Та дунне нокытчы уз ышы

Удмурт Дунне
By Удмурт Дунне 17 февраля, 2015 09:56
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Ижысь Некрасов нимо библиотекаын ортчыло писательёсын пумиськылонъёс. Сергей Жилин - гитараен

Ижысь Некрасов нимо библиотекаын ортчыло писательёсын пумиськылонъёс. Сергей Жилин — гитараен

Мар со эгодокумент?

Удмуртиысь ӟуч литература, кыӵе со? Та но мукет юанъёслы валэктон сётэ Удмурт кун университетысь ӟуч литературалэн историезъя но теориезъя кафедраысь профессор Марина Серова.

— Удмурт литературалы кутскон сётӥзы Г. Верещагин, И Михеев, К. Герд, шаерысьтымы кыӵе ӟуч гожъяськисьёс сярысь озьы вераны луэ?

Ми кемалась ик ӧвӧл ай басьтӥськимы Удмуртиысь ӟуч литератураез эскерон борды. Но туннэ нуналлы, кыӵе со, вераны секыт на. Пусйыны луэ ни куд-ог зол гожъяськисьёсты, но шуыны, соос бордысен шаерамы кутске ӟуч литература, уг луы.

Г. Верещагин но К. Герд — туж яркыт нимъёс. Нош ӟуч литературалэн Удмуртиын сыӵе бадӟым нимтулъёсыз ӧй вал. Удмурт литература азьын бадӟым ужпум сылӥз — сое кылдытон, адямиос анай кылынызы мед лыдӟиськозы-гожъяськозы. Нош Удмуртиысь ӟучъёслэн сыӵе ужпумзы ӧй вал, соос странаысьтымы литератураез лыдӟизы. Таин валче Удмуртиысь ӟуч литература калленгес азинскиз, таин валче ик шаерамы ӧй вал ӟуч драматургия но. Архивъёсын утчаськыса, шедьтӥмы Сарапулысь Сергей Миловский писателез. Гожъяськиз, шонерзэ вераса, огшоры, солэн улонэз тунсыкогес вал. (Баӵколэн семьяяз вордӥськем священник гожъяськыны кутске, но со пушкын писатель но баӵко ог-огенызы уг тупало. Озьы 1911-тӥ арын Сергей Миловский ассэ быдтэ, солэн кылё кышноез но 5 пиналъёсыз.) Солэн гожъямъёсыз туж матын луо А. Чеховлы. Со ялан ассэ утчаз, тае шӧдоно «Лазарь» берпуметӥ веросысьтыз но. 19-тӥ даурысь со огназ проза гожъяз. Азьвыл но, али но шаерысьтымы ӟуч литератураын тросгес кылбурчиос.

— Поэзия — литературалэн, кыллэн вылӥ формаез, кылбурен ӵошатыса, верос гожтыны капчигес, дыр, нош адямиос одно ик кылбураны тыршо?

— Малпанъёссэс рифмаен гожто ке, адямиос малпало, кылбур кылдытӥзы шуыса. Со озьы ӧвӧл. Вань умой поэтъёс, Маргарита Зимина, Сергей Жилин кадьёс, соос уг гожъясько литература премия яке дан понна. Та усточиослэн вань, мар вераны адямиослы но мае кельтыны асьсэ бӧрсьы.

Вань мукет гожъяськисьёс но. Соослэн чуръёссы туж огшоры, но со дыре ик сюлмысь гожтэмын. Отысь адямилэн сюлмаськонъёсыз, малпанъёсыз пыр тодыны луэ историез, вакытэз. Мон таӵе кылбуръёсты яратыны кутски, соин ик та выллем литература но луыны кулэ. Литературоведениын сыӵе кылбуръёслы вань нимысьтыз термин, со нимаське эгодокумент. Со быдэсак литература но ӧвӧл, но отысь чуръёс сьӧрын адямилэн опытэз, кудӥз возьматэ даурлэсь омырзэ-шӧмзэ. Таӵе литература сярысь веракум, нырысь ик тодам лыктэ Эграысь кылбурчи Александр Чубуков. Нырысьсэ лыдӟеме бере ӧй вала, мар малпаны солэн творчествоез сярысь, собере туж паймытӥз но бордаз бинялтӥз «Заблудшая душа» сборникез.

— Мар сётоз Литературалэн арез асьмелы но мае лыдӟыны дэмласалды?

— Асьмеос тодамы вайимы литературамы вань шуыса. Кык юанлы одӥг валэктон сёто: ӝоген потоз выль бичет. Нимаське со «Этот мир никуда не исчезнет». Нялтас вераса, та удмурт писательлэн Сергей Матвеевлэн кылбурысьтыз чур. Литературалэн арез чотын та сборникез поттыны коньдон висъя Удмурт Республикалэн Правительствоез. Татчы шедизы Удмуртиысь устоосыз удмурт но ӟуч кылын гожъяськись кылбурчиос. Кызьы валады ини, одӥг люкетэз солэн сӥземын луоз удмурт литературалы, мукетыз — ӟучезлы. Та книгаез дасян бордын ужаз милям кафедрамы. Шаерамы улӥсьёс ваньмыз удмурт сямен лыдӟиськыны уг быгато, нош удмурт гожъясьёслэн творчествоенызы тодматскемзы потэ, соин ик удмурт кылбурчиослэн чуръёссы татчы ӟуч сямен пырозы. Пыртӥмы 20-тӥ даурлэн пумысьтыз но 21-даурлэн кутсконысьтыз кылбурчиосты (котькудӥзлэсь10-20 кылбурзэ).

Кинъёс отчы пыризы? Ӟуч люкетсэ верано ке, конечно, Маргарита Зимина. Малы ке шуоно кылбуръёсыз чеберлыкез валась-дунъясь адямиослы но, огшоры калыклы но туж матынэсь. Соос бурдъяло, улыны кужым сёто.

Сергей Жилин. Тросэз сое бард шуо, бен, чебер но сюлмысь кырӟа. Но солэн гожъямъёсыз кылбуръёс кадь дуноесь, солэн кылыз чебер, мур пуштросо. Сое, кылзэм сяна, лыдӟыны луэ, С. Жилин зэмзэ но поэт.

Владимир Фролов — тросэз та кылбурчиез уг тодо, но литератураен тунсыкъяськисьёс сое лыдъяло шаерысьтымы нырысетӥ зэмос поэтэн. Солэн одӥг гинэ сборникез («Дыхание») потӥз.

Владислав Шихов — мон солэн нырысетӥ сборникезлы азькыл гожтӥ, но мурдалаеныз тужгес но паймытӥз куинетӥ книгаез. Сое оградэ пукто Юрий Казаринэн, но Инмар мед утёз сое сыӵе улон сюреслэсь. В. Шиховлэн «Тени», «Руны», «Блаженство расставаний» книгаосыз интеллектуалъёслы гожтэмын.

Алексей Сомов — трос аръёс ӵоже кафедраын со сярысь вераськиськом, та адямилэн улонэз но, творчествоез но ӝож. Со кык ар талэсь азьло улонысь кошкиз, одӥг книгаез но потыса ӧз вуы. Соин ик та бичетэ милям пыртэммы потӥз солэсь кылбуръёссэ.

Собере мыно егитъёс: Камбаркаысь Екатерина Кадочникова (27 арес). Камбаркалы сӥзем чуръёсаз вань мур философиез, вылтуссыя соос туж огшорыесь ке но. Али со егит тодосчи ини, ужа Ижын, но Камбаркаяз гинэ со ассэ райын кадь шудо шӧдэ.

Марат Багаутдинов — таиз выль ӧрысь гожъяськись. Уно журналъёсын печатласькиз ини, Ижысь медакадемиын дышетскыкуз. Со Москваысь Литинститутын дышетскиз на. Литературая пӧртэм конкурсъёсын вормонъёсыз туж трос, но одӥг но книгаез ӧвӧл, малы ке шуоно солэн самокритикаез туж бадӟым. Марат кылбур гожтоз, лыдӟоз но, ӧз ни ке кельшы, кесялоз-ӵушоз. Но юнме уг шуо ук: кылбурчи ке тон, книгаед луыны кулэ. Соин ик ми туж шумпотӥськом, «Это мир никуда не исчезнет» сборнике егит усточилэсь кылбуръёссэ курыны быгатӥмы шуыса.

Эшшо егитэзгес гожъяськись — Татьяна Репина. Со студенткамы вал. Нырысь кошкиз Санкт-Петербурге, али улэ Польшаын. Гожъяське ӟуч но поляк сямен. Лыдӟисьёслы со тодмо «Монография. Пишет один человек» сборникеныз. М. Багаутдинов но Т. Репина туала сямен гожъясько ини, нокыӵе знакъёс пуктылытэк, валантэм семантикаен. Соосты М. Зиминаен, С. Жилинэн уд ӵошаты, но соос но туж тунсыкоесь.

— Кинъёс шедизы удмурт люкетаз?

— Владимир Владыкин, Алла Кузнецова, Михаил Федотов, Виктор Шибанов, Ада Диева, Сергей Матвеев, Пётр Захаров но Лариса Орехова.

Вань та писательёс пӧлысь монэ ньыль пол бӧрдытӥз М. Федотов, кылбуръёссэ книгалы бырйыкум, лыдӟыкум, дасякум. Владимир Владыкинэз мон лыдӟи школаысен, «Отчего поёт тюрагай» книгазэ ноку уг ни вунэты.

Мон шудо, Виктор Шибанов кылбуръёссэ сётыны соглаш луиз шуыса, малы ке шуоно со туж пумит вал ӟуч сямен печатласькыны. Удмурт кылбурчиосты бырйыкумы, ми утчамы сыӵе чуръёсты, кудъёсыз Удмурт шаерлэсь туссэ-буйзэ, удмуртъёслэсь пуш дуннезэс усьтозы.

Мар уг тырмы туала гожъясьёслы?

— Уг тырмы критика, отзывъёс. «Инвожо» но «Италмас» журналъёсын вань ай соос, нош «Лучын» ӧвӧл. Критика — со одно ик тышкаськон ӧвӧл ук, со эскерон — лыдӟисен ваче вераськон. Писательлы омыре гожъяськыны секыт. Мон лыдӟыны дэмласал туала поэзиез, со зол. Туала лыдӟисьлы кулэ туала литература. Умой-а со, урод-а, возьматоз дыр. Синмаськымон гожъясько егит нылъёс. Дарья Маслеевалэн кылъёсызъя гожтэм кырӟанэз кырӟаз Людмила Гурченко. Та ныл ужа али милям деканатамы. Со 19-тӥ даурысь нылмурт выллем. Нош Екатерина Растягаева Интернетын гожъя Катька Растягаева нимтулын. Мон со сярысь кыкетӥ Вера Полозкова шуысал. Сыӵе егит дыдыос гожъяло улонэз адӟем кышномуртъёс сямен. Эрико, тунсыко но оскымон.

Галина Савина

Туспуктэм nekrasov.izh-cbs.ru сайтысь басьтэмын

Удмурт Дунне
By Удмурт Дунне 17 февраля, 2015 09:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<