Шудо дунне — Шундыкар

Удмурт Дунне
By Удмурт Дунне 28 августа, 2014 10:36
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

3 Мынам льӧль малпанэ быдэсмиз, вожатоен ке но, мон вуи «Шундыкаре».
Мыным туж удалтӥз отрядэным — крезь лэсьтӥсь, зарни, сабырлы, востэм, кылзиськись пиосыным. Соос вормизы Шундыкарысь валтӥсь вожвылъяськонэз — шедьтӥзы воршудлэсь ватоссэ. Огез пие вераз огонёкын: «Ми лагере сыӵе востэмесьлыктӥмы. Мынам малпанам ик ӧй вал вормомы шуыса». Ку мон адӟи, пиосы Шунды мумы сипелетэн шумпотыса дорам бызё шуыса, пыдъёсы кужымзэс ыштӥзы кадь. Соку мон валай: та 6 пиосы — Вадим, Матвей, Никита, Тимур, Никита, Гриша — мыным вынъёс кадь луизы. Тросэз шуо вал: «Пичи отряд, отын ӧжыт ченгешонъёс кылдо, соин ик ужзэс но чаляк лэсьто». Уг тодӥськы, ваньмыз адямилэсь потэ. Мынам отрядам азьмынӥсез ӧй вал, соин вань юанъёсты ӵошен сэрттылӥзы. Соос котькуд нуналлы шумпотӥзы.
Туж удалтӥз ӧнерчиен но. Вася Широбоков котькуд ужрадъёсы пыриськиз. Со бадӟым пример возьматӥз пиослы, туж сюлмаськиз отряд понна.
Мон малпамъя, ӧнерчисты вошъяно. 3 ар ветлӥзы — тырмоз. Котыр сомында тунсыко малпанъёсын, трос кужмын егитъёс. Нылпиос сярысь ке… Куд-огез лагере лыктэ 6-тӥ арзэ, немыр уг кары, ортче. Огез нылаш ымнырам ик шуиз:» «Туэ Шундыкар ӧз пӧрмы, мыным ӧз кельшы». Мукетъёсыз татчы трос пол вуылэм нылпиос веразы, Шундыкар зэмзэ но мукет ни но соослы кельше шуыса.
Вожатойёс туэ егитэсь вал. Соос лагере выль шӧм пыртӥзы, пиналъёслы выль эмоциос сётӥзы. Мон ӧй верасал, ваньмыз шекъёстэк ортчиз шуыса, но ми тыршим. Тыршим, пиосыз нылкышнолы дӥсян йылол мед быроз, Шундыкар дырен ӵош мед вамышъялоз шуыса. Мон туж жади: эмоционально но физически. Но со куанык жадён. Весь чабиськод, тэтчаськод, ньылон кеськытозь, отряд понна висьыса, черекъяськод, сюлмаськиськод отрядъёс мед эшъяськозы шуыса. Берпуметӥ нуналъёсаз пиналъёс асьсэос ини, косытэк но, ужрадъёс яке столовой азьын шудонъёс ортчытъязы.Со туж шумпотымон.
Трос ямсыз кылъёс но кылӥмы. Обезянъёс кадь гинэ, пе, сцена вылын тэтчаны быгатӥськом. Но Шундыкар туала культураен улӥсь пиналъёслы лэсьтӥське, кудъёссэ дышетоно но тодматоно туала крезьгуръёсын но эктонъёсын. Арлыдоос уг валало, шуо: «Шундыкар азьло кадь ӧвӧл ни». Мар, со весь одӥг интыяз сылыны, арысь аре одӥг кадь ортчыны кулэ?
Огез шуэ: «Со лагерьын, кытын мон ужай, озьы ӧй вал. Малы кулэ со ӟучомем вожатойёс, но кытын соослэн футболкаоссы?» Мон чик ӧй вала, кызьы ми солы ӟучомеммес возьматӥм. Нош эшшо ке лагерьёсты ог-огенызы ӵошатыны…
2 Татын нылпиос туж визьмоесь, шаплыесь но туалаесь. Мон, зэм но, пайми. Соос ярато Богдан Анфиногеновез но лӧптыса учко фольклор отрядлэсь концертсэ. Туала нылпи сыӵе ик кулэ луыны: вашкалаез гажась но туала культураен улӥсь.
Мон малпасько, таиз смена бере трос мар воштӥськоз шуыса. Мед. Весь одӥг интыын сылыса сисьмод.

Марина Сергеева

Удмурт Дунне
By Удмурт Дунне 28 августа, 2014 10:36