Ма сярысь кырӟа мынам Удмуртие

Удмурт Дунне
By Удмурт Дунне 24 октября, 2014 12:37
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Д. Чирковез ӟечкыла "Мынам Удмуртиысь" анай кылын  передачаос понна кыл кутӥсь С. Касаткин

Д. Чирковез ӟечкыла «Мынам Удмуртиысь» анай кылын передачаос понна кыл кутӥсь С. Касаткин

Карсашурысь «Тулкым» утӥз 70 сюрс манет

Кылем арнянуналэ Ижын куинетӥзэ ни ортчиз «Элькуновидение» ужрад. Пуштросэзъя но нимызъя «Евровиденилэсь» асэстэм малпан бадӟым удмурт проектлы пӧрмиз.

Кытын сюлмасько культура понна

«Элькуновидение» конкурслэн данэз арысь аре будэ, быдэс элькун тыр радио пыр чузъяськытэм сяна, табере усточиосты дунъяло йӧно коньдон премиен но — туэ «Мынам Удмуртие» компанилэн кичӧлтонэзлы дурбасьтӥзы Культурая но туризмъя министерство но «Удмурт Кенеш» огазеяськон.

3 ар талэсь азьло «Мынам Удмуртие» телерадикомпания та уж борды ас кожаз басьтӥськиз, шуыны луоз. Малы кулэ вал кадь телерадикомпаниын ужасьёслы мултэс сюлмаськон? Кызьы адӟем карод «Евровиденилэсь»?! Но ужпум ӧй вал «видение» кылдытон бордын гинэ. Радио усьтӥськем дырысен ини крезьгуро редакторъёс, режиссёръёс йыр бордазы кырмиськылӥзы: удмурт кырӟан культура уг азинскы! Эфирын ялан бергало одӥг авторъёс, озьыен, та ужез вырӟытоно. Быриллям шат асьме усточиос? Озьы ке, соосты вордоно, будэтоно, калыке поттоно!

Нырысетӥ араз конкурсэ пыриськиз 15 ёрос. Шӧдӥськиз, конкурс зэмзэ но ортче нырысьсэ: керӟегъяськизы отчы пыриськисьёс но, радъясьёс но. Куд-ог ёросъёс возьматӥзы: соос али ке но пуко 1970-тӥ аръёсын: со вакытъёсы быткомбинатъёсазы вурем атласлэсь лякиё дэремъёсын, 30 аръем баянъёсын, «дано лу, Родина» выллем кырӟанъёсын. Но соин ӵош чилектӥзы чебер номеръёс но яркыт нимъёс: Можгаысь «Вить Сергейёс», Глаз ёросысь Александр Леонтьев, Кезысь Иван Белослудцев…

Кыкетӥ араз нош ик вормиз Можга ёрос — Влад Андреев но Андрей Конышев.

Туэ конкурсэ пыриськиз 18 ёрос. Табере валаны луэ ини, кытын сюлмасько культура понна. Лымшор ёросъёсты сяна, пусйыны кулэ уйпалъёсты: арысь аре синмаськыто кезъёс, юкаменскъёс, дэбесъёс. Но шӧдӥське, кылэз тодонэн татын бадӟым шугъяськон: текстъёс яке ӟучысь берыктэмын, яке дыго-мого гожтэмын. Артистъёс вераськыны озьы ик курадӟо, зэм, кырӟало паймымон ӟеч.

Конкурсын устооссэ быръё вань ёросъёсысь оскем муртъёс, ваньмыз сямен соос — культураын ужасьёс. Озьы зэм но шонер, дыр, угось соос профессионал синмын адӟо, кыӵе луыны кулэ номер. Вылаз ик, йылпумъян лэсьтыкузы, дунъетъёссы оглом зол уг висъясько.

Визьмын учкон

Мон кырӟан искусстволэсь туж кыдёкын бере, сое сюлэмынгес гинэ дунъяллясько, мукет сямен вераса, яке яра, яке уг. Но та рад организаторъёс куризы номеръёсты визьмын учкыны — кырӟан текстъёсты дунъяны. Юрттӥсе басьтӥ трос удмурт кырӟанъёслэн кылъёссылэсь авторзэс Любовь Тихоноваез но артистэз, кырӟасез Геннадий Бекмановез, угось нырысь ик исполнитель шӧдыны кулэ кылбурлэсь кужымзэ: тупа-а со крезьгурлы но мукет. Концерт ӵоже сыӵе валанэ зэмаз.

Конкурс мынытозь, ми блокнотамы вакчияк пусйылӥм котькуд кырӟасья мылкыдмес. Тани мар пуксем мынамаз:

Ува ёрос. «Мынам шаере» кырӟан. «Шаере тон, мынам шаере, вань меда тынэсьтыд чеберез…» Ой, кытысь ке, кыӵе ке дауре мон тае кылылӥ ни.

Якшур-Бӧдья ёрос. «Улон — кырӟан». Текстэз визьмо, со дыре ик пычкиськытэк гожтэмын. Кыӵе ке малпаськытӥсь, мур крезьгур бордаз куриське, нош татын кыӵе ке лӧптылон мылкыд уртче.

Юкаменск. Чебер нылмурт. Ачиз кырӟан гожтыны йӧндырем. Не умой, не урод…

Алнаш. Куинь пиос. Соку ик «Вить Сергейёс» тодэ лыкто. Алнашъёс тыршо. Но тани чузъяське: «Чупа ни ӝоггес монэ… мон тонэ уг иса, ӟыгырто гинэ». Мда, вера вал, но зол куатаськозы, дыр…

Дэбес. Артемий Гаврилов. Быдэстэ Александр Корепановлэсь удмурт кылэ берыктэм кырӟанзэ. Чебер пияш, быгатонлыкъёсыз шӧдӥсько, но переводын ышемын текстлэн шорсюлмыз.

Дэри. О, таиз копак удмурт крезьгур, вольыт кыӵе! Ма, авторез — Трубачёв, вера Геннадий Бекманов. А, валамон соку. Но сое умойгес кылъёсызтэк кылзыны. Малызэ вератэк но валамон.

Шаркан. «Тулкым ансамбль»: кырӟась Надежда Максимова, арганчиос Евгений Перевощиков но Павел Кутергин. Чеберенызы, задоренызы соку ик палёмыто, ӟырдыт тулкым залэз басьтэ. Кыкетӥ Пудова, шыпырто мышкын. Нылашлэн тулкымъяськемез шӧдӥське, кесяськегес, копасько специалистъёс.

Кизнер. «Чебер шаер, чылкыт омыр сюлмам пыремын кыдёке…» Кылъёсыз керӟегъяськытэмен, крезьгурез, «сюлме кыдёке» пырытэк, тӧлӟе.

Балезино. Тунсыко дуэт. «Огез тӧдьы, огез пурысь» шуэм выллем. Шонергес ке, огез зӧк, мукетыз чиед — эстрадаын ужан понна туж тупамон амплуа, пиослы ӵектэм потэ кыӵе ке маскара номер быдэстыны, угось огшоры кырӟанэз соос асьсэлэн тусбуенызы сайяло…

Пичи Пурга. Удмурт воргорон кырӟан. Удмурт нылкышно кырӟанлэн «конкурентэз». Огзэ гожтӥз Любовь Тихонова, мукетсэ — солэн выныз Валерий Тихонов. Кырӟан далайгес чузъяське ни радио пыр, со тодмо луыны быгатоз, угось пиосмуртъёсты данъясь кырӟанъёс ӧвӧл, шуыны луоз. Зэм, крезьгурезъя со «Удмурт нылкышнолы» зол келя кадь…

Ижевск. Егит кырӟась, кылылэме ӧй вал, тодэ уг кыльы. «Ӟичыпилэн» авторез Дима Загребин но та учыре номырин юрттыны уг быгаты — крезьгурез суралске вань мукетъёсыныз.

Сюмси. «Родные напевы», пе, нимасько, удмурт нимоез ансамбльзы ӧвӧл, лэся. Но Алла Кузнецовалэн кылъёсызъя гожтэм кырӟанэз туж гажаса, туж вольыт быдэсто. Классика. Но зал возьма туалазэ…

Кияса. Текстлэн автореныз Юрий Атеевен тодмоесь бере, кылбурзэ кемалась лыдӟи ни. Номыр ӧвӧл кадь, ваньмыз интыяз: кылбурын вань мылкыдыз но, образэз но. Пукисько, возьмасько романс… Но егит нылаш, мылысь-кыдысь кесяськыса, кырӟа… люкиськон сярысь. Осконтэм. Крезьгур нокызьы но уг лякиськы кылъёс борды.

Вавож. Зылмыт-зылмыт жингрес вальс. Куараос но, кылъёс но чылк-чылк удмурт жильырто. Интыысь султыса, бергам потэ, сюлэм пачылме суро-пожо, огдыре борӟытӥсь но шумпоттӥсь мылкыдъёсын.

Можга. Вавожъёс бере — бездытгес.

Кез. Тужгес пиналэз участник — 11-тӥ классын дышетскись Роман Емельянов. Кырӟанын кӧня ке стильёс сурамын, рэпез но вань, но со удмурт шӧмо. Автор быгатэм эсэпсэ кутыны. Пинал усточи аслыз котыр ласянь синмаськытӥз.

Эграос кык номерен лыктэмын: посёлок но ёрос. Ас палаз кыскиз, конешно, Денис Чирков. Со гитараен быдэстӥз аслэсьтыз мур пуштросъем кырӟанзэ. Шӧдӥське бен удмурт кылэз ӟеч тодымтэез, но оглом солэсь эшшо но эшшо кылбуръёссэ лыдӟем потэ.

Ужрадэз ортчытӥсьёс куремъя, ми туннэ вераны ум быгатӥське на устоезлэсь кылбурлэсь авторзэ, сое шараялом 4-тӥ ноябре. Соку ик данъялозы устозэ крезьгурчиез но. Вормисьёсты пусъёзы быдэн 5 сюрс манет премиен. Нош туэ понна тужгес бадӟым премиез — 70 сюрс манет — басьтӥз ни Шаркан ёросысь «Тулкым» ансамбль, та коньдон кошкоз Карсашурысьтызы клубез азинтонэ. 50 сюрс манетлы узырмиз Эгралась «Нефтяник» культурая юрт (татын ужа кыкетӥ интые потэм Денис Чирков), 30 манетэн дунъямын удмурт воргоронэз данъясьёс — пичи пургаос. Но та ваньмыз ӧвӧл ай — 40 сюрс манетэн дунъямын луоз смс-куара сётонын вормись ёрос! Таӵе кузьым висъя «Удмурт Кенеш» огазеяськон. Соин ик ваньмыз потоз учкисьёслэн синмаськемзы бордысь. Асьтэлэсь синмаськемдэс верамды луоз «Мынам Удмуртие» телеканалын 4-тӥ ноябре «Элькуновидение» концерт бере. Мар бен, учкыса адӟом ни. Мед удалтоз устоезлы!

Гожтӥз Зинаида Рябинина

Туспуктӥз Владимир Беломорских

Удмурт Дунне
By Удмурт Дунне 24 октября, 2014 12:37