Эн ӝожтӥськы — ӝут!

Удмурт Дунне
By Удмурт Дунне 11 февраля, 2015 12:09
Кенеше Кузебай Герд нимо премиез сётонъя комиссия

Кенеше Кузебай Герд нимо премиез сётонъя комиссия

Удмурт национальной премиосты сётонэ но кун кылъёс сярысь законэ воштонъёс, туэ арлы чаклано ужъёс но К. Гердлы сӥзем лыдӟонъёс — та ужпумъёсты эскеризы «Удмурт кенеш» огазеяськонлэн исполкомезлэн туэ ар понна нырысетӥ люкаськоназ.

Малы ум дунъяське дано удмуртъёсты?

Исполкомлэн ёзчиосыз нырысь ик эскеризы Э. Батуев нимо премия сётонэз. Арлы быдэ соин пусйисько тужгес усто журналистъёс. Премиез сётонъя комиссия аслэсьтыз мылкыдзэ вазенгес вераз ни вал. Соин быдэсак соглаш луиз «Удмурт Кенешлэн» исполкомез но. Озьы Э. Батуев нимо премиен туэ пусъемын «Удмурт дунне» газетлэн валтӥсь редакторез Зинаида Рябинина.

Нош К. Герд нимо премиез сётонъя комиссилэн кивалтӥсез Владимир Владыкин ивортӥз: тазэ бадӟым премиез соос сётыны чаклало «Удмурт дунне» газетлэн коллективезлы но Глазов ёросысь шаерчилы Геннадий Ложкинлы.

«Удмурт дунне» газетэз тодӥсьтэмез ӧвӧл. Со даур ӵоже ини удмуртъёсты югдытӥсь, тодон-валан, ивор сётӥсь издание луэ. Республикаямы сыӵе вашкала дырысен потӥсь но азинскись газет одӥг гинэ. Соин ик, Владимир Емельяновичлэн верамезъя, решение кутыны туж капчи вал. Мукетыз кандидат пумысен юанъёс кылдӥзы ик. Угось Глазов ёросын Геннадий Ложкинэз туж ӟеч тодо «Удмурт Кенеш» огазеяськонлэн ужаз пыриськемезъя, шаертодонлы сӥзем ужъёсызъя. Но оглом республикамылы солэн нимыз усьтымтэ. Озьы ке но, вань ужъёссэ, тыршемзэ но матэктӥсь 70 аръем юбилейзэ лыдэ басьтыса, чакламын вал К. Герд премиен сое но пусйыны. Нялтас вераса, «Удмурт Кенеш» огазеяськонлэн Глазовысь ёзэз валтӥсь премилы Ложкинэз кылем арын но ӵекытлӥз ни. Но соку пусъемын вал мукет адямиос. Туэ премиез сётонъя комиссия но, «Удмурт Кенешлэн» исполкомез но огкылысь луизы.

Удмурт калыклэн данъетъёсыз пӧлысь К. Герд нимо премия тужгес бадӟымез но даноез луэ. Нош кылем арын сое басьтонлы 2 кандидат гинэ ӵектэмын вал. Сыӵе дыръя вожвылъяськон, устоосыз пӧлысь устооссэ быръён уг пӧрмы ни. Ыше премилэн данэз. Та пумысен Владимир Владыкин сюлэмшугзэ вераз:

— Ми ӵектысалмы «Удмурт Кенешлэн» ёросъёсысь ёзъёсызлы умойгес ужаны, асьсэ адямиоссэс дэмланы. Сотэк зэмос быръён уг луы. Тодӥськоды-а, малы Россиын Нобель премилэн лауреатъёсыз, США-ен но мукет азинскем кунъёсын ӵошатыса, туж ӧжыт? Россиысь тодосчиос асьсэ адямиоссэс та премиез басьтонлы уг ӵекто, возьмало: ку ай соосты асьсэды ӵектозы. Удмуртъёс — сабырлы, шып улӥсь адямиос. Но асьсэ муртъёссэс бадӟым премилы ӵектон ласянь шаплыгес луоно.

Владимир Емельяновичен соглаш луизы «Удмурт Кенешлэн» кивалтӥсез Игорь Семёнов но, исполкомчиос но. Нош тодосчи Валентина Ившина дэмлаз:
— Оло, премиосты сётон положение воштонъёс пыртоно. Шуом, луэ озьы: одӥг аре премилы туж трос кандидатъёсты дэмлало, ваньзы туж дано, кужмо муртъёс. Валамон, пӧлысьтызы быръё тужгес пусйымонзэ. Кылемъёсыз вуоно арын вожвылъяськонэ уг пырисько ни. Вуэ 2-3 муртлы гинэ дэмлан. Таосыз, оло, кылем арынлэсь лябесьгес. Но премия сётӥське. Уг-а луы кылем арынлэсь кандидатураоссэ но выльысь учкыса потыны?

Та малпанэз Игорь Семёнов ӟечен лыдъяз.
— Туж шонер, — шуиз кивалтӥсь. — Но мынам эшшо одӥгзэ вераме потэ. Асьмеос куддыръя адямиез бумага пыр гинэ адӟиськом. Оло, ёросъёсысь кандидатъёс асьсэос но кенешамы лыктысалзы, соку соосты ӟечгес тодыны луысал.
Владимир Владыкин ватсаз на: удмурт премиосты басьтыны кандидатэз ёросысь огазеяськонъёс гинэ ӧвӧл, тодмо бадӟым адямиос но дэмланы мед быгатысалзы. Исполкомчиос тае умоен лыдъязы. Нош «Удмурт Кенешлэн» секретарез Елена Александрова тодэ вайытӥз: К. Герд нимо премиез басьтон вылысь адямиез котькыӵе огазеяськон дэмланы быгатэ. Со одно ик «Удмурт Кенешлэн» гинэ ёзъёсыз луыны кулэ ӧвӧл.

Нялтас вераса, исполкомын пыкылӥзы егитъёсты. Малы ке журналистика удысъя Э. Батуев нимо премиез басьтон понна кылем арын одӥг егит мурт но дэмламын ӧй вал. Нош та премиез сётыку, егитъёс нимысьтыз пусйисько. Озьы устоезлы егит гожъяськисьлы чаклам коньдон нокинлы сётэмын ӧвӧл. «Шунды» огазеяськонлэн кивалтӥсез Ольга Тронина, та югдурез лыдэ басьтом шуыса, оскытӥз.

Премиос пумысен вераськонэз йылпумъяса, Игорь Семёнов пусйиз на: бабоно ӧвӧл! Ум быгатӥське визьмо, дано адямиосмес ӝутыны, собере ӝожтӥськыса ветлӥськом…
Мылы потӥз ке, лэсьто, ӧз ке — уг…
Таӵе сӥялэс мылкыдын учко кун кылъёс сярысь закон шоры кивалтӥсьёс но огшоры адямиос. Соин ик законэ кемалась ини воштонъёс пыртоно вал. Та пумыен исполкомын лэчыт вераськон ӝутскиз. «Удмурт Кенешлэн» тӧроез Игорь Семёнов верамъя, алиез закон вужмемын ни. Та пумысен Кун Кенеше, пе, кӧня ке пол вазиськылӥм, уж ӧз вырӟы. Но тэк пукыны уг ни яра! Соин вице-президентлы Валерий Хохряковлы куремын вал законэ воштонъёсты дасяны. Озьы кылдӥз «Удмурт Республикаысь кун кылъёс но Удмурт Республикаысь мукет калыкъёслэн кылъёссы сярысь» законэ воштонъёс пыртонъя законлы проект. Валамон, Валерий Павлович огназ ӧз ужа, кенешонъёс мынӥзы Дышетонъя но наукая, Нациосын ужан политикая министерствоосын. Ёросъёсысь ӵектонъёс но вал.
Дэмламын али ужась законэ кӧня ке рос-прос воштонъёс пыртыны. Валерий Павлович пусйиз:
— 2001-тӥ арын кутэм законын трос текстъёс сыӵеесь вал: луэ тае улонэ пыӵатыны, луэ пыӵатытэк но. Нокин кылэз уз юа, уз пыкылы. Сыӵе 2 пӧртэм пуштросо чуръёс выль проектысь куштэмын.
Валерий Хохряков уг ваты, талы пумитъяськисьёс трос луозы. Тужгес но вань документациез (Тӧролэн но Правительстволэн администрациязы, Кун Кенешын) кык кылын нуон ласянь.

Мар пусйымонэз на выль законлэн проектаз? Удмурт шаерысь вань дышетскон заведениосын удмурт кылэз дышетыны дэмламын. Та борды выжон тупен-тупен, пе, луыны кулэ, Правительстволэн нимысьтыз чакламезъя. Быръёнъёс, референдумъёс дыръя вань бюллетеньёс удмурт но ӟуч кылъёсын печатламын мед луозы. Нош адями удмурт кылын вазиськиз ке шаерысьтымы властьлы, кун учреждение, кун предприятие, солы валэктон но анай кылыныз ик сётэмын луыны кулэ. Со сяна, адямилэн ужаз кулэ луэ ке удмурт но ӟуч кылъёсты тодон, соосты уже кутон, окладэз вӧзы 15 процентозь ватсаса коньдон тыроно. Проектын гожтэмын на: нылпиосты анай кыллы дышетон — анай-атайлэн граждан долгез.

Кылъёс сярысь законэ воштонъёс пыртонъя законын вань чылкак выль статья но. Син азе интыям вань ивортонъёс, реклама, соос шаермылэн бюджетысьтыз уксёен ке лэсьтэмын, 2 кылын луыны кулэ: удмуртэн но ӟучен.

Законэ дэмлам воштонъёсъя «кенешчиос» ӟырдыт вераськизы ке но, арня ӵоже малпаськоно кариськизы на. Нациосын ужан политикая министрлэн воштӥсез Павел Орлов шуиз:

— Туэ март толэзьлэн пумаз ми та законлэсь проектсэ Правительствое келяны кулэ ни.
Куд-ог «кенешчиос» дэмлало вал выль законэз вуоно исполкомозь эшшо сэрттыны-пертчыны, малпаськыны. Но Игорь Николаевич ӵогиз:
— Сокема нуйтыны уг яра!
«Кенешчиос» арня ӵоже малпаськыны кыл сётӥзы ке но, оглом та законэз умоен лыдъязы, огкылысь кутӥзы.
* * *
Исполкомлэн кенешаз мукет ужпумъёс но эскериськизы на. Таиз ар капчи уз луы, «кенешчиос» рос-прос ужаны дась.

Елена Миннигараева

Удмурт Дунне
By Удмурт Дунне 11 февраля, 2015 12:09
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<