Умой артист луэме потэ!

Удмурт Дунне
By Удмурт Дунне 24 октября, 2014 13:02
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Сканировать30013

В. Садовниковлэн «Тыло вӧсь» спектакляз (1938-тӥ ар) В. Гаврилов шудӥз Гириез, А. Шкляева — Дыдыез

УАССР-ысь дано артист В. Г. Гаврилов вордскем дырысен — 100 ар

Тазэ очеркме сӥземе потэ УАССР-ысь дано артистэн Василий Гаврилович Гавриловен герӟаськем тодэ ваёнъёсылы. Туэ 30-тӥ октябре пусйиськомы солэн вордскемез дырысен сю ар тырмонэз.

Быдӟым Отечественной война вылтӥ Удмурт театр выжтэмын вал Алнаш черкогуртэ, нош 1944-тӥ арлэн кутсконаз театрлы инты висъязы Можгаысь культурая юртын. Толзэ-тулыссэ артистъёс отын тыршизы, нош гужемзэ сценалы инты висъяськиз городысь паркын. Сое вакчияк «Можгаысь гужем театр» шуыса нималлязы. Кык бригадалы люкиськыса, артистъёс вуылӥзы пӧртэм гуртъёсы. Валамон, бадӟым спектакль пуктыны луонлык ӧй вал, соин ик калыклы возьматылӥзы одӥг актъем постановкаосты, пуктылӥзы концертъёс. Артистъёслэн улон инты ласянь югдурзы ушъямон ӧй вал: кыстаськоно луизы мурт сэрегъёстӥ. Кӧня ке дырлы шуыса соослы висъямын вал кык этажъем пу барак: отын артистъёс улӥзы-вылӥзы Можгаысь кошкытозязы. Гуртъёсы потакузы, векчи пиналъёссэс учкыны оскылӥзы тодмооссылы, ужлэсь ваньмись эшъёссылы. Та ласянь тужгес но секыт йӧтӥз Гавриловъёслэн семьязылы: Рудик пизылы 6 арес тырмиз, пичизэ — Толик пизэс — учкыны солы уд оскы на. Василий Гаврилович кузпалыныз Мария Васильевнаен (Маруся апай нимаськом вал сое) вазиськизы мынам анаелы: нылды, пе, мед учкысал пиналъёсмес. Мыным, 11 аресъем нылашлы, золгес чаклано луиз Толикез: кышкась но муртась вал со, ялан ки вылам лэйкатыса нуллӥ. Маруся апай монэ жалялляз но чиданы курылӥз, но мукет учкись шедьтыны солэн амалыз ӧй вал. Аръёс ортчыса но, со мыным котьку тау карыса вазиськылӥз. Толя будӥз, йӧно, чебер луиз, семья но кылдытӥз вал ини. Но соин адӟиськыны мыным ӧз кылдылы ни. Тодмоосы пыр тодӥ: секыт висьыса, со улонысь кошкем. Нош бадӟымез Рудик пизы табере Рудольф Васильевич Гаврилов — экономика наукаосъя доктор, улэ Москваын. Берло 20 ар ӵоже Удмуртие бертылэмез ӧвӧл ни солэн.

Туж шунытэсь но яркытэсь тодэ ваёнъёс кылизы со вакытысь артистъёс сярысь. Василий Гаврилович но солэн Мария Васильевна кузпалыз Удмурт театрысь артистъёс пӧлын кылдэм нырысетӥ династилы кутскон сётӥзы. Нош театр усьтӥськиз, кызьы тодӥськомы, Гаврилов вынъёс пӧлысь — Игнатий Гаврилов — кичӧлтэмъя.

Та выжыысь вынъёс вордскемын но кыдамын Можга палъёсысь Бадӟым Сибы гуртын. Отысь школаын ик тодон-валан люказы. Но та ласянь соослы удалтӥз, шуыны луоз: соосты нодъяз быдэс кунмылы тодмо луэм, Симбирск губерниысь вуэм егит дышетӥсь Вера Васильевна Толстая. Гожъяськыны, лыдӟиськыны дышетэм сяна, Вера Васильевна соослы пыӵатӥз улонлэсь чеберзэ валаны быгатонлык, дышетӥз калыкез гажаны но уродзэ ӟечезлэсь висъяны. Та йӧно но визьмо дышетӥсьлэн бурд улаз кыдам пиналъёс пӧлысь уноез бӧрысь луизы тодмо эмъясьёс, дышетӥсьёс, агрономъёс, пӧлазы вал военной офицеръёс но. Нош Игнатий Гавриловлы кылдэм кылбурчи, драматург, писатель, Удмурт театрез усьтӥсь луыны…

«Улон кузьдалаеныз ӧвӧл, пуштросэныз дунъяське», — таӵе кылъёс гожтыса кельтэм Вера Толстая Игнатий Гавриловлы сётэм туспуктэмезлэн мышпалаз. Сое ӝӧк вылысьтызы адӟыны кылдӥз Игнатий Гавриловичлэн Тамара нылыз доры куное вуылыкум.

…Игнатий агаезлэсь ӵектонзэ лыдэ басьтыса, Василий Гаврилович дышетскыны пыриз Валтӥсь Удмурт клуб бордын кылдытэм театральной курсъёсы. Кӧня ке дыр ортчыса, та курсъёслэсь кылдӥз театральной техникум. Отын кыдам-юнмам нырысетӥез выпуск «кисьмаз» 1933-тӥ арын. Егит артистъёсты шудыны ӧтчаллязы постановкаосы, концерт программаосы. Со арын ик 26-тӥ апреле ортчиз Н. Гогольлэн комедиезъя пуктэм «Ревизор» спектакльлэн премьераез. Ӟуч классикаысь произведениос пӧлысь таизъя пуктэмез театрлэн нырысетӥ бадӟым ужез луиз. Ӟучысь удмуртэ сое берыктӥз Игнатий Гаврилов, нош пуктӥз Москваын режиссёрлы дышетскем Кузьма Ложкин. Артистъёсын ужакуз, со уже кутӥз вань басьтэм тодон-валанъёссэ, удмурт сцена вылын пыӵатыны тыршиз К. Станиславскийлэн системаезлэсь куронъёссэ. Спектакльлэн, оло, тырмымтэосыз но вал, но Кузьма Ложкин тодэ ваёнъёсаз тазьы гожтӥз: «Шумпотымон: удмурт сцена вылын табере чузъяськыны быгато Гогольлэн но мукет классикъёслэн произведениоссы».

Василий Гаврилович шудӥз Добчинскийлэсь рользэ, нош Бобчинский героез возьматӥз Г. П. Овечкин. Со вакытысь критика пусйытэк ӧз кельты та спектакльлэсь учкисьёслэн сюлэмъёсазы лякиськемзэ.

30-тӥ аръёсы Василий Гаврилович трос пӧртэм рольёсты быдэстӥз. Таос пӧлын, кылсярысь, Н. Островскийлэн «Как закалялась сталь» («Кызьы андан кыдаз») романэзъя пуктэм спектакльын Павка Корчагинлэн ролез. Нош бӧрысьгес со Гиройлэсь рользэ шудӥз В. Садовниковлэн пьесаезъя но Н. Греховодовлэн гурезъя пуктэм крезьгуръя драмаын. Со туж быгатыса возьматӥз улонлы шумпотӥсь, пӧяськись Кайсылы пумит кылзэ вераны дӥсьтӥсь Гироез. Солэсь яратоно нылмуртсэ — Дыдыез — шудӥз РСФСР-ысь дано артист А. В. Шкляева: со тодэ ваёнъёсаз огпол гинэ ӧз пусйылы Дыдылэн образэзлэсь весяклы сюлэмаз пыӵамзэ. Василий Гавриловичен — Гироен — соос сцена вылысен возьматыны быгатӥз зэмос, шуг-секытъёслы сётскисьтэм, кужмо яратонэз.

Быдӟым ож кутскем бере уноез артистъёс кошкизы фронтэ. Резерве кылем артистъёс мобилизовать каремын вал пыӵал тӥрлык лэсьтонъя заводъёсы. Котькудӥзлы выль удыслы дышетсконо луиз. Но таиз кема ӧз кыстӥськы: 20-тӥ октябре 1942-тӥ арын УАССР-ысь Совнарком постановленизэ кутӥз: Удмурт театрлэсь ужзэ улӟытоно огдырлы висъям интыын — Алнаш черкогуртын, нош бӧрысь — Можга карын. Озьы секыт война аръёс шоры учкытэк, Удмурт театр ужзэ азинтӥз, пӧртэм интыосы вуылыса, калыклэсь мылкыдзэ бурдъяз. Пусйи вал ни: репертуаразы соку пыриз капчигес пуштросъем, одӥг актъем постановкаос.

1945-тӥ арын тулыспал Удмурт театр выльысь берытскиз Иже: соку ик пыриськиз быдэс кунысь калык театръёс куспын ортчись смотре. Удмурт артистъёс возьматӥзы кык ужзэс: М. Петровлэн «Вуж Мултан» романэзъя но К. Симоновлэн удмурт кылэ берыктэм «Ӟуч адямиос» пьесаезъя пуктэм спектакльёссэс. Соослы вылӥ дунъет сётэмын вал.

Василий Гаврилович «Ӟуч адямиос» спектакльын возьматӥз Глоба нимтулын фельдшерлэсь, патриотлэсь образзэ. Солэн героез эшъёссэ утён понна кулонлэсь ӧз кышка. Война аръёсы, улон секыт дыръя артистлэн геройзэ такем усьтыны быгатэмез творчествоын зэмос усьтон выллем луиз. «Русская душа» статьяяз Василий Гаврилов мылкыдзэ тазьы шараяз: «Мынам кемалась шудэме потэ вал ни Глоба кадь геройлэсь рользэ. Со кужмо, но со вие ик кепырась, юморез валась но кышкасьтэм: кулонэз пумитэ со вамыштэ кырӟанэн: «Соловей, соловей — пташечка, канареечка жалобно поёт». Мыным но шуд усиз та спектаклез ас синмыным адӟыны. Али кадь ик син азям пуксе Василий Гавриловлэн кырӟаса сцена вылысь кошкемез: «Эх раз, эх два, горе не беда». Солы макем кужмо кичабонъёс чузъяськизы соку… 1944-тӥ арын Можгаысь культурая юртын Михаил Петровлэн удмурт кылэ берыктэмезъя пуктэмын вал А. Н Островскийлэн «Бедность — не порок» пьесаез — «Начарлык — урод сям ӧвӧл». Пьесаын возьматэмын кык кужым: уродэз но умоез. Сюжетлэн шораз — кык вынъёс: узырлык сьӧры уйиськись купеч Гордей Торцов — одӥг вордэм нылзэ но ваньбурен воштыны, сое фабрикалэн мӧйы кузёезлы сётыны дась. Любим выныз лӥятэмъя гинэ, Гордей малпанзэ воштэ. Ӵапак Любимлэсь рользэ шудӥз Василий Гаврилов — со туж быгатыса возьматӥз лякыт мылкыдо, зэмлык понна нюръяськись Любимлэсь образзэ. А. Островскийлэн пьесаезъя пуктэм эшшо одӥг спектакльын шудӥз на Василий Гаврилович — «Без вины виноватые» (ӟуч кылын). Отын со быдэстӥз Шмагалэсь рользэ: капчи визьем, улонлэсь эсэпсэ валасьтэм геройлэсь образзэ туж оскымон возьматыны пӧрмытӥз.

1948-тӥ арын И. Гаврилов но Л. Перевощиков ужазы «Даниил Майоров» пьесазэс гожтон бордын. Со сӥземын вал драматурглы, ӵыжы-выжыосыныз быдтэм кылбурчилы Д. Майоровлы. Пьесаысь валтӥсь роль оскемын вал Василий Гавриловичлы: со мылысь-кыдысь басьтӥськиз зэмлыкез гажась кылбурчилэсь образзэ кылдытон борды. Но со вакытысь критика та пьесаез курланы кутскиз: зэмос улонлы, пе, со уг тупа. Авторъёс выльысь басьтӥськизы та пьесазэс выльдон, эшшо но мургес пуштросо карон борды. Озьы со сцена вылын пуктӥськиз ни выль нимын — «Поэтлэн куараез» «Голос поэта». Василий Гаврилов быгатӥз кылбурчилэсь образзэ котыр ласянь усьтыны — учкисьёс солэн шудэмез пыр удмурт кылбурчилы синмаськытэк ӧз кыле.

В. Г. Гавриловлэн тужгес но бадӟым, яркыт ролез — Пётр Блиновлэн романэзъя «Улэм потэ» спектакльысь Демилэн образэз. Сое сцена вылын пуктӥз бадӟым талантэн реждиссёр С. А. Гляттер. Со сокем яратӥз, лэся, удмурт калыкез — таиз шӧдӥськиз артистъёслэн шудэмзы вылын. Соос быгатӥзы та произведенилэсь валтӥсь нюжазэ усьтыны: улэм потэ зэмлык понна, шудо луон понна. В. Гаврилов туж зол возьматӥз героезлэсь будэмзэ, ӟеч пала воштӥськемзэ, чылкыт сямо луэмзэ. Со сокем «пыӵаз» ролез пушкы, калык со шоры Деми шоры кадь учкыны кутскиз. Озьы Василий Гавриловичлэн льӧль малпанэз быдэсмиз, угось ай 1935-тӥ арын Удмурт театрлэн 5 ар тырмонэзлы сӥзем книгаын со таӵе сӥзёнзэ пусъем вылэм: «Умой артист луэме потэ». 1945-тӥ арын сое пусйизы УАССР-ысь дано артист нимын.

В. Г. Гаврилов, сцена вылын шудэм сяна, литератураен но выриз: нылпиослы сӥзем веросъёс, повестьёс гожъяз. Кылсярысь, «Кык эшъёс», «Витьымтэ гожтэт», «Зарни бугоръёс». Нош 90-тӥ аръёсы ассэ эскериз драматург ласянь но: «Яратон уг пересьмы» пьесазэ, кӧня ке тупатъяса, сцена вылын пуктӥз режиссёр Леонид Романов. Та комедия сцена вылын возьматӥськиз 15 ар ӵоже. Василий Гаврилович Мария Васильевна кузпалыныз ӵош ог-огзэс валаса, кема улӥзы. Маруся апай травести амалъя тыршиз: кема дыр ӵоже шудӥз покчи нылъёслэсь но пиослэсь рольёссэс. Озьы Василий Гаврилов но, Игнатий агаез сямен ик, мур пытьы кельтӥз Удмурт театрез ӝутонын но азинтонын.

Анна Евсеева

Удмурт Дунне
By Удмурт Дунне 24 октября, 2014 13:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<