Синъёсме усьтӥз

Удмурт Дунне
By Удмурт Дунне 16 февраля, 2015 12:49
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Смирнова Е.ГГазетэн ӵош ортчем вамышъёс

Газетэн эшъяськон мылкыдме бугыртӥзы улонысьтым пӧртэм учыръёс. Лыдӟиськон мон понна синъёсты котькуд нунал усьтэм выллем.

Карпа агай

«Дась лу!» газет потыны кутскем бере мон но гожъяськыны кутски, пӧртэм конкурсъёсы пыриськылӥ. Алнаш шор ёзо школаын дышетскыкум, Ижкаре рабселькоръёслэн семинаразы ӧтизы. «Алнаш колхозник» газетлэн машинаеныз кӧня ке мӧйы воргоронъёсын мынӥ. Марлы ветлӥ, мар кылӥ — номырзэ но уг ни тодӥськы. Но туж шумпотӥ курень блокнотлы, кудзэ котькуд лыктэм муртлы сётӥзы.

Городын кӧлоно луиз. Мон синтэм писэй кадь: нокинэ но, номыре но уг тодӥськы. Гуртысь нокытчы потамын ӧвӧл. Ярам, дунне ӟеч калыктэм ӧвӧл. Монэн ӵош мынэм Асангуртысь Павлов Карпа агай сьӧрысьтыз ӧз кельты. Соцгородысь нянь пыжон заводлэн общежитияз Зоя нылыз доры нуиз. Сюдӥзы но, кӧлтӥзы но. Тау шуыны но валай оло ӧй, но Карпа агаез улытозям уг вунэтӥськы ни. Сак лыдӟи солэсь «Советской Удмуртия», «Алнаш колхозник» газетъёсы гожъямъёссэ. Со вал селькоръёс пӧлысь тужгес мыло-кыдоез гожъяськись. Нылпиосыз но йӧноесь. Владимир Карпович кема аръёс ӵоже Асан школалэн директорез вал. Нош Николай Карпович Павловлэсь нимзэ «Удмурт дунне» газетэз лыдӟисьёс пӧлын тодымтэез ик ӧвӧл. Кызлэн кускылиез выжыяз усем.

Кытчы пыризы воргоронъёс?

Лялиысь Таня Чикроваен милемыз «Дась лу!» газет школаысен ик эшъяськытӥз. Удмурт кун университетын дышетскыкумы яратоно газетмылэн редакцияз, Пастухов ульчаысь 13 номеро юртэ, сюрес лёгимы. Одӥг пол та юртысь ик «Советской Удмуртия» газетлэн редакцияз пыроно кариським.

Син азям али но таӵе суред. Кабинетын ог 5-6 воргоронъёс, укноез усьтыса, тамакало. Лыз ӵын кульчояськыса омыре кыстӥське. Огез маке вера, кылемъёсыз, кабинетэз зуркатыса, серекъяло. Ӝӧк сьӧрын пуке Николай Васильев (тазэ тодмамы). Ми пыремысь серекъямысь дугдӥзы но, кинъёс шуыса, юалляськыны кутскизы.

— А-а, тодӥсько, тодӥсько, — шулдыр вазиз Николай Васильевич. — Герман Ходыревлэн ӵужмуртэзлэн нунокез (Герман Ходырев нылпи писательлэн но мамаелэн песятайёссы — вын-агайёс).

Ортчиз ог 40 ар. Кӧня ке дыр талэсь азьло нырысьсэ пыри туала редакцилэн юртаз.

Син азям тодмо суред: кабинетъёсын пуко… жильк-жильк нылъёс. Огезлэсь чебер мукетыз, редакторзы но йӧно, визьмо нылкышно. Пумитам киоссэ вӧлъяса потэ чылкак одӥг воргорон — Иван Аркашев — университетын ӵош дышетскем эше (жаляса верано, ӝыны ар талэсь азьло со улонысь кошкиз). Журналистлэсь секыт ныпъетсэ нуо удмурт нылкышноос. Нош кытчы пыризы воргоронъёс?

Кӧтмес буйгатӥсь

УдГУ-ысь литературно-творческой кружокен гинэ кӧтмы ӧз буйга, лэся. Таняен «Советской Удмуртия» газетлэн литобъединенияз но ветлыны кутскимы. Дӥсьмес кельтӥськомы вал культурая отделэ. Ӧсэз усьтӥськод гинэ, киоссэ паськыт вӧлъяса, пальышаса Роман Григорьевич пумита (Галяскарович ке но вал, Валишинэз озьы нималлямы):

— О-о, тӧдьы Кызьпу лыктэм! (Ныл фамилие Берёзкина вал, соин, лэся, «советской удмуртиос» озьы гинэ шуо вал.)

Литературной огазеяськон котыраз люказ пӧртэм пумо творческой адямиосыз. Виталий Агбаев заводын ужаз, калык театре ветлӥз. Василий Кибардин — УдГУ-ысь экономикая факультетысь студент. Татьяна Чернова но Рашит Хайдаров, ми сямен ик, удмурт филологиын дышетскизы.

Занятиосын пумиськылӥмы писательёсын, кылысь кылэ берыктӥсьёсын. Теориез сяна, практикаез но вал. Дышетӥзы гожъяськыны. Туж умой тодӥсько на Гай Сабитовен занятимес. Сэрттӥмы-пертчимы Василий Кибардинлэсь кылбуръёссэ. 1-2 кылбурзэ но та пумиськонысь туспуктэмез газетэ но поттӥзы.

Литобъединение ужам бадӟым пайда сётӥз. 30 арлэсь кема дышетӥсько пиналъёсты анай кылмылы. Писательёсыз, журналистъёсыз книгаосъя но газетъёсъя гинэ уг тодӥськы, тросэныз матысь тодмо вал. Школаын вань ужатозям литературно-творческой кружок нуисько, тросэз соос пумиськылонъёсы вуылӥзы, кружокмылэн занятияз пыриськылӥзы.

Елена Смирнова.

Алнаш ёрос,

Чемошур-Куюк

Удмурт Дунне
By Удмурт Дунне 16 февраля, 2015 12:49