Малпаськыны быгатэм кулэ

Удмурт Дунне
By Удмурт Дунне 11 февраля, 2015 10:15
_DSC3614

Олимпиадае пыриськем нылпиос

Удмурт пиналъёслэн олимпиадазы

Кузебай Герд нимо гимназиын ортчиз удмурт кылъя но литературая элькун олимпиада. Вожвылъяськонэ 140 пала нылпиос пыриськизы, Удмуртиысь сяна, вуизы Башкортостанысь но Татарстанысь.

Жаляса верано, лыктыны быгатӥллямтэ Марий Элысь нылпиос, сюрес вылэ потыны транспорт сюрымтэен. Но соослэн но вожвылъяськонэ пыриськыны бадӟым мылкыдзы вал: удмурт кыл пор музъем вылын чузъяське!

Удмуртиысь ваньмысьтыз сямен ёросъёсысь нылпиос вуизы.

— Ми куноослы котьку шумпотӥськомы, трос калыкез пумитаны дышемын, — шуиз К. Герд нимо гимназилэн кивалтӥсез Анжелика Михеева. — Арлы быдэ дорамы ортче олимпиада но. Инты ваньзылы тырме. Туэ нимысьтыз дасямы компьютер класс — олимпиадаын со нырысьсэ кутӥське. Нылпиос, классъёслы сяна, эшшо группаослы люкемын: одӥгъёсыз удмурт кылъя, мукетъёсыз литературая визьзэс сыналозы, нимысьтыз группае висъямын анай кылын вераськисьтэм, но сое «Ӟеч-а, бур-а, удмурт кыл!» учебникъя дышетӥсьёс. Таяз тросгес шедемын городысь, ёрос центръёсысь нылпиос.

Олимпиадае лыктэм нылпиосты пумитам сяна, К. Герд нимо гимназиысь нылпиос асьсэос но арлы быдэ вожвылъяськонэ пырисько. Пӧлазы 9-тӥ классын дышетскись Маша Федотова но.

— Анае-атае выжызыя Кияса ёросысь луо, семьяямы удмурт вераськиськом, — шуэ со. — Но мон 5-тӥ — 6-тӥ классын дышетскыкум но, удмурт сямен вераськыны возьдаськисько на вал. Ачим анай кылме 1-тӥ классысен ик дышетӥсько ке но. Нош татӥяз визьмаськи, лэся. Табере туж данъяськисько, удмурт кылын эрико вераськыны пӧрмытӥсько шуыса. Милям гимназиямы, уката но бадӟым классъёсын дышетскисьёс, переменаос дыръя удмурт сямен шалтыр! верасько. Туж чебер кылӥське! Бадӟым тау карисько удмурт кылъя дышетӥселы Надежда Ивановна Демаковалы сомында тодон-валанзэ, мылкыдзэ милемлы сётэмез понна.

Дышетӥсез сяна, Маша Федотова понна, пе, олимпиада нуналэ туж висиз солэн анаез но. Толоназ нылзэ жаляны кутскем ни, вылэм: Маши, тырмоз книгаос сьӧрын пукыны, ӧжытак ке но шутэтскы. Нош Маша эшшо одӥг пол учкыса потэм на «Тӧл гурезез», «Гаянэз», «Камит Усмановез»…

***

Огеныз олимпиадае пыриськись пиналэн вераськисько, мукетызлэсь юалляськисько. Малпанэ кылдӥз: 4-тӥ феврале «Удмурт дунне» газетмы 100 аръем юбилеейзэ пусйиз. Нош удмурт кылэн но литератураен тунсыкъяськись нылпиос понна та одӥгез пӧсез нунал вылэм. Угось ӵуказеяз — олимпиада!

Удмурт кылъя но литературая олимпиадае пыриськем нылпиос

Удмурт кылъя но литературая олимпиадае пыриськем нылпиос

Ижысь ик 97 номеро школаысь 10-тӥ классын дышетскись Полина Любимова шуэ:

— Та нуналэ удмурт газет-журналъёсты учкылыса пуки. Тодӥсько вал: мон лыдӟиськисько, нош Шор площадьын со вакытэ «Удмурт дуннелэн» флешмобез ортче! Трос бугыръяськи на Интернетын, «Вуж Мултанэз» лыдӟи. Олимпиадалы дасяськыны туж юрттӥз дышетӥсе Вероника Андреевна Иванова.

Аслаз дышетскисеныз туж данъяське Балезино ёросысь Быдыпи школаысь удмурт кылъя но литературая дышетӥсь Елена Аполосовна Корепанова:

— 9-тӥ классын дышетскись Маша Лекомцевае олимпиадае пыриське. Туж визьмо, сабырлы нылаш, котькуд ужзэ йылаз-пумаз вуттыны быгатэ, косэмез уг возьма. Толон солы шуи ни вал: олимпиада азьын кӧня ке коть шутэтскы. Но шӧдӥсько, тэк ӧз пукы: лыдӟиськиз, гожъяськиз.

Сьӧлта ёросысь дышетӥсьёс но ушъяло асьсэлэсь пиналъёссэс! Соос Иже бадӟым автобусэн ик вуиллям, «командазы» пичи ӧй вал угось. Туэ отысь 8 нылъёс но пиос олимпиадае пыриськизы.

— Ёросысьтымы витяз школаын удмурт кылъя но литературая урокъёс нуисько, — шуэ анай кылъя дышетӥсьёслэн методобъединениенызы кивалтӥсь Людмила Борисовна Решетникова. — Ваньмаз ик ужало туж быгатӥсь, ужзэс гажась визьнодасьёс. Сьӧраз нылпиосты но кыскыны быгато. Олимпиадае арысь аре нылпиосмы пырисько. Тодон-валанъёссы лябесь ӧвӧл. Кылем арын Гобгурт школаысь Ирина Вострикова 5-тӥ интыын луиз вал. Туэ но, оскиськом, бере уз кыльы…

***

Кин туэ устоосыз пӧлы сюриз — али вераны уг луы на. Дышетонъя но наукая министерствоын оскытӥзы: нимъёсты шараяны луоз та арня ӵоже. Министерствоысь национальной образованиея секторысь валтӥсь специалист Надежда Ямаева пусйиз созэ гинэ: олимпиадаын юанъёс туж ик капчиесь ӧй вал. Тодэм-валамзэ сяна, нылпи возьматыны кулэ на малпаськыны быгатэмзэ но. Озьы-а, тазьы, но удмурт кылъя но литературая элькун олимпиадаын нылпиос арысь аре устоез тодон-валанъёссэс возьмато. Оском, туэ но пӧртэм уз луы.

Элина Кумачёва

Удмурт Дунне
By Удмурт Дунне 11 февраля, 2015 10:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<