Сузьтӥськоно шунды дорозь!

Удмурт Дунне
By Удмурт Дунне 21 октября, 2014 13:24
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Елена Габовалэн творчествояз пичиос но бадӟымъёс, уйшор но лымшор

Комиысь Национальной библиотекалэн сайтысьтыз кӧня ке дасо гожъяськисьёс пӧлысь Елена Габоваез бырйи нылпи писатель луэмез понна. Удмуртиысь литератураын туала вакытэ озьы ниманы нокинэ.

Елена Габова (1952) гожъяське ӟуч кылын. Йылпумъямын ВГИК-лэсь сценарной факультетсэ. Улэмын Украинаын, Прибалтикаын, Шор Азиын, ужамын пӧртэм газетъёсын, телевидениын. 2006-тӥ арын пусъемын литературая В. Крапивин нимо калыккуспо премиен.

Е. Габова покчи классъёсын дышетскисьёслы гожъя вакчи веросъёс, бадӟым улонэ пырисьёслы ӵемгес — вакчи повестьёс. Малы ке потӥз, писатель пичиосты ӟечгес вала, подростокъёсты сярысь. Покчиосын со вераське вылтӥяськытэк, тодэмъяськытэк, асьмелэн, бадӟымъёслэн, шер озьы пӧрме. Кылсярысь, «Беглец» веросын 10 аресъем Аркашка школа коридоретӥ пери кадь бызьылон сяменыз дышетӥсез пыд йылысьтыз погыртэ. Кышномуртэ «скороен» нуо, но пияш уг тоды, дышетӥсь шуккиськемын гинэ шуыса, собыдӟа муртэ вии кожа но дорысьтыз пегӟе. Сое милиция дораз берыктэ. Пияш нош пегӟе — озьы кӧня ке пол. Дышетӥсь, Аркашка доры лыктыса, «мынам тыныд йыры кур ӧвӧл» шуэм бере гинэ пиёк школае мыныны уг кепыра ни. Огласянь, верослэн кутсконэз — серемес, но пияшлэн нодтэм луэмез но, анай-атайлэн пизэс валамтэзы но туж оскымон суредамын. Писатель акылес визь-кенешъёстэк, дышетытэк Аркашкалэн сюлэмаз сюрес возьматэ.

14 аресъемъёслэн калыклэсь пӧртэм луисьёсты зӥбыны, ваньмыныз оградэ султытыны выремзы возьматэмын «Не пускайте Рыжую на озеро» веросын. 9-тӥ классын дышетскисьёс горд йырсиё, тӧдьы чильпырась куо, чангес куараё, начар дӥсяськем Светалэсь юрдо, шуыны луоз — сокем нылаш огъя уллёлэсь висъяське тусыныз но, сямыныз но. Но ваньмыз умой йылпумъяське — Света операын кырӟась луэ, нош сое серекъясь эшъёсыз — кытын соос табере!

Е. Габовалэн веросъёсаз ӟеч адямиослы котьку удалтэ, уродъёсыз соослы келяло. Куд-ог учыръёсы талы оскыны шуг ке но — улонын озьы лапак уг луы. Кылсярысь, юри малпамын кадь потӥз «Я его терпеть не мог» повестьысь валтӥсь геройлэн — огшоры семьяын будӥсь Мишалэн — котыр ласянь адӟем карымон луэмез но солэн антиподэзлэн — Комков банкир пилэн — воксё адӟемпотостэм луэмез. Инмар ваньзэ адӟе но кулэезъя дунъя шуэм сямен, ассэ гинэ адями карись банкир пиез писатель повестьлэн пумаз быдтэ. Узыръёслэн пиналъёссылэсь пайдаез уз луы — таӵе малпанэ вуыны кулэ, вылды, пинал лыдӟись. Азьвылгес гожтэм произведениосаз Е. Габова геройёссэ умойёслы но уродъёслы сокем куаӵак ӧз люкылы.

Коми писатель бадӟымъёслы гожтэм ужъёсаз геройёсызлы дунъет уг сёты, пичиослы веросъёсаз сямен. Соин нылкышно образъёсыз — ӵапак соос луо валтӥсь геройёс — оскымонэсь пӧрмиллям. Ваньмыз героиняосыз шудтэмесь: соос ярато, но соосты уг ярато. Кезьыт Уйпалан улӥсьёслы потэ, шуныт зарезь дурын соосты вите шуд. Но тани шуныт ву гылтэ ини тол ӵоже ӟонгырам пыдъёссэс, вань малпанъёс быдэсмозы кадь ини… Но шудэз, вуэз сямен, омыртыны уг лу вылэм. Озьы «Только часочек у моря» повестьысь Таня шуныт шаеръёсын гинэ вала, Кирилл сое ноку уз яраты шуыса. «Аннушка» веросысь Аннаез нош ик пӧя куке но пегӟем но зарезь дурын шӧдтэк шорысь пумиськем картэз. «Шахтёрская вдова» веросысь Сандра, картэз кулыса, ӵуж луо вылын кылльылэмъёссэ вунэтэ. Кызьы уг луы сузьтӥськыны шунды, зарезь дорозь, озьы ик уг луы кожыны дышем улон кожысь.

Ольга Вахитова

Удмурт Дунне
By Удмурт Дунне 21 октября, 2014 13:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<