Егитъёслы — паськыт сюрес

Удмурт Дунне
By Удмурт Дунне Февраль 9, 2015 09:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
3-6-3

Италмас лицейысь команда.

Газетэн ассэ герӟам адями, со, нырысь ик, йырзэ тӥясь адями. Соин ик газетлэсь 100 ар тырмонзэ визь сынан шудонтэк кызьы пусъёд!

Брейн-ринг ортчиз Удмурт кун университетысь библиотекаын. Отчы пыриськизы 4 командаос, котькудаз быдэн 6 адями: Италмас лицейысь, Кузебай Герд нимо гимназиысь пиналъёс, журналистикая факультетысь егитъёс но лыдӟисьёс. Вань юанъёс, валамон, «Удмурт дунне» газетэн герӟаськемын вал. Командаос, пус чӧлтыса, 2 группалы люкиськизы. Кык командалы сётӥськиз одӥг юан, кин чалякгес дась луэ, со ик валэктон сётэ. Финалэ потон понна командаослы 5 балл люкано луиз.

Нырысетӥ раундын нюръяськизы лыдӟисьёс но Кузебай Герд гимназиысь пиналъёс. Паймоно кадь, макем зол дасяськиллям лыдӟисьёс. Юан бӧрсьы юанлы шонер валэктон сёто. Гимназиын дышетскисьёслэн вормон понна тодон-валанъёссы но шаплы луэмзы ӧзгес тырмы. Тодысалмы ке, тӥляд сыӵе умой кузьымъёсты луозы шуыса, золгес дасяськысалмы, шуизы соос бӧрысь. Нош лыдӟисьёс, пе, та шудонлы, уйзэ изьытэк, дасяськиллям, газетлэсь быдэс историзэ лыдӟыса потӥллям.

Собере пумиськизы журналистикая факультетлэн но Италмас лицейлэн командаоссы. «Удмурт дуннелэсь» историзэ тодэм сяна, кулэ вал логикаез ужатыны. Юанъёс пӧртэмесь вал: визькылэз пумозяз вуттон, туспуктэмъёсты радызъя пуктон, материалъёслэсь газетэ потон арзэс тодон. Вал серемес но юанъёс. Италмас лицей финалэ потӥз.

Берпуметӥ этапын лыдӟисьёслэн но Италмас лицейлэн командаоссы пумиськизы. Таиз шудон пӧсь вал. Юанъёс но муресь, командаос но визьмоесь. Нюръяськисьёс огмында очко люкаса мынӥзы. Котькудӥзлэн, дыр, шудӥсьлэн, юанэз кылыкуз, сюлэмыз дырекъяз — кин чалякгес шонер валэктон шедьтоз.

Италмас лицей командаысь Женя Корепанова шудон бере блогаз мылкыдзэ кисьтӥз:

3-6-1

Лыдӟисьёслэн командазы

 

«Лыдӟисьёслэн командазы, мон малпамея, тужгес но зол. Мон паймисько, кытысь соос сомында тодо, сыӵе визьмоесь! Кызьы соосты вормом? Кыкетӥ инты но яралоз. Одӥг юан, кык, куинь… Ваньмыз вӧтын кадь. Шудонэз нуись шуэ: «Берпуметӥ юан. Мар со кышъет но мар со пась?» Валамон, пась — газетын пытсамтэ инты, нош кышъет — солы материал». Нош лыдӟисьёс та юанлы янгыш валэктон сётӥзы. Борис Баталов, лыдӟисьёслэн кивалтӥсьсы, берло йыр бордаз кутскиз на но, берло мар на. Шудон вань шудон — Италмас лицейёс вормисе потӥзы! А-а-а!!! Ми вормим! Кылӥськоды-а, ми вормим!

Но лыдӟисьёслэн командазы ӝоже ӧз усьы.

— Егитъёслы котькытын сюрес. Шумпотӥм, татын мӧйыез но, пиналэз но люкаськиз шуыса, — вера Пичи Пурга ёросысь Яган-Докьялась Людмила Посадова. — Таӵе нуналъёс кулэ ортчытъяны: визьмес сынамы, ог-огмес адӟимы. Зэмос праздник вал.

Тодэмды потэ, дыр, кыӵе бадӟым кузьымъёс басьтӥзы визь погъёс. Бадӟым торт но 100 сюрслы сертификат. Со кагазъя Италмас лицейысь команда «Удмурт дунне» газетэ реклама, ялон, ӟечкылан поттыны быгатоз.

Мария Векшина 

Туспуктӥз Александр Горбунов

Удмурт Дунне
By Удмурт Дунне Февраль 9, 2015 09:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<