Дӧдьыкуштон

Удмурт Дунне
By Удмурт Дунне Февраль 17, 2015 11:07

КочановаКарина Кочанова.

Алнаш ёрос, Кузьымгурт

Тани-тани инопланетянинъёс инсьӧр корабльлэсь ӧссэ усьтозы. Ваньзы бызьыло. Тась! ыбыса кадь лобӟиз корт ӧсэз кутӥсь одӥгез винтик… Тась! — кыкетӥез! Шыпыт луиз… Нокин но шоканы но уг дӥсьты… Ваньзы возьмало, мар луоз… Солдат Максим но, электро пыӵалзэ кияз юн кутыса, возьма, чаклаське… Пуштэм куара шуккиськиз! Копак ӵын, ыбылӥсько… «Ма-акси-и-им!»…

— Осто! Инмаре! Юртты! — вӧсяськыса 7 аресъем Макси шуныт валесысьтыз тэтчиз. Син азяз весь ай со ӵын берга кадь… «Ма-акси-и-им!» — куара нош ик чузъяськиз.

— Бон султӥ ни кадь но… — Паймыса, Макси бамаз чабкиз.

— Ма-акси-им! — нош ик кылӥськиз кырысь. Пӧсь кортэн бераз йӧттэм кадь, Макси, укное учкиз. Отын сылэ Гриша. Гуртын ваньзы тодо ини, кыӵе со ерпечка. Тани кылем арын Матӥлэсь салазкизэ лушказ вал. О-ой, со понна йӧтӥз ук солы!

Макси шаплы гинэ дӥсяськиз. Потыкуз ӧз чида учкытэк выль дӧдьыез шоры. Сое Максилы атаез валлян гинэ ай басьтӥз. Пияш азьвыл дӧдьыеныз, меӵ гурезьтӥ нискылтыса, трамплинэ мертчиськиз. Вуж дӧдьылэн векчи пуосыз шарк! гинэ тӥяськизы. Нош таиз катар, кортъёсын юнматъямын, умой гылӟе! Эшъёсыз черодэ султо со дӧдьыеныз нискылтон понна. Гирыш но, бадӟым мугоро ерпечка, ёртэ. Но тужгес но зол Максилы кельше пыкъяськон пул борды суредам ӵӧжпи. Со понна ик дӧдьыезлэн нимыз но сыӵе ик. Ӵӧжпи самой крутой дӧдьы, соин ик Максилэн нырыз вылэ чатыртэмын.

— Мар чоръяськод? Туннэ арнянунал! У-у-уй… Инопланетянинъёсын жугиськыса но ӧй ву, — вазиз Макси аслэсьтыз вить ареслы бадӟымгес эшезлы.

— Тон дӧдьыдэ куштӥд ни-а? — Максилэсь фантастикаез яратэмзэ тодыса, Гирыш паймытэк юаз.

— Ма-а-ар? Марлы? Мынам Ӵӧжпие выль ук ай, атае толон-валлян гинэ ай басьтӥз!

— Тон уд тодӥськы шат? Туннэ 7-тӥ оштолэзь ук — Дӧдьыкуштон нунал!

— Зэм-а? Ку-у-удмында дунне вылын улӥсько ни, огпол но кылэме ӧй вал на, — бадӟым мурт кадь кариськыса, визьмо ымнырын шуиз Макси.

— Ма, зэм, зэм. Мон аслэсьтымзэ Чурай нюкамы куштӥ ни. Мын, тон но кушты. Али ик.

— Ну-у-у… Озьы ке, бон я, кушто. Эх, жаль ук!

— Инмарлы ке оскиськод — дӧдьыед жаль уз пот! — вожез потыса Гирыш вераз.

— Ма, я, я, кушто… — гызмыльтӥз Макси.

Шуныт дӥсяськыса, Макси дӧдьызэ калтӥз кутӥз но нюж-нюж гинэ Чурай нюке вамыштӥз. Мыныкуз весь берытске, учке дӧдьыез шоры, соин вераське.

7-17-3

Чурай нюк дуре вуыса, дӧдьызэ азяз кариз но, мур лулӟыса, вераны кутскиз:

— Яратоно Ӵӧжпие! Мон тонэн нискыласа но ӧй вутты ке но, тон пыраклы пыӵад сюлэмам, самой экстремальной дӧдьы кадь ик! Мон тонэ ноку но уг вунэты! Дӧдьыкуштон нунал ке ӧй луысал… Эх… Мон мӧзмо тынэсьтыд, Ӵӧжпие!

Макси, векчи киосыныз шоналтӥськыса, нюк пыдсы ик дӧдьызэ ширтӥз. Ачиз но сьӧраз ӧжыт гинэ ӧз кошкы. Нырзэ ошыса, со, пытьысь пытьыяз ик вамышъяса, дораз бертӥз. Корка пырыса, анаезлы данъяськыса шуиз:

— Анай! Мон пичи дӧдьыме куштӥ ни!

— Дӧдьыдэ? Кытчы? Малы? — паймиз анаез.

— Э-э-э, анай, тыныд возьыт луыны кулэ, туннэ нуналэз но уд тодӥськы.

— Кызьы ай уд тод? Дӧдьыкуштон.

— Бон. Ачиз пайме, кытын, пе, дӧдьые. Мынам выль Ӵӧжпие Чурайнюкын бабе ини. Оло, сопал дуннее но табере вуиз ни. Музъем солы небыт валес кадь мед потоз.

— Ой-ой! Быриськиз таин! — серекъя Марьяпай. — Бон со нуналлэн нимыз гинэ сыӵе — Дӧдьыкуштон! Кин визьмо адями дӧдьызэ нюке куштоз?! Нюлымтэ кунянэ мынам!

Та кылъёс бере Максимлэн ымдуръёсыз кырыжазы, йыраз вир шуккиз, сюлмыз гадьысьтыз потыны дась. Кызьы кутъёс люкасько Марьяпайлэн варення пӧзьтон дураз, озьы ик пичи пилэн но йыраз олокӧня пӧртэм малпанъёс бергало. «Малы монэ Гирыш алдаз? Малы мон солы оски? Со весь вожъяськыса улӥз дӧдьыелы!»

— Анай… Мыным Гирыш шуиз, озьы, пе, кулэ. Мон, пе, аслэсьтымзэ куштӥ ни… — шуиз Макси ӝожомыса.

Анаез, пиезлэсь мылкыдзэ шӧдыса, лякыт вазиз:

— Пие, тон мынам визьмо ук. Оскыса тросгес ул ай со чапкылон люкетлы! Мын, пие, мын, вай берен Ӵӧжпидэ!

Макси Чурайнюке табереяз бызьыса мынӥз. Вуиз но аслаз синъёсызлы ӧз оскы. Дӧдьыез интыяз ӧвӧл ни… Макси онграм кечпи кадь отӥ-татӥ утчаське, чаклаське — нокытын но — нюк гыркын но, нюк дурын но — дӧдьы ӧвӧл. Пытьыос гинэ адско. Кин ке нюк улэ васькем но дӧдьыез басьтэм. Вань малпанъёсыз Максилэн шара потӥзы:

— Малы со монэн озьы?! Али ик дораз мыно! Кытчы кариз Ӵӧжпиме?

Макси Гирышъёс доры вамыштӥз. Соиз ӝӧк сьӧрын, чай юыса, гань-гань пуке.

— Гирыш, дӧдьые нюкын ӧвӧл ни.

— Оло? Паймод но бырод, ява, — пеймыт синъёс кескич кунэрскизы…

Юанэзлы валэктон шедьтытэк, синъёсыз бусаськыса, Макси потӥз бускельёссы дорысь. Капка доры вуыса, шуак сётӥськиз лапас улэ. Вылӥе учкиз но — лапас сиглэн пагӟаез дорын лач-лач гинэ шутэтске Ӵӧжпиез. Вот тыныд Дӧдьыкуштон! Вот тыныд, ваньмызлы оскид ке! Пилем улысь потэм шунды пичи Максилы пальпотӥз кадь.

Туспуктӥз Ирина Zangarik

Удмурт Дунне
By Удмурт Дунне Февраль 17, 2015 11:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<