Аслыз кузьым — марафон

Удмурт Дунне
By Удмурт Дунне 24 февраля, 2015 12:13
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
В. Трофимов

В. Трофимов

3 час но 10 минут

13-тӥ феврале Алнашысь Виталий Трофимов куасъёсын 50 иськемез ортчиз. Та марафонэз со сӥзиз аслаз 54-тӥ вордӥськем нуналэзлы.

Бызьылонлы со кык арня талэсь азьвыл рос-прос дасяськыны кутскиз. Нуналлы быдэ кык-куинь пол кызь иськемлэсь ятыр куас сюресъёсты ортчылӥз. 50 иськемез ортчон понна стадионтӥ 84 круг лёгоно вал. Стартэ потон азяз спортшколаысь тренерлэсь Николай Богдановлэсь визь-кенешъёссэ басьтӥз на. Собере вордӥськем нуналэз азьын нуназе бере 13 часын стартэ потӥз. Стадионтӥ ортчем кругъёссэ лыдӟыны оскиз нылпи юртын ӵош ужась эшезлы Антолий Ивановлы. Берпуметӥ кругъёсаз спортменлэсь мылкыдзэ ӝутон понна вӧзаз бызиз спортысь ветеран Иван Саушкин. Финиш азьынгес стадионэ мукетъёс но люкаськыны кутскизы. Соос пӧлын вал тренеръёс, спортсменъёс, ӵош ужась эшъёсыз, нылпи юртысь пиналъёс. Соос но марафонецлы кужым пыртӥзы кадь. Но тани берпуметӥ круг — финиш.

Виталий Ивановичез ваньзы ӟечкылало, кизэ кутыло, соин ӵош туспуктэме пуксё, тазалыкез сярысь юало.

— Нырысь 10 кругъёссэ туж секытэн ортчи, — шуэ Виталий Трофимов. — Собере капчигес луиз. Шонерзэ вераса, пумозяз уг вуы кожай вал. Но кыл сётӥ бере, сое быдэстӥ. Берло иськемъёс туж секытэн сётӥськизы. Кызьы быземме но ӧй вала ни кадь. Туж тау Николай Богдановлы мынэсьтым куасъёсме туж ӟеч дасямез понна. Соос туж умой нуизы.

Марафон сюресъёс Виталий Ивановичлы вазьгес тодмо ини. Бӧрсьысь куинь арзэ со 9-тӥ май нуналэ гужем марафонэз ортчылэ. Но туэ тани аслэсьтыз кужымзэ тол марафонын но эскериз. 50 иськемез со 3 час но 10 минут ӵоже ортчиз. Таин гинэ спортсмен буйганы уг малпа. Матысь аръёсы элькунамы радъяськись марафонъёсы пыриськыны мылкыдыз вань.

— Туж оскисько, азьланяз мон таӵе сюресъёс вылын огнам уг луы шуыса, — вера спортсмен. — Али куасэн бызьылон понна вань луонлыкъёс кылдытэмын. Ӟеч стадион, адӟем карымон куас сюрес. Туж шумпотӥсько, куасъёс вылэ нылпи юртысь нылпиос но султо ни шуыса. Туннэ бызьылэме уката но мылкыдзэс ӝутоз, дыр, соослэсь. Кӧняез ке пиос, шорам учкыса, туэ куасэн бызьылонъя секцие гожтӥськизы.

Зэм но, таиз, оло, тужгес кулэез. Ӟеч адӟиськиз, кыӵе пиналъёс данъясько асьсэлэн Виталий Ивановиченызы. Соос понна со зэмос герой луиз.

Людмила Сурчакова

Удмурт Дунне
By Удмурт Дунне 24 февраля, 2015 12:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<