Музъем бордын — кужым

Удмурт Дунне
By Удмурт Дунне 24 февраля, 2015 11:36

«Зуринский агрокомплекс» огазеяськон — Эгра ёросын гинэ ӧвӧл, быдэс шаерамы одӥгез тодмоез но ӝог азинскисез. ООО-ез 17-тӥ арзэ будон сюрестӥ нуэ ни туж дӥсьтӥсь но быгатӥсь нылкышно Елена Чиркова. Солэн юрттӥсьёсыз — валтӥсь агроном Ольга Дементьева но зоотехник-селекционер Марина Чиркова. Соос мадё туннэ ужъёссы сярысь.

Валтӥсь агроном О. Дементьева

Валтӥсь агроном О. Дементьева

Наукаен ваче ки

Кылем сӥзьыл гурт удыслы капчи ӧй вал, зорыса улӥз, — шуэ Ольга Дементьева. — Озьы ке но огъя кужымен ми умой урожай басьтӥмы, ёросын но уйпал районъёс пӧлын азьпал интыосы потӥмы. Тырмыт кисьтӥмы кидыс, вузаны но шедёз. Пудо сиёнмы но окмымон дасямын, одӥг йырлы быдэ 33 центнер. Тыршеммылэн пайдаез али син азьын: пуж-пуж йӧл потэ.

Оглом вераса, тулыс бусы ужъёслы дасяськыны кылем сӥзьыл ик кутским. Кужмо техникамы — тракторъёс — туннэ ик лудэ потыны дасесь. Сеялкаосты, культиваторъёсты, герыосты, усыосты но мукетсэ эшшо чаклаломы, тупатъяломы на.

Берло дыре музъемен ужанлы нимысьтыз саклык висъяськом. Валэс юосмес турын бервылэ кизьыны выриськомы. Кӧжы но вика будэтонлэсь но ум куштӥськиське, бадӟым урожай уг ке но сёто, соос музъемез умоято, удалтонлыксэ ӝуто. Муосмы уго начаресь: пурысь пень выллем но горд сюй. Соин ик берло аръёсы паськыт кутӥськом гербицидъёсты но минерал сылалъёсты. Удобрение туэ 100 тонна басьтӥмы ни.

Капчи ӧвӧл ке но, арысь аре выль техника басьтӥськомы. Миым Белоруссиысь ю тысь октон но пудо сиён аран «Палессе» комбайн, Франциысь телескопической погрузчик-трактор басьтӥмы. Берлоез 4 миллион сылэ. Сое ӟеч механизаторлы Николай Чирковлы оским. Нош Василий Дементьев Финляндиысь VACTRA тракторен 2-тӥ арзэ ужа ни. Шумпотонэзлэн пумыз ӧвӧл.

Механизаторъёсмылы озьы ик ярало Новосибирскысь вуттэм БКС-8 усы, Шарканысь культиваторъёс.

Берло дыре трос сюлмаськиськомы ӟеч ю кидыс уськытон сярысь. Арлы быдэ ӟеч выжыысь 3 пӧртэм кидыс вуттӥськомы. Миым 2 тонна выль «Буланый» сорт чабей басьтӥмы Москваысь гурт удысъя научно-исследовательской институтысь. Одӥг килограммез 42 манет усиз. Со 11 гектар вал но бадӟым урожай сётӥз — котькуд гектарысьтыз шорлыдын 45 центнер люкамы. Нош «Ульяновец» сезьы миым 20 гектар питомнике кизимы. Тазэ вуттӥмы Ульяновскысь гурт удысъя научной центрысь.

Мукет хозяйствоослы ми вузаськомы элита но нырысетӥ репродукциен гинэ таза кидыс. Миым будэтэм юмес али эскеро Эграысь семлабораториын. Ёросысь сяна, дорамы кидыслы лыкто Ува, Дэбес районъёсысь, Пермь улосысь гурт эштосъёс. Кидыс вузамлэн пайдаез бадӟым, рентабельностез 60 процентозь вуэ. Милесьтым басьто чабей, йыды, сезьы, кӧжы, вика.

Ортчем сӥзьыл лымы улэ 450 гектар кизим ӟег но тритикале гибрид. Тритикале кӧс куазен но, ӟеген ӵошатыса, ӟеч урожай сётэ. Нялтас вераса, валля арын хозяйство ваньзэ 2 сюрс 259 тонна ю тысь кутсаз ке, миым со лыдпус 2 поллы трос — 4 сюрс 534 тонна — луиз.

Ӟеч сиёнлы коньдон жаль ӧвӧл

Механизатор Н. Чирков

Механизатор Н. Чирков

— Трос сӥль-йӧл поттытэк, уд юнматы хозяйстволэсь экономиказэ, уд умояты калыклэсь улон-вылонзэ, — шуэ зоотехник-селекционер Марина Чиркова. — Соин ик та удыслы нимысьтыз саклык висъяськомы. Али тани 1 сюрс 250 йыр сюро таза пудомы. Со пӧлысь 510-эз — скалъёс. Ваньмыз пудомы 3 фермаосы интыямын. Бадӟымез — Зура комплекс, татын 240 йыр скалъёсмы. Фермаосмы ялан выльдӥсько, пудо утисьёслэн ужан условиоссы умояло. Котькуд фермаын молокопровод ужа. Азинсконъёсмы пумен шумпотто. Кылсярысь, валля арын котькуд скаллэсь 5 сюрс 563 килограмм кыскимы ке, миым 6 сюрс 67 килограмм луиз. Нош туэ ужъёсмы уката умой мыно. Кылем арын январе сярысь, туэ скаллы быдэ 113 килограммлы уногес йӧл кыскимы — 669 килограмм. Али нуналаз скаллы быдэ 18,5 килограмм потэ. Ваньзэ йӧлмес «Кезсыр» огазеяськон басьтэ, напез 3,65 процент луэ, белокез — 3,18 процент. Со умой. Малы ке шуоно ӟеч сиёнэн сюдӥськом. Рационэ пыро кӧжы, вика, БВД (белокен но витаминэн узыр ватсэт), кыд (жмых) но мукетыз. Рапслэсь кыд вуттӥськомы бускель Пермь улосысь Верещагиноысь. Одӥг килограммез 13 манет усе, нош БВД — 37 манет. Дуно ке но, со йӧлын берытске.

Фермаосын вань ужъёсты быгатыса радъяло но валаса нуо Ольга Корепанова (Зура), Надежда Корепанова (Оник-йырым) но Ирина Агафонова (Квардавозь). Оскем ужзэс ӟеч быдэсъяло пудо бызьылытӥсьёс Екатерина Ускова но Вера Корепанова. Дояркаос пӧлысь синмаськымон тырше Зураысь Татьяна Емельянова. Миым со котькуд скалэзлэсь 6 сюрс 879 килограмм йӧл люказ. Азьмынӥсь сьӧры уйисько Ольга Корепанова, Татьяна Венедиктова, Лия Шкляева но мукетъёсыз.

Арысь аре пудо уллёмес будэтӥськом. Миым, 2013-тӥ арын сярысь, 35 йырлы скалъёсты йылэтӥм. Парсь вордӥськом гурт калык понна, парсьпиосты вузаськом.

6-20-11

Зоотехник-селекционер М. Чиркова

6-20-10

Механизвтор В. Дементьев

     

Геннадий Романов  

Туспуктӥз Владимир Беломорских

Удмурт Дунне
By Удмурт Дунне 24 февраля, 2015 11:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<