монтажёр но, звукооператор но. Уг поты-а котырад юрттӥсьёсты люкамед, дышетэмед соосты?

— Ӵапак алигес малпаськи со сярысь. Ижын сыӵе студия уг тырмы. Но мыным секытгес, дыр, луоз. Кулэ ук индылыны, дунъяны, нош мон уг быгатӥськы, адямилэн синмаз учкыса, вераны, со мае ке урод лэсьтэ шуыса.

— Кинэ-о дунне кизилиос пӧлысь вӧзад ужаны кутысалыд? Но кыӵе кино пуктысалыд?

— Англиысь актрисаез Шарлотта Генсбургез, дыр, одно ик ӧтьысал. Но Голливудысь ракен висись тусо актёръёсты — восьтэт, ӵужектэмын… Нош кино лэсьтысал одно ик Сарапулын — отын котькуд коркалэн аслаз историез.

Бен, кулэ ни зэмос кино пуктыны. Но маин сое йылпумъяно, нош кызьы со дорозь вуоно? Шуг со, кулэ сценарий гожтыны. Мӧзмыт медаз лу учкыны. Секыт 10 минутлэсь кузьгес кино лэсьтыны.

— Нош кызьы тон «Город» мультфильмдэ кылдытӥд?

— 2 ар куспын, ӝытъёсы, общежитиын. Мыным потэ, «Город» кык люкетлэсь пӧрмемын, малы ке шуоно дыр мынэмъя мон но воштӥськи. Кутсконэз ӝомытгес, нош пумыз — сайкыт. Та мультфильмме, университетэз быдтыкум, йылпумъяй. Со Ижкар сярысь. Валасез валаз, дыр. Яратӥсько шоркармес. Со монэ визьнодаз, быдэ вуттӥз.

Мультфильмлэн пумаз возьматӥ городмылэсь тужгес но тодмо юртъёссэ, синпелетъёссэ — яркыт мед луоз шуыса, та люкетсэ маркерен суредай: 300-лэсь трос бумага лист кошкиз! Али ачим но уг валаськы, кытысь сомында дыр шедьтӥ. Я коть берло луоз, мар возьматыны ачим сярысь.

Шӧдтэк шорысь «Город» вуонозэ возьматӥсь мультфильм луиз, ачим ик пайми, кылъёсы быдэсмыны кутскизы шуыса. Кылсярысь, Крым Россия борды итӥськиз. Но ӧй малпалля, та учыр мынам вапумам ик ортчоз шуыса.

— Кытын ке дышетскид-а суредаськыны?

— Ӧй, ас поннам дыши. Коркамы чугун сюрес вадьсын сылэ вал. Соин мон весяк, поездъёсты суредаса, пуки.

А. Першинлэн мультфильмъёсысьтыз суредъёс

А. Першинлэн мультфильмъёсысьтыз суредъёс

Вера Штыкова

Туспуктӥз Евгений Ардашев

Удмурт Дунне
By Удмурт Дунне 26 февраля, 2015 09:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<