Александ Соловьёв: «Ужамелы дунъет сётоз калык»

Удмурт Дунне
By Удмурт Дунне Февраль 24, 2015 09:53
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Фото Поздеева А_12

Александр Соловьёв

Ар талэсь азьло Александр Соловьёвлы оскемын Удмуртиен кивалтыны

Кылем арын 19-тӥ феврале В. Путинлэн указэзъя Удмурт Республикалэн Тӧроезлэсь ужзэ быдэсъясь луиз Александр Соловьёв. Кыӵе йылпумъянъёс лэсьтыны луэ ни ар ӵоже ужамезлы? Александр Соловьёвлэсь та сярысь юалляськизы шаерысьтымы журналистъёс.

— Александр Васильевич, кызьы дунъясалды ар ӵоже тыршемдэс?

— Та удысэз мыным оскиз Россилэн Президентэз, ачим мон ӧй ӵектӥськы. Зэмзэ вераса, мон нырысь куаляк луи: арлыды люкаськемын ни, быгато меда мыным оскемзэс уж вылын возьматыны? Мукет ласянь, ужан опытэ бадӟым, кужымме шӧдӥсько, элькунмес азинтон понна вань мылкыдме сётыны дась. Озьы мон Владимир Путинлэн Владимировичлэн ӵектонэныз соглаш луи. Туннэ нуналлы вераны быгатӥсько ни: таӵе решение кутэме пумысен чик но уг жаляськы.

Нош ар куспын тыршемелы дунъет сётон пумысен ке… Школаын мон отличник ӧй вал, котьку басялляй тыршемелы тупась зэмос отметка. Кивалтон удысын но озьы: ар куспын тыршемелы вылӥ оценка пуктон — монъя ӧвӧл. «3»-лы дунъяны но ичигес кадь. Пуктысал юн «4». Но ужамелы зэмос дунъет сётыны быгатоз калык гинэ. Тау шуэме потэ солы — оскемез, Тӧрое быръемез понна.

Котькыӵе вераськонъёсты кылэме вань: Соловьёв, пе, Тӧролэн пуконаз ӝыны арлы гинэ пуксиз. Тазьы кыл вӧлдӥсьёслы мынам вераме потэ: мон Тӧрое пукси сомындалы, кӧнялы бырйиз монэ калык, тыршо сомында, кӧня дыр висъямын законэн.

Шаерен кивалтонлэсь биньгозызэ кырмеме бере ик калыклэсь мылкыдзэ юай: кыӵе ужпумъёс тужгес но сюлмаськыто, ма борды, чик ӝегатскытэк, басьтӥськоно? Юалляськон возьматӥз: калыклэн кӧтыз уг веська куашкан калэ вуэм сюресъёслы. Тодэмын — лэсьтэмын! 1 но ӝыны миллиард манет висъяны быгатӥмы шаерысьтымы сюресъёсты выльдонлы-тупатъянлы. Гужем куспын бадӟым ужез быдэстыны пӧрмытӥмы.

Табере туэлы ужъёсты чакласькомы ни. Огкылэ вуимы: шаерысьтымы Сюресъёсъя фондысь ваньзэ уксёез кутоно асфальт кисьтонэ. Ёросъёсын но кылдытэмын таӵе фондъёс — соослы но республикалэн бюджетысьтыз коньдон висъяськоз. Туэ син шорын луозы гуртъёс куспын сюресъёс. Кылсярысь, школае нуисьёсыз. Гужем куспын ваньмаз сямен ик ёросъёсын ӝутэмын луозы 100 иськем таӵе сюресъёс. Берло 10-15 ар ӵоже та ужпумлы бадӟым саклык ӧз висъяськылы вал ни — школьной сюресъёс я куашкамын, я воксё но ӝутэмын ӧвӧл.

Фото Поздеева А_04

Журналистъёс пресс-конференциын

Со сяна, федерал бюджетысь 1 миллиард манет вуоз шаертӥмы ортчись федерал трассалэсь куд-ог люкетъёссэ тупатъянлы. Со чотын, кылсярысь, выльдӥськоз Ижез Пичи Пургаен герӟась сюреслэн оглюкетэз.

— Экономикаын шуг-секытъёс кылдэмен валче Россиын кутэмын кризисысь потонъя нимаз программа. Удмурт шаер но басьтӥськиз ни сое дасян борды. Кыӵе удысъёслы бадӟымгес саклык висъяськоз?

— Та программа шаерамы кылдытэмын ни, вуоно арнялэн кутсконаз сое эшшо огпол эскерыса потомы на, та бӧрсьы сое эскероз на федерал центр. Валамон, кризис тужгес но зол шуккоз ужбергатонэз. Соин ик тупен-тупен пусйимы солы юрттон амалъёсты. Тужгес но пайдаёез — кредитъёсты капчиятон. Соослы 1 миллион манет кредит 10 процентэн висъяськоз, инвалидъёсты ужаны кутэм предприятиослы — 8 процентэн, производствоязы инновациосты пыӵатӥсь огазеяськонъёслы — 6 процентэн. Та коньдон чакламын ни Удмурт Республикалэн туэлы бюджетаз.

Со сяна, кризисысь потонъя планын рос-прос чакламын гурт удыслы юрттон но. Валамон, юрттэт висъян понна кӧня ке шымырсконо луомы: выль сямен эскерыса потоно луоз Удмуртилэсь социально-экономической планзэ, мар карод, расходъёсты амалтэк кулэстоно луоз.

Республикалэн бюджетысьтыз гинэ ӧвӧл, федерал центрысь но юрттэт висъяськоз вуз поттӥсьёслы. Дыр вуиз импортлэсь, мурт экономикаосты «сюдонлэсь» куштӥськыны, асьме экономикамес ӝутоно.

Со сяна, сак чакласа возиськомы сиён-юон дунъёсты. Таиз но кризисэн нюръяськонын валтӥсь инты басьтэ. Кенешиськомы магазинъёслэн кузёосынызы, производительёсын — дунъёс кисылы тупамон луыны кулэ.

— Туэлы чакламын вал кун служащийёслэсь лыдзэс 15 процентлы кулэстыны. Таин валче кӧня коньдон шыръяськиз?

— Та юанлы меӵак валэктон сётыны вазь на: чиновникъёслэсь лыдзэс кулэстон азинтӥське ай. Март толэзе та ласянь кыӵе ке сыӵе лыдпусъёс шараяськозы ни. Валамон, кун ёзъёсын оптимизация — туж вӧсь карись ужрад. Но сое пыӵатытэк ӧйлась. Бюджет уксё шӧдскымон шыръяськоз. Чакламын вал кивалтон ёзъёслы 50 миллион манет тыр машинаос басьтыны. Кенешимы та коньдонэз калыкез улон-вылонын утёнлы келяны.

Шаерамы азинтӥське коррупциен нюръяськон. Мон уг шуиськы, Удмуртиын та ласянь секыт югдур шуыса. Но куд-ог учыръёс пумиськыло ик. Тодӥськоды, эсэпсэ чакламтэез понна палэнтэмын Яр ёрослэн йырыз, со сяна, мынам юанъёсы кылдэмын Можга но Сарапул городъёсъя. Та ужпумез син шорамы возёмы, закон азьын ваньмыз огкадесь луыны кулэ.

Куд-огезлэн пышкылэмез потэ: федерал СМИ-осын Удмурт шаер сокем паськыт уг возьматӥськы, таин валче рейтингез но уг ӝутскы. Но мон тазьы шуысал: шуом, 1 миллион манетэз рекламалы висъятозь, мон сое йӧл поттӥсьёслы сёто. Та трослы пайдаёгес луоз.

Фото Поздеева А_02

Журналистъёс А. Соловьёвлы юанъёс сётъяло

— Тӥ ӵектонэн потӥды интыосысь аскивалтонъя ёзъёсы воштонъёс пыртон пумысен. Маин со герӟаськемын?

— Россиысь котькуд улослы луонлык сётэмын интыысь аскивалтонэз ас чакламезъя радъяны. Трос валамтэос кылдо, шуом, ёросысь муниципал кылдытэтэн йырыз но администрациен кивалтӥсь куспын. Та нуналъёсы пумиськылӥ политической партиослэн азьветлӥсьёсынызы, кичӧлтонэн потӥ: ёрос яке город муниципал кылдытэтлэсь йырзэ быръёно Депутатъёслэн кенешазы пырисьёс пӧлысь, солы ик осконо администрациен кивалтонэз но. Партиос кичӧлтонэлы дурбасьтӥзы. Та юан эскериськоз март толэзе Кун Кенешлэн сессияз. Быръёнъёс ортчозы туэ куара сётонъя огъя нуналэ — 13-тӥ сентябре, солы дась луоно.

Елена Никитина

Туспуктӥз Андрей Поздеев

Удмурт Дунне
By Удмурт Дунне Февраль 24, 2015 09:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<