Пельнянь нунал

Удмурт Дунне
By Удмурт Дунне 11 февраля, 2015 08:46

01«Пельнянь нунал» фестиваль Ижын ортче 8-тӥ-14-тӥ феврале. Дуннеын та сиёнэз кызьы гинэ уг куто. Тодматон вылысь котькуд выжы калык та нуналъёсы аслаз амалъёсыныз мастер-класс ортчытъя.

Пичи Пурга ёросысь Брангуртысь песянайёс пӧраськыны быгатэмзэс 4-тӥ феврале шараязы ни. Пельнянь — со удмурт сиён. Ӵапак тае вань калыкъёслы тодазы уськытон вылысь ик песянайёс пӧраськизы. Ужзэс видеое гожтӥзы но Интернет но телевидение пыр вӧлмытыны малпало.

Туала арын лавкаосын пельнянь вузаськемен, удмурт сиёнлэн данэз быре кадь. Но Брангуртысь песянайёслэн коллективенызы кивалтӥсь Ольга Туктарева верамъя, арлыдоос малпало данзэ выльысь ӝутыны. Толалтэлы быдэ семьяос, нылпиос люкасько, пельнянь куто но сое пӧзьтыны нюлэскы мыно. Туэ но потазы ни. Аслад кутэмед — аслад ни, ческыт кошке!

Пӧртэм амалэн пельнянь кутыны но сиыны мылкыд карисьёслы та нуналъёсы луонлыкъёс усьтӥсько. Нациосын ужан политикая министерство ивортэмъя, фестиваль пӧраськыса гинэ уз ортчы. Шулдыръяськонъёс, ярмаркаос, концертъёс радъямын луозы. Нош 14-тӥ феврале Ижысь Шор площадьын пельнянез тужгес усто кутӥсь но сое тросгес сиись муртъёс куспын вормисез данъялозы.

Министр Лариса Буранова верамъя, таӵе фестивалез ортчытыны малпан кылдӥз вал 2009-тӥ арын ик. Туэ сое улонэ пыӵатыны луиз.

— Пельнянь — со семьяен огазеясь сиён. Эшшо ке — ческыт на. Туж потэ, фестиваль но шуныт мылкыдын мед ортчоз шуыса. Таӵе ужрадэз арлы быдэ ортчытъяны малпаськомы. «Удмуртия — пельняньлэн шаерез» брендэз юнматоно, — шуэ Лариса Буранова.

«Welton» ресторан мастер-класс ортчытӥз ни. Татысь шеф-повар Ильяс Муллахметов немец сямен пельнянь кутыны дышетӥз. Мукет кафеосын но ресторанъёсын 19-ен 21 часозь витё таӵе вакытэ:

— 10-тӥ феврале «Верандаын» кутозы удмурт пельнянь,

— 11-тӥ феврале «Чайхана Лэйлакын» пӧралозы узбек сиён,

— 12-тӥ феврале «Сабантуйын» бигеръёс пӧралозы мантызэс,

— 13-тӥ феврале «Восточная околицаын» возьмало армянъёс.

Тужгес пӧсь луыны кулэ 14-тӥ феврале — пӧртэм шӧмо но тусо пельняньёсты веръян. Ужрад кутскоз Шор площадьын 12 часын.

Елена Сараматова

Удмурт Дунне
By Удмурт Дунне 11 февраля, 2015 08:46