«Удмурт дуннелэн» дуннеез паськыта

Удмурт Дунне
By Удмурт Дунне Февраль 9, 2015 10:22
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
10-6-10

Валтӥсь редактор Зинаида Рябинина

Трос аръёс ӵоже  нырысетӥ удмурт газетэн лыдъяськылӥз 1918-тӥ арын потэм «Гудыри».  2005-тӥ арын  «Удмурт дуннелэн» историез  шуак воштэмын вал.  Озьы 2015-тӥ арын удмурт газет пусъе 100 аръем юбилейзэ! Солэн ортчем сюресэз, туннэ нуналыз но вуоно даурлы малпанъёсыз сярысь кенешиськомы валтӥсь редакторен Зинаида РЯБИНИНАЕН.

— История черновикъёсты лыдэ  уг басьты кадь, но «Удмурт дунне» кызьы ке ваньзэс оскытыны быгатӥз аслаз «нырысетӥ» вордскон нуналэзлы, малы со кулэ вал?

— Ваньмылы  асьмелы  тодмо, кӧня «тӧдьы виштыос» аслаз историлэн историяз но… Бен, трос аръёс ӵоже  газетчиос асьсэлэн «атаенызы» лыдъяллязы «Гудыриез», но дырын-дырын юанъёс кылдылӥзы ик: удмурт газет  одӥг вал, малы солэсь  историзэ  одно лыдъяно большевикъёслэн  газетсы бордысен гинэ? «Войнаысь ивор» но кылдытэмын вал ук правительствоен. Соку малы вунӥз нырысетӥез газет? Та юан борды газетчиос  рос-прос ӝабырскизы  кылем даурысь 90-тӥ аръёсы.

Кун архивъёсын бугыръяськыса, трос документъёсты эскерыса, журналистъёс тодосчиосын огкылэ вуизы:  нырысетӥ  удмурт газетлэн  сюресэз ӵогемын «Войнаысь ивор» бордысен. Озьыен, 2015-тӥ  арын 4-тӥ феврале «Удмурт дунне» газетлы 100 ар тырме!

— Та вакыт ӵоже  газет 7 пол нимзэ вошъяз, пӧртэм городъёсын потӥз, соин трос редакторъёс кивалтӥзы…

— Со  бордын ик газетлэн аспӧртэмлыкез. Газет шоры  нырысь-валысь учкыса, дыртӥд-вуттӥд лыдӟыса, потэ, со одӥг нуналлы шуыса,  но мургес малпаськоно ке — ӵапак газет уте историмес, со  пыраклы гожтыса-пусйыса кельтэ сое, мар луэ улон-вылонын.

Нимез вошъян — со  вакытлэн куронэз. Кылсярысь,  али нокызьы но луыны уг быгаты «Удмурт коммуна», озьы ук? Но ас дырзылы удмурт газетлэн нимъёсыз туж тупамонэсь вал. Алиез но — «Удмурт дунне» — соку ик усьтэ солэсь  быдэс пуштроссэ.  Удмурт дунне — туж паськыт валан: нырысь ик со — асьме  шаер,   собере  — асьме адямилэн, удмуртлэн,  маин улэм-вылэмез, малпанэз, пуш дуннеез!

Кӧня редактор кивалтэмын газетэн та вакыт ӵоже, рос-прос вераны уг луы, ми шедьтӥм 29-сэ. Но куд-огез одӥг-кык номерез гинэ дасяса вуттэмын, кивалтэмын-а соос редакциен яке выпуск  понна гинэ кыл кутэмын, тодмо ӧвӧл. Куд-огезлэн туспуктэмъёссы но, личной делооссы но  архивъёсын ӧвӧл,  бугырес вакытъёсы  уго соос  асьсэос но чиптэм-чаптэм ышизы… Ваньзы соос удмурт газет понна  улонзэс сётӥзы, шуыны луоз.

— Совето вакытъёсы газетэз басьтӥсьёслэн лыдзы  25 сюрсозь вуылӥз. 20-тӥ даурлэн пумаз кутскем выльдӥськонъёс, экономикаын зурканъёс бӧрсьы та лыдпус  чутрак усиз. Югдурез тупатон вылысь пӧртэм амалъёс кутэмын кадь, но 100 аръем юбилейзэ  газет пумита 4 сюрс тиражен…

— Мӧзмыт югдур, но со озьы. Зэм, тиражъёсын сыӵе югдур котькытын котькинлэн. Йыр бордазы кырмисько ӟуч кылын потӥсь газетъёс но. Мар карыны паймыса,  сое дунтэк люкыло. Ми со калозь ӧм вуэ на.

Газет  зэмзэ но  туж зол улӥз совето вакытъёсы, малы ке шуоно коммунистъёс валало вал идеологилэсь  кужымзэ, солэсь дунзэ.   Калыкен ужанын  соос понна ивор вал одӥгез валтӥсез амал, инструмент, кызьы шуо али. Соин ик газетэз вӧлмытон понна йырыз висьылӥз  обкомлэн-райкомлэн. Косӥз партсекретарь  «Советской Удмуртилы» гожтӥськыны — иське, гожтӥськоно.  Озьы газет нокыӵе могӟетъёстэк вӧлмылӥз. Журналистъёс, али сямен лыдӟись утчаса, гуртъёстӥ ӧз кыстаське, соос лэсьтӥзы асьсэлэсь ужзэс —  гожъяськизы!

— Тодосчи  Людмила Христолюбова, нырысетӥ  удмурт газетъёслэсь  удмурт обществоын интызэс пусйыса,  огаз статьяяз  таӵе учырез  гожтэ: егит удмурт  кылбурчи  Ашальчи Оки, пе, туж паймемын вылэм, «Войнаысь иворез» адӟыса. Тросэзлы лыдӟисьёслы сямен солы  газетлэн пуштросэз сокем тунсыко  вылымтэ, Оки понна  тужгес паймымонэз но валтӥсез вылэм газетлэн анай кылын потэмез.  Туннэ маин паймытыны  быгатэ «Удмурт дунне» аслэсьтыз лыдӟисьсэ?

—  Туннэ  паймо  ни, дыр, анай кылын газет весь потэ на шуыса…

— Озьыен, ас вакытаз вань удмуртъёсты  огазеяны юрттэм газетлэн сяськаян вакытэз ортчиз? Мар азьланяз?

— Кин сое тодэ.  Тани кин  малпасал, шимес репрессиос, Быдӟым ож бере газет улэп кылёз но  азинскоз но ай шуыса!

Валамон, азьвыл кадь со ноку уз луы ни, но мынам нокызьы но оскеме уг поты  быронэзлы — потэ, со  форматсэ воштыса-а, мукет-а, но  калыклы кулэ мед луоз. Бумага вылын кема печатласьконэзлы оскон бадӟым ӧвӧл ни бен, но табере ваньмызлэн сямен луонлыкез вань  Интернетэ потыны. Огласянь, со  туж ӟеч — инвисъёс паськытало.  Зэм, со понна воштӥськоно лыдӟисьлы но,  газетэз дасясьёслы но. Асьме калык улоназ выль амалъёсты  туж мылпотытэк пыртэ.

Ужпум ведь газет поттӥсьёс бордын гинэ ӧвӧл. Ми вань сюлмысьтымы  быдэсъяськомы милемлы оскем ужез: калыклы  анай кылын ивор поттонэз. Но татын валтӥсез — анай кыл! Сое тодӥсьёслэн, лыдӟиськисьёслэн-вераськисьёслэн лыдзы бордысь потоз милям ӵуказе нуналмы. Соку янгыш уз луы ни дыг ужась почта но, подпискалы уксёзэ жалясь мурт  но — удмурт кылын иворлэн кулэлыкез быроз!  Нялтас вераса, со али но возиське патриотъёс вылын, угось туала вакытэ ӟуч кылэз тодӥсьтэмез ӧвӧл ни,  дышетскем муртлы  пӧртэмез ӧвӧл, кыӵе кылын со лыдӟиськоз.

— Россиысь фин-угор  дуннеын  удмуртъёслэн  газетсы  тужгес кужмоез лыдъяське. Ма, Россиысь фин-угор  журналистъёслэн ассоциацизы но кылдӥз «Удмурт дунне» кичӧлтэмъя. Кыӵе кусыпъёс возиськоды ӵыжы-выжыосынымы? Кин кинлэсь адӟем каре?

— Кусыпъёсмы, зэмзэ но, ӵыжы-выжыослэн, эшъёслэн  кадь. Ми ӵем пумиськылӥськомы, юрттыны тыршиськомы, ог-огмылэн ужаменымы тунсыкъяськиськомы — кинлэн ке маке тунсыкоез кылдэ ке, соку ик асэстыны выриськом. Со туж умой,  куке тынад малпанэд, кичӧлтонэд  палэнэ но вӧлме ке.  Жаляса верано, ми ум валаське ог-огмылэсь гожъяськеммес, соин та ласянь адӟем карыны шуг. Но «Удмурт дуннеез» асьме дорын но, палэнын но  котьку пусъё  тунсыко проектъёсты улонэ пыӵатэмез понна.

— Та ласянь зэм но паймоно кадь. Редакцилэн  ужез газет поттон,   малы тӥ выриськоды мукет ужъёсын?

— Ми сое мукет ужен ум лыдъяське. Туала вакытэ газет ас кожаз ӵакмоз. Калык пӧлы  ӧм ке потэ, милемыз  нокин уз тоды. Али  уго ивор утчаса бызьылӥсь адямиос ӧвӧл ни. Но ми лыдъяськом, удмурт газетын тыршисьёслэн ивор гожъянлэсь бадӟымгес ужзы — ми, 100 ар талэсь азьло  газетын ужам эшъёсмы сямен ик, калыке ӟечсэ вӧлмытыны кулэ. Вакыт нош ик куре удмуртлык борды ӝабырскыны. Вылласянь учконо ке, ваньмыз умой кадь. Но зэмос югдур чылкак мукет:  10 ар ӵоже 100 удмурт школа пытсаське, удмурт книгаосмес  тросгес потто эстонъёс,  удмурт  ужрадъёслы уксё висъяло финъёс, удмурт кино лэсьто полякъёс… Но со шоры учкытэк, вылӥысь гинэ возьматэк, асьмеос но  маке лэсьтыны кулэ ук. Туала арын  котькудӥз пичи удмурт  огазеяськон но пӧрме тунсыко кичӧлтонъёсты улонэ пыӵатон аспӧртэм интылы. Милемлы туж тросэз вералляло, газетлы луыса улонмы тупатскиз-воштӥськиз  шуыса.

Тани берло  3 ар ӵоже гинэ ми улонэ пыӵатӥмы  даслэсь трос социальной проектъёсты. Ваньмыз соос малпамын вал, гурт калыклэсь кулэяськонъёссэ лыдэ басьтыса. Кылсярысь, трос аръёс ӵоже ми, редакциын ужасьёс, бордамы эмчиосты, психологез, юристэз кутыса, гуртъёстӥ ветлӥм, калыкен пумиськылӥм. Со туж пайдаё уж кадь потэ милемлы, малы ке шуоно тросэзлэн гуртоослэн  ӧвӧл  луонлыксы  специалистъёс доры вазиськыны, нош татын — доразы ӝог юрттэт вуэм кадь… Нимысьтыз акциос радъяськомы арлыдоосты, гурт удысысь адямиосты данъян вылысь. Нош кӧня «палтуриос» асьсэлы кузпал шедьтӥзы газетлы луыса. Улӟытэмын газетлэн призэз понна куасэн бызьылонъя ӵошатсконъёс.  Газетамы ужало таза улонэз, спортэз гажась адямиос, соин ми миым кичӧлтонэн потӥм быдэс шаерысьтымы журналистъёс понна спартакиада радъяны, ар ӵоже отчы мыло-кыдо пыриськизы ваньмысьтыз сямен ёросъёсысь  иворчиос. Писпу мерттӥськомы, нылпи юртъёсысь пиналъёслы юрттӥськомы — ваньмыз со туж кулэ кадь потэ.

— Удмуртъёслэн газетсы кылдӥз  властьлэсь куронъёссэ  калык доры вуттон, югдытон понна.  Туннэ нуналлы  «Удмурт дуннелэн» учредительёсыз луо шаерысьтымы Кун Кенеш но Правительство. Соин валче куд-огезлэн  пыкылэмзы потэ, югдурез палдурес возьматӥськоды,  уд мытылӥське шуыса.

— Бен, «Удмурт дунне» кылдэмез дырысен  властьлэн газетэз луэ. Солы шумпотыны кулэ, малы ке шуоно кивалтэт ласянь юрттэт ке ӧй луысал, газет кемалась  бырысал ни, угось со  туж дуно усе.  Кӧня усьтӥськылӥзы-пытсаськылӥзы ни ӟуч кылын потӥсьёсыз но.

Мон пинал дырысеным лыдӟисько «Удмурт дуннеез», но асме палдурес адямиен  уг лыдъяськы. Со дыре ик уг луы вераны, властез котьку данъяса гинэ гожъяськом шуыса, котькыӵе  материалъёс луыло.  Журналистъёс ӵем сюрыло  «кык тылъёс»  вискы.  Вылаз ик, туала вакытэ адями быгатэ ни  бырйыны, мае солы лыдӟоно.

Туала  удмурт газет йырысеныз пыдозяз нылкышно тусо. Азьвыл но туала туспуктэмъёсты учкиськод но паймиськод: азьвыл ужало вылэм шальк-шальк пиосмуртъёс, табере — чиль-маль нылкышноос. Туала газет нылкышно визь пыр гинэ лэсьтэмын кадь уг поты-а?

— Бен, туала журналистикалэн сыӵе чебер тусыз! Удмурт газетлэн гинэ ӧвӧл, данакезлэн. Талы ваньмыз паймо, но, мон малпамъя,  ваньмыз туж огшоры:  эмансипация нылкышноосты пиосмуртэн оградэ  ӝутӥз, соос   кужмогес, визьмогес   луизы. Нылкышноос уг кышкало секыт ужлэсь, соос чидасесьгес.  Пиосмуртъёслэн адӟонзы туала вакытэ озьы ик капчи ӧвӧл — соос семьязэс утён вылысь тыршо тросгес коньдон поттыны, нош газетын ужаса, кин узырмиз ни?  Вылаз ик, табере творческой ужын тыршисьлэн данэз чик ӧвӧл, азьвыл со писательёсты-журналистъёсты Инмар чот  возизы. Туннэ нуналлы редакциямы одӥг гинэ гожъяськись воргорон на — соизлы но 78 арес! Ужа дышем сямызъя. Пинал пиос ӧтьыса но уг лыкто, соку ик бадӟым уждун куро.

Куддыр мон ачим но паймисько, кызьы ми  со быдӟа газетэз нылкышноос кожысь лэсьтӥськом! Но ӟечлыкез солэсь  лябгес ӧз луы, малпасько, малы ке шуоно туала арын  журналистъёс  пӧртэм удысъёсты валто, ялан тодон-валанзэс будэто. Одӥг пол  та пумысен лыдӟисьёс  пӧлын  юри  эскерон ортчытӥмы: материалъёслэсь авторъёссэс ӵушыса, текстэз лыдӟыны сётӥмы, тодэ, кин  гожтӥз шуыса. Куд-ог нылкышно  авторъёсмес  пиосмурт каризы.

Юбилей азьын мон олокыӵе но аръёсысь подшивкаосты бугыръяй, котькуд вакытэ тунсыко, визьмо авторъёс сюро, но туалаосыз чик но бездытэсь ӧвӧл, тросэз темаос  мургес но паськытгес эскерисько. Ми тодӥськомы, удмурт газетлэн редакцияз  котьку но ужазы калыкмылэн тужгес  визьмо нылъёсыз-пиосыз, тодӥськомы, кыӵе дано удмуртъёс  лыдӟо милемыз туннэ но, соин ик шӧдӥськомы асьмелэсь кыл кутонмес.

— Тани вуиз  2015-тӥ ар, 4-тӥ февраль. «Удмурт дуннелы» тырмиз даур. Ӵуказеяз султӥды но… Кытчы табере  мыноно?

— Кин  кытчы  — калыкен пумиськыны, ивор утчаны — выль номер дасяны! Огкылын вераса, азьлань — выляз даурамы!

Юбилеез пусъён — бен, со кыӵе ке йылпумъян лэсьтон,  но соин ӵош выль ужпумъёсты чаклан но. Туннэ  вераським ини  инвисъёсты паськытатон сярысь — ӝегатскытэк басьтӥськоно «Удмурт дунне» ивор портал лэсьтон борды. Али милям  ӟигармы уг тырмы ай сайтмес,  Интернетысь соцсетьёсысь  группаосмес гинэ но йӧскадь азинтыны.

Эшшо одӥг  бадӟым «сьӧлыко» малпанэ — «Удмурт дуннелэсь» дуннезэ паськытатон. Уг тодӥськы, шонер валалозы-а монэ, уз-а, но туннэ,  асьме пӧлын гинэ пӧзьыса, азинлык уд адӟы ни.  «Удмурт дунне»  бренд луыны кулэ. Мед тодозы сое  ӟучъёс но, кунсьӧръёс но. Али асьме понна гинэ гожъяськиськом пӧрме, нош потэ вылэм, удмурт дуннелэсь сюлмаськонъёссэ но шумпотонъёссэ ваньмыз мед тодозы.   Валамон, со понна кулэ кык кылын (оло нош куинен но) гожъяськыны, кык пол золгес тыршыны, кык поллы визьмогес луыны. Но асьмелэн егитъёсмы сыӵе етӥз будо!  Эсэпсэ валаса тыршид ке,  газет солэсь удмуртомоз гинэ. Учкелэ «Айкай»  яке «Брангурт  песянайёс» шоры — соосты вала  быдэс дунне, но со дыре ик соос луо тужгес удмурт ансамбльёс.

 

Елена Миннигараева

Елена Скворцова

 

«Удмурт дуннелэн» шыкысысьтыз туспуктэмъёс

10-6-11

Туспуктылэ Владимир Беломорских.

10-6-12

Геннадий Романов (бурысез) но Элина Кумачёва басьто интервью

10-6-8

Валентина Емельянова Гурт шудонъёсын

10-6-5

Журналист воштэ профессизэ. Елена Скворцова огдырлы кариськиз лэсьтиськись

10-6-3

Газетэз компьютерен лэсьто Денис Корнилов но Вера Штыкова

Удмурт Дунне
By Удмурт Дунне Февраль 9, 2015 10:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<