Ӟеч ужын эшъёс пумен йыло

Удмурт Дунне
By Удмурт Дунне 9 февраля, 2015 14:06

Вань мылкыд карисьёсты ӧтиськомы редакциен ялэм «Ӟеч уж» акциез вӧлмытонэ. Со сӥземын ожысь но ужысь ветеранъёслы, ожысь нылпиослы юрттон, шуныт кылъёс веран, пӧртэм пумиськонъёс радъян ужъёслы.

Висьыны усем автормылэсь Юрий Шкляевлэсь ож вакытысь нылпиослы сӥзем «Бадьпуэз тудву уг чигты» книгазэ басьтыны мылкыд карисьёслы ваньмызлы ик тау карем потэ. Матысь дыре Юрий Егорович пусъёз 71 арес тырмонзэ.

Та нуналъёсы книгаослы редакцие вазиськизы Вавож ёросысь Выль Бия шор ёзо школаысь удмурт кылъя дышетӥсь, удмурт кылъя дышетӥсьёслэн ёрос методобъединениенызы кивалтӥсь Мария Дягелева но покчиосты дышетӥсь Вера Григорьева, Можга ёросысь Пычас гуртысь пенсионер Галина Шуватьева. Юбилеенымы ӟечкыланы вуылэм Эгра ёросысь Сэп гуртысь куноосмы, милемыз утялтэм, шулдыртэм сяна, Юрий Шкляевлы но юрттӥськыны мылкыд каризы.

***

«Ӟеч уж» акцимы борды итӥськыны мылкыд кариз элькунысьтымы кун зоопарк. Газетмылэн 100 ар тырмонэзлы сӥзем флешмобе но Удмурт кун университетысь библиотекаын радъям брейн-ринге вуылэм палэнысь куноосмес дунтэмен пыртӥзы но тодматӥзы зоопаркен. Пичи Пурга ёросысь Яган-Докья гуртысь арлыдоослэн «Буртчин» ансамбльзы таӵе кузьымлы туж шумпотӥз. Ог лыктэмен кытчы гинэ ӧм вуылэ, мае гинэ ӧм адӟе, пе.

Воргоронъёслэн соку ик тодматскемзы потэм тӧдьы гондыръёсын — пыӵалэд ӧвӧл ке но, астэ пӧйшурасен адӟем потэ, вылды. Песянайёс но пӧйшуръёс но тылобурдоос котыр огшоры учкон мылкыдын гинэ ӧз ветлэ. Пудо утёнэз валамзы, соос сярысь сюлмаськемзы соку ик шарае потӥз. Туж паймытэм вуын уясь моржлэн бадӟым мугорыз: кӧня кӧйыз люкаськысал, пе, солэн. Нош ӵӧжъёс но юсьёс шоры кема гинэ жальмаса учкиллям пичи азе интыямысь. Гужемзэ вӧл-вӧл уялозы шуыса тодэмзы бере буйгаллям ни. Обезьянъёс но мылкыдзэс шулдыртӥллям эшъёсмылэсь. Уката ик паймытэм сиськемзы. Емышъёсты кӧмзэ пала пала сиё, куд-ог адямиослы соослэн чылкытлыксылы дышетскыны кулэ ай, пе.

Арлыдоослы шуныт мылкыд кузьмамзы понна «Удмурт дунне» газетлэн редакциез но яган-докьяос тау каро зоопаркен кивалтӥсьлы Светлана Малышевалы.

Лия Малых

Удмурт Дунне
By Удмурт Дунне 9 февраля, 2015 14:06