Инфомат юрттоз!

Удмурт Дунне
By Удмурт Дунне 16 февраля, 2015 10:08
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

7-13-1Нылпи поликлиникаослэсь ужзэс валаса радъян

Элькунысьтымы нылпи поликлиникаосын эмъясьёс доры черодъёс тымиськемын. Маин со герӟаськемын? Талы валэктонэз тодо Кун Кенешысь Егитъёслэн парламентсылэн ёзчиосыз.

Черодын — 70 мурт

Ижысь Максим Гаврилов — Кун Кенешысь Егитъёслэн парламентсылэн ёзчиез. Эшшо со егит атай, нылызлы алигес гинэ 3 толэзь тырмиз. Та вакчи дыр куспын валаса вуттэм ни: нылпи поликлиникае сюрид ке, отысь озьы гинэ уд поты: черодын час но, кык но сылоно луод.

— Ветлӥськом ми Ижысь 7 номеро больницалэн нылпи поликлиникаяз, — шуиз Максим. — Со котьку калыкен тырмемын. Угось та районын берло дыре уно выль юртъёс ӝужазы, «Столичный», «Янтарный» микрорайонъёс кылдӥзы. Нош поликлиника ӧз паськыта. Ярано, отчы ми кузпалыным ӵошен ветлӥськом, ог-огмылы юрттӥськом. Нунымылэн нонэмез потэ, мон кузпалме дӥсен возъясько, люкетӥсь-адӟись медаз луы шуыса. Уг луы меда нылпи поликлиникаосын анайлы но нунылы нимысьтыз комната усьтыны?

Егит атайлэн мукет но ӝожомонэз вань, пе. Нунызылэн нырыз тырем, температураез 37 градусозь ӝутскем. Нош участокъя педиатр вуымтэ, уг ваньмиськы, шуэм. Телефон пыр гинэ юалляськем но дэмланъёссэ верам.

Таӵе учыр одӥгаз гинэ нылпи поликлиникаын луысал ке! Югдур быдэс элькунамы огвыллем: педиатръёс доры сюрыны капчи ӧвӧл. Соин ик Егитъёслэн парламентсылэн ёзчиосыз та ужпумез нимысьтыз сэрттоно-пертчоно кариськизы. Шоркарысь поликлиникаосы сяна, потазы куд-ог мукет городъёсы, ёросъёсы но.

Мылкыдъёссэс-малпанъёссэс вуттӥзы элькун кивалтӥсьёс доры. Пумиськон ортчиз Кун Кенешысь котрес ӝӧк сьӧрын. Егитъёс, депутатъёс, чиновникъёс куспын кенешон ӟырдыт пӧрмиз.

Егитъёслэн парламентысьтызы социальной ужпумъёсын вырись Ольга Вежеева шуиз:

— Тужгес шугъяськытӥсь ужпум — уг тырмо специалистъёс, соин ик педиатръёс туж дыртыса ужано луо, угось куд-ог дыръя черодын 70 мурт но люкаське.

Мукетыз ужпум: эмъясь доры тросэз лыктэ, вазен гожтӥськытэк. Бен, унояз больницаосын вань ни нимысьтыз стендъёс, кытын пыр-поч валэктэмын, кызьы луэ специалистъёс доры каньылэнгес сюрыны. Соос доры азьло ик гожтӥськыны луэ Интернет, инфоматъёс пыр. Бен, ёрос центръёсысь вань поликлиникаосын инфоматъёс ӧвӧл на — ог 60 процентаз гинэ. Но кытын вань, отын но соос тэк сыло, больницае лыктӥсьёс пӧлысь ог 12 процентэз гинэ сое куто. Городын таӵеос ог 30 процент. Интернет пыр но гожтӥськисьёс сокем ик трос ӧвӧл. Таин валлин регистратураосын черодъёс ноку сямен уг бырыло. Озьыен, калык пӧлын валэктон уж нуоно…

Нылпи эмъясьлэн ныпъетэз

Педиатръёс пала соку ик дурбасьтыны ӧдъяз тазалыкез утёнъя министрлэн воштӥсез Людмила Гузнищева.

— Элькунамы 321 сюр пала 18 аресозь пиналъёс, — шуиз со. — Куд-огезлэн нылпиосмылэн асьсэлэн нуныоссы вань ни, но егит анай-атайёс эскерисько педиатръёс дорын ик. Дэмласьёс вань: нылпи эмъясьёслы сётоно 21 аресозь егитъёсты — соку мар луоз меда? Угось педиатръёслэн али но ужзы туж трос.

Нуны вордскымтэ на, нош нылпи врач соин тодматске ни — вуылэ семьяе, тодэ отысь югдурез. Нунылы 1 толэзь тырмытозь, котькуд арнялы быдэ кожа дораз. Нош отӥяз, арес тырмытозь, толэзьлы быдэ эскере сое. Педиатр нуналлы быдэ 4 час ӵоже нылпиосты учке поликлиникаын, собере 3 чассэ ветлэ доразы висисьёс дӥньтӥ. Эшшо выроно документъёсын.

— Мон кӧня ке тышкаськысал асьсэды анай-атайёсты, — шуиз Людмила Гузнищева. — Нуны вордскемлэсь азьло ик соосты ӧтчало нимысьтыз школае, отын умой-умой валэкто, кызьы чаклано пиналэз, кыӵе эмъюмъёс дорын возёно, ку но кинлы вазиськоно, нуны висьыны ӧдъя ке. Татын веразы, педиатр 37 градусозь ӟырдам нуны доры лыктымтэ шуыса. Мон ушъясал со эмъясез жингыртэмез, дэмланъёс сётэмез понна. Нош лыктыны, зэмзэ но, дырыз ӧй вал, секытгес висисьёс доры вамыштӥз, луоз. Угось Ижын 1 педиатрлы нуналаз 25-30 ӧтёнъёс луо. Соин ик со ачиз чакла ни, кинлы тужгес кулэ юрттэт. Доразы ӧтисьёс луыку, педиатр лыктыны быгатэ 6 нунал ӵоже — сомында дыр сётӥське.

Нош пинал чидантэм висе ке, вань мукет служба — ӝог юрттэт сётӥсьёс. Таосты 3 учыре ӧтьыны кулэ: пиналлэн мугорыз зол ӟырдамын, эмъюм юыса но, температура уг ортчы. Пиналлэн мугорыз ӟырдамын, виштыосын шобырскемын. Нылпи трос ву юэ, но уг кызя.

Министрлэн шӧдонэз

Нылпи поликлиникаосын югдур капчи ӧвӧл, но сое тупатыны амалъёс тодэ, шӧдске, тазалыкез утёнъя министр Алексей Чуршин. Котрес ӝӧк сьӧрын со аслэсьтыз адӟонъёссэ вераз.

— Эмъясьёс, зэмен но, элькунамы уг тырмо, Россиен ӵошатыса, югдурмы укыр урод ӧвӧл ке но, — шуиз со. — Но экономикаын секыт югдур шоры учкытэк, медколледжъёсы туэ тросгес студентъёсты кутӥм. Ижысь медакадемиысь но студентъёслэн лыдзэс йылэтоно. Зэм, нырысь ик улӟытоно направлениосъя дышетонэз. Диплом басьтэмзы бере егитъёс кӧня ке арзэ одно мед ужалозы больницаын — соосты дышетонлы кун уксё кисьтэ ук!

Тазалыкез утёнъя министр эшшо вераз поликлиникаосы луэмезъя машинаос, педиатръёслы, терапевтъёслы нимысьтыз телефонъёс висъян сярысь. «Черодъёстэк поликлиника» проект но улонэ паськытгес пыӵалоз, пе. Нош со борды туэ эшшо одӥгез проект ватсаськоз, таиз регистратураос понна. Кытын ужзы валаса, ӟеч радъямын, соосты нимысьтыз коньдон премиосын шумпоттозы.

— Эмъясьёс больницае мед лыктозы но отчы мед кылёзы шуыса, ужан условиоссэс сяна, улон условиоссэс но умоятоно, — пусйиз тазалыкез утёнъя министр. — Кылем арын куд-огезлы служебной квартираос висъяны быгатӥм вал. Туэ соос дунтэк уз луэ, но капчиятэм кредитэн юрттом.

Быдэстыны чаклам ужпумъёс туж трос, соос умоятыны кулэ элькунамы эмъюрттэт сётонэз. Но югдурез валаны кулэ, пе, калык но. Анай-атайёс мед тодозы: нылпи поликлиникае ӝогак гинэ пыраны ноку уз пӧрмы. Пиналэз педиатрлы сяна, мукет специалистъёслы но одно возьматъяно, ваньзэ лэсьтоно лад-лад. Пиналлэн тазалыкез — шудон ӧвӧл, солы дырез жаляно ӧвӧл.

Элина Кумачёва

Туспуктӥз Александр Горбунов

Удмурт Дунне
By Удмурт Дунне 16 февраля, 2015 10:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<