Шыпыт кылбур, эрико веросъёс

Удмурт Дунне
By Удмурт Дунне 21 октября, 2014 13:11
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Стефан Пермский но Пама сотник

Стефан Пермский но Пама сотник

Коми литературалэн азинскемез

Коми калыклэн нырысетӥ азбукаез кылдӥз 1372-тӥ арын. Сое герӟало югдытӥсьлэн но миссионерлэн Стефан Пермскийлэн нимыныз. Коми кылын нырысетӥ произведениос вордскизы, фольклор, ӟуч классика но черк литература вылэ пыкъяськыса.
Визьмо малпан — чебер кыл
Коми литературалы азинскыны сюресъёс возьматӥз тодосчи, нырысетӥ коми кылбурчи Иван Куратов (А. Гугов (1839-1875). Иван Алексеевич котыр ласянь визьмо вал, тунсыкъяськиз литератураен, искусствоен, философиен, политэкономиен, кылэз эскеронэн. Солэн кылбуръёсаз пӧлэстӥськыса кошко вал визьмо малпан но чебер кыл.
Коми литератураез азьлане валтӥз Михаил Лебедев (1877-1951). Одӥг ласянь, Михаил Николаевич тодмо луиз капчи, серемес но фантастика веросъёсыныз, мукет ласянь, со туж умой быгатылӥз коми калык мадёсъёсысь пыдло ватэм пуштроссэ кыре поттыны, лыдӟисез малпаськытыны.
XX даурлэн кутсконаз огез тужгес но тунсыко но лыдӟымон писатель вал Каллистрат Жаков (1866-1926). Философ но этнограф Каллистрат Фалалеевич ӟуч кылын очеркъёс гожъяз комиослэн, удмуртъёслэн, коми-пермякъёслэн, ӟучъёслэн улэм-вылэмзы сярысь. Лыдӟись яратӥз солэсь кылбуръёссэ, выжыкылъёссэ, кылбуръёссэ. Тужгес бадӟым произведениез — «Сквозь сторой жизни» — ачиз сярысь гожтэмын. Вератэк кельтыны уг луы «Биармия» поэмазэ, кудӥз гожтэмын эпос амалэн, литератураын со тужгес секыт жанр лыдъяське. Жаковлэн та произведениез кылдӥз XX даурлэн кутсконаз, фин фольклористлэсь Элиас Лённротлэсь «Калевалазэ» лыдӟемез бере. «Биармия» гожтэмын ӟуч кылын, XX даурлэн пумаз сое туж быгатыса коми кылэ берыктӥз тодмо кылбурчи Михаил Елькин. Туннэ шуыны луэ: поэма шедьтӥз аслэсьтыз лыдӟисьёссэ но туала коми калыклы вашкала ӵыжы-выжыосызлэсь улон-вылонзэс усьтӥз.
Зарни даур
Фин-угор литератураез эскерисьёс кылем даурысь 20-тӥ аръёсты коми литература понна воштӥськон вакытэн лыдъяло. Кылсярысь, мадьяр тодосчи Петер Домокош та пумысен гожтӥз: «Коми музъем вылын 1917-тӥ арын луэм революциез возьмазы уно писательёс но кылбурчиос…». Комиысь тодмо литературовед Вера Латышева та вакытэз «коми литературалэн зарни даурез» шуыса нимаз. 20-тӥ аръёсы азинскизы поэзия, проза, драматургия. Коми литературалэн зарни фондаз пыризы, кылсярысь, кылбурчи, драматург Виктор Савин (Виттор Небдинса), солэн сюлэсь уно кылбуръёсыз луизы кырӟанъёс. Соосты али но калык тодэ. Та кылбурчилэн кырӟанъёсыз пьесаосын-комедиосын коми калыклэсь сямзэ возьмато. Виктор Савин — коми кун театрез кылдытӥз.
Проза но поэзия удысъёсысь усточи вал Вениамин Чисталев (Тима Вень). Произведениосаз со данъяз крестьян муртэ. Огыр-бугыр улон шоры учкытэк, гурт калык быдэсъяз аслэсьтыз ужзэ — гыриз-кизиз, нянь будэтӥз, та сярысь ик гожъяз Тима Вень. В. Савин но В. Чисталев, уно мукет писательёс сямен ик, 1930-тӥ аръёсы юнме шорысь янгыше уськытыса, тушмон каремын вал. Пытсэт сьӧрын ик соос быризы.
Мукетызлы тодмо кылбурчилы но тодосчилы удалтӥз золгес. Кылысь кылэ берыктӥсь, финно-угровед, филология наукаосъя доктор Василий Лыткин 1933-тӥ арын озьы ик пытсэт сьӧрын келямын вал. Но 1956-тӥ арын сое шонере поттӥзы. Василий Ильич, фин-угор литератураез эскерем сяна, коми кылэ берыктӥз финъёслэсь, удмуртъёслэсь но мадьяръёслэсь лириказэс.
Пыд вылэ султон
Репрессиос но Быдӟым ож ортчем бере коми литература выльысен пыд йылаз султыны выриз. Адӟем карыны вал кинлэсь. Тодмо коми писательёслэсь мытэм сюрессэс азьланьтӥз нырысетӥ коми романлэн авторез Василий Юхнин (Луздор Вася (1907-1960). Солэсь «Алая лента» романзэ шуыны луэ чеберлыко этнографизм — вашкала сям-йылолъёс пыр дуннеез усьтон но выжыостэ тодон-гажан. Произведение нырысьсэ печатламын вал коми кылын «Ударник» журналын 1939-тӥ арын, нош 1941-тӥ арын потӥз нимаз книгаен. Собере 1955-тӥ арын (куд-ог воштонъёсын), 1981-тӥ но 2012-тӥ аръёсын. Та роман кельшиз ӟуч лыдӟисьёслы но. Нырысьсэ ӟуч кылын со потӥз «Советский писатель» издательствоын 1957-тӥ арын (15 сюрс тиражен), собере Комиысь книгапоттонниын 1968-тӥ арын (50 сюрс тиражен), 1974-тӥ арын «Современник» издательство романэз 100 сюрс экземплярен печатлаз.
60-тӥ-80-тӥ аръёсы лыдӟисьлы тодмо луо Геннадий Юшковлэн (1932-2009) книгаосыз. «Чугра» но «Бива» романъёсаз автор эскере адямилэсь аспӧртэмлыксэ, калыклэсь сямзэ. Та аръёсы литературае пыро выль геройёс — Ревекка, Виринея, Ардальон, соос возьмато, макем секытэн сётӥськиз коми адямиослы Уйпал шаеръёсын инкуазь узырлыкез поттыны кутскон. Нош 90-тӥ аръёслэн пумазы кылдэ Бияр — со Г. Юшковлэн «Бива» романысьтыз валтӥсь герой. Та произведениеныз писатель лыдӟисез вашкала дауръёсы вуттэ, куке коми калыкез кужмысь христиан осконэ выжтыны выризы. Биярлэн аслаз калыкезлэн Инмарезлы ик вӧсяськемез потэ вал. Выль осконлы пумитъяськыса но эрико луэмез потыса, Бияр ассэ ачиз быдтэ.
Анай кыллэн кужымез
Комиысь котькуд писательлэн творчествояз шӧдӥське инкуазез, музъемез но со вылын ужасез, улонысь кошкем ӵыжы-выжыосты гажан мылкыд. Та ласянь туж кужмо прозазы Иван Тороповлэн, Нина Куратовалэн, Егор Рочевлэн но нылпиослы гожъясь Елена Козловалэн.
Туала коми литературалэн одӥгез тодметэз — мудрон но аспӧртэм валтӥсь герой, со ассэ дышем сямен уг возьы, калыклэсь пӧртэм выре. Сыӵе адямиос пумисько Егор Рочевлэн «Быстрее оленя» но Алексей Поповлэн «Могила чуди» произведениосазы. Пусйыны кулэ, А. Поповлэсь пьесаоссэ Россиысь тросаз театръёсын пукто.
Александр Лужиковлэсь поэзизэ лыдӟыку, амалтэк тодэ лыктэ «Калевала» карел-фин эпос. Автор возьматэ калыклэн историысьтыз урод но возьыт палъёссэ: кышкась луон, вузаськон, ултӥян, осконэз ыштон. Таин валче тодам лыктэ «Шуӧм кывным муӧ усьӧ» («Верам кыл музъем вылэ усёз») кылбур. Татын вераськон мынэ анай кыллэн кужымез сярысь. Верам кыл му вылэ усёз, будоз, коми адямилэн киосыз сое кутсалозы, собере арлыдо коми кышномурт ыльнянь котоз но ӟег нянь пыжоз. Ӝӧк вылэ пуктоз но бырем ӵыжы-выжыоссэ буре ваёз, куно ӧтёз — котькинлы инты шедёз. Верам кыл но, дауръёс ортчыса но, коми адямилэн кияз мед вуоз. Та пумысен туж шонер вераз удмурт литературовед Василий Ванюшев: «Вашкала мадёсъёсысь батыръёс, дауръёс ортчыса, берытскозы калык пӧлы, адямиослы лул кужым вайыса»…
Мае мон лыдӟыны дэмласал туала коми литератураысь? Вылӥын верам авторъёсты сяна, тодматскыны ӵектысал Евгения Козловалэн шыпыт лирикаеныз, Владимир Тиминлэн приключениос сярысь прозаеныз, Галина Бутыревалэн рифмаосын эшъяськисьтэм поэзиеныз. Коми кылын потӥсь «Войвыв кодзув» («Уйпал кизили») но «Арт» (ӟуч но коми кылъёсын) журналъёсты кияды кутӥды ке, отысь котькудӥз лыдӟись аслыз кельшись произведение шедьтоз.
Шумпоттӥсь ивормы но вань, туэ гужем Комиын егит литераторъёслэн «Ы» журналзы потыны кутскиз («Йӧлӧга» газетлэн приложениез сямен).

Елена Остапова,
Сыктывкар кун университетысь фин-угор филологияя но анай кылэз дышетонъя кафедраысь доцент.

Удмурт Дунне
By Удмурт Дунне 21 октября, 2014 13:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<