Пичи дырысь малпан — фильмын

Удмурт Дунне
By Удмурт Дунне 20 октября, 2014 11:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

никитаЕгит удмурт режиссёр Никита Ильин тэк пуконэз уг тоды: ялан маке утчаське. «Двадцать первый день третьего месяца» фильменыз со куинетӥ инты басьтӥз Казаньын ортчем калыккуспо кинофестивальын.

— Вормисе потэмъёс радын луо шуыса, зэмзэ вераса, ӧй оскы: отчы пырисько угось, Россиысь гинэ ӧвӧл, кунгож сьӧрысь кужмо егит режиссёръёс, — вера Никита. — Та конкурс сярысь иворез Интернет пыр шедьтӥ но, китӥм нокин уз шуккы шуыса, ужме отчы ыстӥ. Жюрилы кельшем, лэся, фильме — куинетӥ интыез утӥ. Нырысетӥ интые потӥз Казаньысь режиссёр Асия Еспаева — «Мальчишки» уженыз, кыкетӥ интыез люкизы кык авторъёс: Франциысь режиссёр Тифани Чеплон «Нейл» фильменыз но Москваысь Екатерина Кожакина «Наследник» уженыз.
Никиталэн фильмез тужгес но устоен лыдъямын документальной фильмъёсъя номинациын. Со сяна, со утӥз Казаньысь благотворительностья фондъёслэсь кузьымзэс но. Вераны кулэ, кузьымъёссэ удмурт режиссёр ӧз басьты на: Казане соосты матысь дыре ӧтчалозы. Кинофестивале ваньзэ-ӧвӧлзэ келямын вал 200 пала фильм. Нош документальной киноосъя номинацие пыриськиз 5 фильм, ӵапак таос пӧлысь самой тунсыкоен но яркытэн лыдъямын Никита Ильинлэн ужез.
Малы сӥземын «Двадцать первый день третьего месяца» фильм? Никиталэн та диплом ужез вылэм: туэ со горд дипломен йылпумъяз Удмурт кун университетысь журналистикая факультетэз. Солэн ужез сӥземын Даун синдромен адямиослы. Фильмын куинь герой — Кезысь Оля, Ижысь Маша но Уфаысь Аня.
— Таӵе адямиослы сӥзем фильм пуктыны малпан лыктӥз ай пичи дыръям, — вера Никита. — Фильмысь Оля улэ милесьтым кыдёкын ик ӧвӧл. Мон со шоры весь учкисько вал: кызьы меда улэ та нылаш, ма сярысь малпаське, сое «нормальной» шуыны луоз-а? Бӧрысь та малпанэ йырысьтым тӧлӟиз. Журфакын диплом уж лэсьтон дыр вуиз но, Кезысь ульчаын шуак пумитай Оляез — со реабилитацияя центре мынэ вылэм. Тани ук диплом ужелы тема — пичи дырысьтым малпанэ! Нош Ижысь Машаен тодматски И. Пастухов нимо библиотекаын — со ветлэ вылэм отысь «Шундыё дунне» клубе. Нош Уфаысь Аня доры 3 нуналлы куное вуылӥ: соин тодматски благотворительностен вырись огазеяськон пыр. Озьы кино пуктонлы 6 толэзь кошкиз. Кино пуктыса, мон валай таӵе адямиослэсь кыӵезэс. Соос туж аспӧртэмлыкоесь, мур малпаськыны быгатӥсесь вылӥллям. Оля, кылсярысь, нокытчы учкытэк, вераны быгатоз вань тодмоосызлэсь телефон номеръёссэс но вордскем нуналъёссэс. Нош Аня дышетске скрипкаен шудыны. Соос туж ӟеч сюлэмо, буйгатыны быгатӥсь адямиос! Нош мон — сереме потэ — гитаралэсь сиоссэ кысканы гинэ но ӧй дышы.
Никита Ильинлэн фильменыз тодматскон ортчиз Ижысь Эшъяськон юртын. Учкисьёслы со туж кельшиз. Егит режиссёр пусъе: кинозалын вӧзам нылаш пукиз, нырзэ кысканы кутскиз. Учкисько но: бамъёстӥз синкылиос васько. Иське, фильм солэсь сюлэмзэ бугыртӥз. Иське, ужаме юнме ӧвӧл.
«Двадцать первый день третьего месяца» фильмлы крезьгур гожтӥз тодмо крезьгурчи, артист Анатолий Эркишев. Со сяна, съёмкаосы пыриськиз Нырысетӥ каналын ортчись «Минута славы» проектын финалэ потэм Егор Куприянов. Егит удмурт режиссёрлэсь та ужзэ адӟыны луонлык вань Интернетысь «Ютуб» сервисысь http://youtu.be/OIqa4fVGctQ адресъя.

 

Елена Тугашова

Удмурт Дунне
By Удмурт Дунне 20 октября, 2014 11:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<