Shoner Paul — шонер удмурт пияш

Удмурт Дунне
By Удмурт Дунне Ноябрь 10, 2014 15:43
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Паша Александров.

Утиське-а бигер шаерын удмурт культура?

Куке но синмаськи вал вотэсын Shoner Paul кырӟасьлэн «Сюрс cюрес» аспӧртэмлыко кырӟанэзлы. Отын шӧдӥськизы бигер удмуртъёслэн аспӧртэмлыко кылзы, туала крезьгур тулкым но мыным тодмотэм шӧм. Со вал Паша Александров. Соин пумиськыны шуд усиз, туэ Татарстанэ Урустамак гуртэ бигер удмуртъёслэн Герберазы ветлыкум.

— Паша, ойдо тодматском.

— Мон вордӥськи 1994-тӥ арын Татарстанысь Бавлы ёросысь Утор (Николашкино) гуртын. Пичи дырысен яратӥсько удмурт калык культураез. Фольклор сюрес вылэ султӥ, песянаелэн ансамбляз ветлыса. Нылпи сад гуртамы ӧй вал, соин мон песянаеным ӵош ветлӥ ансамбле. Нырысетӥзэ сцена вылэ потӥ 4 аресам. Школа бере нырысь мон Альметьевскын дирижёрлы дышетски. Но ар ортчыса, валай янгышамме, училищеысь кошки, Казаньысь консерваторие этнокрезьгуръя отделение пыри но удмурт культуралы асме быдэсак сӥзи.

— Анай-атаед пумит ӧй вал-а, тон крезьгур удысэ мынӥд шуыса?

— Мама но папа туж айбатэсь, соос котьку мыным юртто! Атае курутой, со монэ транс крезьгурен тодматӥз. Озьы «Сюрс сюрес» кырӟанам транс крезьгурез фолкен герӟай. Анае ветеринар. Со монэ укол пуктылыны,  пудоосты эмъяны дышетӥз. Куд-ог дыръя малпасько вал сварщике но мыныны, малы ке шуоно та уж уксё сётэ. Весь кырӟаса-эктыса уд ветлы ук. Но сварщик луон сярысь малпан озьы ик  кылиз. Уг быгатӥськы машинаен, мотоциклэн ветлыны, но велосипедэн ворттылӥсько.

— Нош Ижкаре удмуртъёс пӧлы лыктэмед уг поты-а вал?

— Мон малпасько вал, Иж туж удмурт город шуыса. Мон нырысьсэ татчы вуи «Воршуд» фестивале  — мынам малпанъёсы, урод штукатурка кадь, куашказы… Совето вакытысь город: завод, трубаос, одӥг адями но удмурт сямен уг вераськы!  Азям бадӟым цирк, ачим  уг валаськы, кудпала мыноно. Учкисько, сылэ горд-горд йырсиё  полицейской. Мон со доры лыктӥ но, гадь тырам шокчыса, удмурт сямен юасько: «Вералэ, пожалуйста, кытын татын филармония но кызьы отчы мыноно?» Нош со учкиз мон шоры но тул-тул удмурт акцентэн вазиз: «ГОвОрите по-русски, пОжалуйста!» Мон паймыса интыям усисько вал ни.  Собере мон солэсь юай ӟуч сямен, нош со сыӵе ик акцентэн мыным шуэ: «Дык у нас Одна филармОния в Ижевске, садись вОн на трОллебус да езжай». Мон соку валай: Ижевск пичи но удмурт кар ӧвӧл. Собере «Воршуд» фестивальын мон тодматски трос тунсыко адямиосын, адӟи тыметэз, стелаез, ярдурез, но куашкам штукатурка мынам йырам челепен-челепен лякиськиз.

— Татарстанын нош кызьы уло удмуртъёс?

— Туж вожъясько, Удмуртиын удмуртъёс валче уло шуыса. Милям тросэз ӟучомо, Удмуртиен герӟетмы алама: «Айкай» ансамбль 4 арлы огпол лыктэ, куд-ог вуылэ «Шулдыр ӝыт» ансамбль. Лыкто газетъёс, но соосты нокин уг басьты, малы ке шуоно лыдӟыны шуг, кыл мукетгес. Удмурт телевидение вань кадь, но со ми дорозь уг вуы, угось кабельын но, спутникын но солэн тулкымъёсыз ӧвӧл. Но ми улӥськом. Бигер удмуртъёс дышемын ни ас музъемзылы. Азьвыл пиналъёс кошко вал Иже дышетскыны — али шергес.

Бавлы удмурт ныл.

— Озьы ке но бигер удмуртъёс котькуд ар элькун Герберзэс ортчытъяло.

— Котькуд гуртын вань Йӧскалык культурая центр. Милям со Урустамакын. Кивалтӥсьмы туж шаб: уй но нунал бавлы удмуртъёс понна висе.  Ми, уторъёс, урустамакъёсын ӵош удмурт концертъёс, шулдыръяськонъёс лэсьтылӥськом.  Озьы ми малпамы вал удмурт культуралы сӥзем «Айкай» элькун фестиваль радъяны (Урустамак Айкай гурезь выжыын интыяськемын). Но властьёс со интые Гербер ортчытоно шуизы. Бавлы ёросысьтымы удмуртъёсыз Татарстанын дярато (ярато), шуо, ми туж шаплыесь. Удмурт шаерын улӥсьёс та ласянь туж востэмесь.

— Кызьы малпаськод, маин со герӟаськемын?

— Ми улӥськом кырын, Оренбург палан, соин милям менталитетмы нюлэс калыклэн кадь ӧвӧл, ми дӥсьтӥсесьгес. Милемыз гурезьёс вылӥе ӝутскыны дышетӥзы, кыр тӧлъёс эрико луыны косӥзы.  Нош тӥ уд дунъяське сое, марды тӥляд вань. Тӥляд удмурт культурадэс азинтыны луонлыкъёсты тросгес, нош тӥ шып пукиськоды. Тӥляд тросэз куашкамын. Али коть Удмуртиын калык дышиз ни, кызьы но озьы люкаськыса, ӵошен проектъёсты азинтыны, удмурт мультфильмъёслы уксё бичан сярысь верасько, кылсярысь.

 — Мар тыныд сётэ удмурт культураен вырон?

— Али валай, мон удмурт шуыса. Мон кулэ данъяськыны ас лулчеберетэным. Табере возьдаськытэк Казаньын анай-атаен удмурт сямен  вераськисько ни. Песянаеным ансамбле ветлыны кутскыкум, мон востэм, копак удмурт пияш вал, трос адями пӧлы сюрыса, калыклы пумен дыши. Монэ туж зол паймытӥз,  кызьы песянайёс кырӟало бавлы (икдур) удмуртъёслэсь вашкала кырӟанъёссэс. Али мон валасько, калык кырӟанъёс шедевръёс шуыса. Ачим кырӟанъёс гожъясько ни. Вотэсын Shoner Paul (песятаелэн кушем нимызъя) шуыса монэ тодо.

Шудӥсько домброен (балалайка), крезен, арганэн, пианиноен, шуланэн! Пыриськисько консерваториысь фольклорной ансамбле.

— Ансамбльды кыӵе калыкъёслэсь кырӟанъёссэ быдэстэ?

— Удмурт но, бигер но. Таяз арын фольклор экспедицие потамы, ёросысьтымы пор, нагабак, мордва кырӟанъёсты бичам. Али ми выль проектэн каръёстӥ ветлӥськом. Егит композитор Елена Анисимова малпаз Н. Гогольлэн произведениезъя «Ночь перед Рождеством»  опера. Кык ариосын со Ашальчи Окилэсь кылбуръёссэ кутӥз. Ачиз композитор удмурт ӧвӧл, но со вордӥськемын Ижкарын, соин, лэся, операын крезьгур удмурт шӧмо. Крезьгур критикъёс шуо вал, фолкез но операез огазеяны уг луы. Нош ми пӧрмытӥм. Саранскын, Йошкар-Олаын, Казаньын учкисьёс милемлы султыса чабизы.

Выжы калыкъёслэн «Евровидениязы» мыноз Павел Александров

— Мар выльзэ сётӥз опера?

— Та жанр огазея калык но туала крезьгуръёсты. Опера выль луонлыкъёс усьтэ  куараен шудон но актёр луон ласянь. Кылсярысь, татын мон чёртэз шудӥсько. Мон понна со выль образ.

— Нош гуртад бертӥськод ке, мар карыны яратӥськод?

Мыным кельше школае удмурт кылъя но литературая урокъёсы ветлыны. Урокын нылпиослы удмурт культура сярысь верасько. Нырысь соос серекъяло вал, удмурт культуралэн азьланез ӧвӧл шуыса. Нош мон тазьы кари: фольклор бере кутски мадьыны Дарали Лели, Иван Белослудцев, Богдан Анфиногенов, Таня Тихонова, тодмо блогеръёс, «Монами» сярысь… Соку соослэн синъёсазы тылгизьыос ӝуатскизы, асьсэос юалляськыны кутскизы.

— Табере соос дасесь тонэн ӵош удмурт культураез азинтыны?

— Дасесь. Малпанъёсам вань ни, кылсярысь, Оренбург сюрес дуре удмурт кылын указательёс пуктылыны. Сомында удмуртъёс ветло Соль-Илецке, уг но тодо, кытын ке но Урустамакын соос кадь ик удмуртъёс уло шуыса. Тани «Вераськиськом удмурт кылын» наклейкаос лякылом. Ӧдъясько тужгес но шаплы пиналъёсты «Шундыкар» лагере келяны.

Мария Векшина

Туспуктэмъёсыз Павел Александровлэн

Удмурт Дунне
By Удмурт Дунне Ноябрь 10, 2014 15:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<