Пӧзись сюлэм

Удмурт Дунне
By Удмурт Дунне 11 февраля, 2015 10:30
Геннадий Ложкин

Геннадий Ложкин

К. Герд нимо премия — шаертодонэн вырем понна

Геннадий Ложкин кивалтэ Глазовысь шаертодонъя клубен, Россиысь Журналистъёслэн огазеяськонзылэн ёзчиез луэ, Удмурт шаерлы сӥзем 200-лэсь трос ужъёслэн, 13 книгалэн авторзы, «Удмурт Кенеш» огазеяськонлэн Глазовысь ёзэзлэн правлениезлэн ёзчиез, Удмуртиысь культура удысысь дано ужась.

Та нуналъёсы Геннадий Михайловичлы сётэмын удмурт калыклэн валтӥсь данъетэз — К. Герд нимо премия.

— Геннадий Михайлович, биографиды паймытэ. Пенсие потытозяды, тӥ лэсьтӥськон удысын ужады, Удмуртилэн уйпалаз трос пӧртэм объектъёс пуктонэ пыриськиды. Нош шутэтскон дыр вуиз но — выйиды этнография, шаертодон дуннее, наукае. Кызьы озьы?

— Ваньмыз со пинал дырысен кутскиз ай. Вордӥськи Ува ёросысь Сюровай гуртын. Школаын дышетӥсьёсты ӝыны пельыным гинэ кылзӥсько вал. Туж яратылӥ, укно сьӧры учкыса, пукыны: уяло пилемъёс, туссы син куспын вошъяське. Огпол малпаськонэ уси: нош мар отын, пилемъёс сьӧрын? Озьы тунсыкъяськыны ӧдъяй астрономиен, туж трос книгаос лыдӟи. 2-тӥ классын дышетскыкум, 3 библиотекае гожтӥськи. Малы? Одӥг библиотекаын одӥг дырлы 3 книгалэсь трос ӧз сётъялэ.

Ӝыт 23 час бере муми косэ вал тылэз кысыны. Но мон ӵукнаозь лыдӟиськылӥ, шобрет улэ ватскыса, пичи фонарикен югдытыса. Йырам ӵемгес но ӵемгес поръяны кутскизы философия юанъёс: кин со адями? Малы та дуннеын улэ? Озьы философия, биология, анатомия наукаосты мургес дышетыны кутски. Микроскоп шедьтэме бере вань лулосъёсты матэгес эскери ни. Часъёсын пукылӥ, кузьылиосты чакласа. Песянае сямен, эмъяськон турынъёсты октыны кутски.

Армиын пӧртэм калыкъёслэсь кылъёссэс дышетӥ: бигер, венгер, молдаван, грузин. Нош 1973-тӥ арын улыны выжи Глазове. Татын ини городлэн историеныз тунсыкъяськыны кутски, пересьёслэсь трос юалляськи, уйпал удмуртъёслэсь улон-вылонзэс, вашкала каръёссэс эскерыны ӧдъяй. Бичам материалэ печатласькиз интыысь газетъёсын. Глазов ёрос библиотека ас котыраз люказ шаертодонэн вырись адямиосты. Отчы вуи гинэ, соку ик шаертодонъя клублэн кивалтӥсез каризы. 17 ар ӵоже кивалтӥсько ни.Без имени-2

— Кызьы радъяське клублэн ужез?

— Сентябрь-май ӵоже толэзьлы быдэ пумиськылӥськом. Гужем экспедициосы потаськом. Клубамы 50 пала адями пыре. Кусып возиськом шаерысьтымы тодмо тодосчиосын Михаил Атамановен, Семён Виноградовен, Альберт Разинэн, Маргарита Ивановаен но мукетъёсынызы.

Гужем но сӥзьыл вуылӥськом ёросъёсысь музейёсы, библиотекаосы, фермеръёс доры, гуртъёсы. Экспедициосын кӧня ке пол ортчылӥм ни Удмуртиысь 8 уйпал ёросъёстӥ. Туэ чакласьком Дэбесэ, Тыловае, Яр ёросысь Сосновкае вуылыны. Потамы ни Малмыже, Елабугае, Кирове, Киров улосысь Афанасьевое, Кудымкаре, Перме, Чайковский, Воткинск, Сарапул, Ижевск, Казань городъёсы, Башкортостанысь Татышлы ёросэ.

Клубамы ортчись котькуд пумиськон кыӵе ке темалы сӥземын. Тани февраль пумын вераськомы Николай Первухин этнограф сярысь. Со ӟуч адями, выжыезъя Москва палась, ӟуч кыллы дышетӥсь вал. Но 19 даурлэн пумаз кӧня со эскериз уйпал удмуртъёслэсь улон-вылонзэс! Уробоен котыртӥз Глазов уездысь гуртъёсты, 5 сюрслэсь трос экспонат бичаз! Глазов уездысь вашкала 64 карез (городищеез) но 84 поселенилэсь бервылъёссэ шедьтӥз, 157 могильникез. Бадӟым люкетсэ ачиз ик эскериз. Вань та ужъёсты лэсьтон азьын со дышетӥз удмурт кылэз! Нош асьмелэн, быдэс улонзэс удмуртъёсын артэ улыса, куд-огез пал кыл но удмурт сямен вазьыны уг быгаты, интыысь калыклэн улон сюресэныз, культураеныз уг тунсыкъяськы.

Без имени-1

— Нош малы тӥляд книгаосты ваньмыз ӟуч сямен гожтэмын?

— Талэн кӧня ке мугез. Нырысь ик, вань ужъёсме аслаз чидась киосыныз компьютерен бича Антонина Николаевна кузпалы. Со ӟуч. Соин ик удмурт кылын гожтэм текстъёсын ужаны солы туж секыт. Но кузпалытэк мон одӥг книга но ӧй поттысал! Кыкетӥез муг — уйпал удмуртъёс, соослэн улон интызы, историзы сярысь тросгес адямиос тодыны мед быгатозы, ӟучъёс но, ӟучомем удмуртъёс но.

Школаын дышетскыкум, собраниосын мумы-бубыме визьмало вал: вераське пиналэныды ӟуч сямен, сотэк со улонлэсь бере кылёз, шуген дышетскоз. Озьы монэ быдэсак ӟуч карыны выризы. Но анай кылме мон ӧй вунэты. Бӧрысь ини, уно аръёс ӵоже ӟуч городын улыса, ужын но дорын удмурт кылэз кылытэк, ӟучомыны кутски. Но та сярысь ӧй малпаськылы. 1980-тӥ аръёслэн пумазы этнографиен тунсыкъяськыны кутски, Глазов город вӧзысь ик Cыга гуртэ мынӥ, пересьёслэсь юалляськыны. Пыри одӥгез доры. 80 ареслэсь ортчем песянай ӟуч сямен воксё уг вераськы вылэм. Нош мон удмурт сямен юалляськыны вырисько но, уг пӧрмы ни. Озьы пукиськом, со ӟучсэ уг вала, мон — удмуртсэ. Сыӵе возьыт луиз! Та учыр бере анай кылме выльысь дышетыны кутски. Табере гуртъёсы экспедицие потӥсько ке, удмурт сямен гинэ вераськисько на.

— Мар сётэ тӥледлы «Удмурт Кенешлэн» ужаз пыриськемды?

— Астэ огъя удмурт калыкен ӵош луэмдэ шӧдон. Шумпотӥсько, маин ке юрттыны быгатӥсько ке. Аслам но луонлыкъёсы паськытгес луо кадь потэ.

— Туала вакытэ книга поттон уж капчи ӧвӧл, нош тӥляд ваньмыз сыӵе капчиен пӧрме кадь…

— Ой, озьы со адӟиське гинэ. Сюлэм шуг: ёросъёсысь шаерчиослы асьсэ ужъёссэс поттыны секыт. Соин ик мон аслам эскеронъёсы вӧзы соослэсь но ужъёссэс кутӥсько, чаклам ёрослы сӥзем бичет поттӥськом. Ужасько ӵемысь уйёсы. Книгаос поттӥсько пенсиеным. Спонсор шедьтыны али туж секыт луиз. Кылем арын ӝыны арзэ кышноелэн пенсиеныз гинэ улӥм, типография азьын пунэмъёсме тырыса быдтӥ. Ярам, семьяе монэ вала. Кузпалэным ӵош 2 ныл будэтӥм, 4 внуке вань.

— «Удмурт Кенешлэн» ужаз пыриськиськоды, экспедициосы потаськоды, уйёсы книгаос гожъяськоды, чагыр малпанъёслы дыр кыле на-а?

— Вань мынам сыӵе малпанэ! «Мы — пылинки Вселенной» книгаме поттоно вал. Отын 50 арлэсь кема утчаськемелы — «Малы адями улэ?» «Мар со улон?» — юанъёслы валэктон сётӥсько ни.

Елена Миннигараева

***

Со милям бур кимы!

Ёросысьтымы Геннадий Ложкин кадь адямиосты уд шедьты ни. Кылем арын солы 70 арес тырмиз ке но, со ялан мыло-кыдо, огдыре ик пќртэм ужпумъёсты сэрттыны-пертчыны, љутыны быгатћсь адями. Геннадий Михайлович сюлмаськемен, «Удмурт Кенешлэн» Глазовысь ёзэз юн кусып возе Красногорск, Кез, Балезино, Яр, Эгра, Юкаменск ёросъёсысь «кенешчиосын». 2013-тћ арысен эшъяським Вавож ёросэн.

Геннадий Ложкин трос лэсьтэ, вордћськем шаермы сярысь уногес адями мед тодоз шуыса. Со ик Глазов городлэсь вордћськем арзэ воштон пумысен сюлмаськиз. Угось вашкала бумагаосын, пе, нырысьсэ Глазов сярысь 1678-тӥ арын гожъямын ни. «Удмурт Кенешлэн» азьвыл кивалтћсеныз С. Бабинцевен џош соос уйпал шоркармылэн вордћськем арезъя юридической документъёс дасязы.

Тужгес пусйымон книгаосыз: «Триумф и трагедия В. К. Блюхера (Драгунова)», «Лесная юбитель», «Святогорье — земля обетованная», «Глазовская старина», «Живущие на холмах», «Чайки прилетают весной» но мукетъёсыз.

Нуналъёсыз часэн-часэн чакламын ке но, правленимылэн котькуд кенешаз пыриське. Огшоры уг пукы, котьку но маке тунсыкозэ дэмла. Та адями — зэмос энциклопедия! «Удмурт Кенешлэн» Глазовысь ёзэзлэн кивалтћсезлэн бур киыз. Солы луыса ми ум вунэтћське асьме удмурт калыкмылэсь историзэ. Сётэм кылзэ котьку быдэстэ. Туж-туж ужась удмурт!

Инесса Рябова,

«Удмурт Кенеш» огазеяськонлэн Глазовысь ёзэныз кивалтӥсь

Удмурт Дунне
By Удмурт Дунне 11 февраля, 2015 10:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<