Мон чурыт пус — сыӵе роле

Удмурт Дунне
By Удмурт Дунне 20 августа, 2014 12:11
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

3-19-1Сергей Матвеевлэсь творчествозэ мон кызь ар пала ни, дыр, чакласько. 1994-тӥ арын мылкыдме но йырвизьме бугыртӥз солэн «Лул» кылбурез «Инмарлэн нимыз — эрик» бичетысь.

Али кадь ик тодӥсько на та книгаез лыдӟеме бере нырысь кылдэм малпанме: туж пӧсь но огдыре сайкыт поэзия. Сутӥсь пӧсь куазен юзмыт ошмес вуэн пыласькем кадь. Мугор гинэ ӧвӧл, сюлэм но юзыр-кезьыр луыса кошке. Малпай соку: кемалась таӵезэ ӧй лыдӟылы ни удмурт кылын.

Сыӵе матын вал асьмеос, сыӵе матын,
Йылӥз куараослэсь шыпыт пунэм гозы.
Ӧй йӧтскы мон – вождэ эн вайы, мылкыды,–
Чильтэр кышет пӧлы ватскем пельпумъёсы.
Тылпу шокчиз но акшанэ зымиз,
Сураськизы мугоръёсмы но пеймытэн.
Чильтэр кышет гинэ син шоръёсам кынмиз,
Аслаз тӧдьыеныз монэ со паймытэ…

Аръёс ортчыса, Сергей Матвеевлэн кылбуретэз сярысь малпанэ ӧз воштӥськы, юнмаз гинэ. 2011-тӥ арын потэм «Инсьӧр пӧртмаськонъёс» бичет (кылбурчилэн та 6-тӥез кылбур книгаез) выльысь шумпоттӥз тодмо кылсуредъёсын, пӧсь-кезьыт огыр-бугыр мылкыдъёсын, шӧдонъёсын-шудонъёсын. Зэмзэ вераса, Матвеевлэн лирической героез ялан «пылаське но вӧл-вӧл уя» асэныз кылдытэм «огнамо» улоназ. Та сярысь («Огнамо улон») нырысьсэ «Лул» сборниклы рецензияз 1994-тӥ арын гожтӥз вал Людмила Кутянова: туж шонер дунъет.
С. Матвеевлэн кылбуретэзлэн валтӥсь тодметэз – улонэн «шудӥсь, шузияськись» но ассэ мыскыллясь герой:

Мон Ъ (чурыт пус). Чурыт но – точка!
Йыринуллань ошем Кылчин.
Кин ке мыным шуэ кадь: ӧчкар!
Малпа, лэся: мыным капчи.
……
Мон Ъ (чурыт пус) – сыӵе роле со!
Мон ӝуасько сыӵе рольын…

Соин ӵош ик со ассэ ачиз гинэ яратӥсь герой. Со уг кышка лулсюлэмзэ вӧлак усьтыны, сьӧлыкъёссэ шараяны: одӥг инмарлы гинэ вӧсяське, нош инмарезлэн нимыз — эрик. Сыӵе героез дунъяны «эгоист» кыл тупагес. Со ачиз но тодэ со сярысь, нош ассэ ачиз шонере поттон понна быдэс философия кылдытэ: зэм, мон «сурон бам», но улон сыӵе кариз, угось «улон — чик жалясьтэм качы». Лирической герой, «огнамо улонэзлэн» тулкымъёсыз вылын лэйкаса, тазьыгес малпаське: улонэз валан понна кулон калэ вуоно, яратонэз шедьтон понна нырысь сое ыштоно, вордӥськем палъёсы берытскон понна нырысь отысь кошконо. Ваньзэ веръяно аслыд. Озьы ке но ваньмаз но кылбур бичетъёсын со ассэ «мон пыртос» шуэ. Кылбурчилэн героез ассэ пыртосэн лыдъя яратонэныз артэ но, атай юртаз но, быдэс улонын но.
Малы со сыӵе? С. Матвеевлэн лирической героез вордӥськемын гуртын, нош туннэ улэ карын (городын), со шӧдэ, выжыоссэ ыштэ ни шуыса, нош номыр лэсьтэмез уг луы. Со ноку но уз луы ни музъем гырись-кизись, со уг тоды ни калык кырӟанъёсты («Нош гуртам пытьые ни кӧсаз…»). Карез адӟемпотостэм каре ке но («Из квартира монэ кутыса, / Мыжыказ пачкатэ но шона…»), С. Матвеевлэн лирической героезлэн дореныз кусыпъёсыз но шугесь, секытэсь. Дор со понна ӧвӧл ни дунолык, со – бурмонтэм висён, огдырлы гинэ буйгатскон, малы ке шуоно, солэн ӧвӧл татын аслаз киыныз ӝутэм юртэз, семьяез, мерттэм писпуэз.

Эх, быриз ни, быриз ни калы! –
Ву усен яке нош пурысь ты.
…Огдырлы бертаса, дорысьтым
Кошкисько мон озьы кемалы.

С. Матвеевлэн кылбурет дуннеез – ХХ даурлэн пумысьтыз пыдулзэ ыштэм, пушласянь сӧриськем адямилэсь малпаськон ӧрзэ, ачиз шоры но дунне шоры учконзэ возьматись лирика. Мар сое, героез, бурмытыны быгатоз? Яратон («Из сюлэмы нош тэльмыре / Жалян куре но яратон…»), яке гожъяськон-кылбуран («Кылиз на сюлэм тон понна. Чылкыт бумага. Уйбыртон»), яке оген дуннеяз кошкылон:

Сюсьтыл ӝуаз ини – быре,
Укно сьӧрын вордске чукна.
Синучконын – одӥг суред:
Укно, сюсьтыл но – мон огнам…

Оген улонлэсь С. Матвеевлэн героез уг кышка, уг кӧбера, со сое вите но данъя («Ӟеч но бур тон, Улон! Нош ик мон одӥгнам…»). Та мылкыд вылын возиське солэн быдэс кылбуретэз.
Дуннеез утёз яратон!
Сергей Матвеевлэн синмаськымон но тунсыко яратон лирикаез. Та ласянь мон сое Ф. Васильевен, А. Белоноговен, Н. Байтеряковен одӥг радэ пуктысал (озьы ик дуннеысь трос мукет поэтъёсын, угось ачиз кылбурчи туж трос лыдӟиськись адями. Ӟуч кылбурчиос пӧлысь солэн интыез Лермонтов – Тютчев — Бунин радын. Но со сярысь нимысьтыз вераськон кулэ). Куддыръя малпасько: Матвеевлэн героез, В. Соловьёв кылбурчи но философ сямен, оске луоз: «Дуннеез утёз яратон» («Любовь спасет мир»).
Кылбуръёсысь ум адӟе нылкышнолэсь тусбуйзэ, выросъёссэ но куаразэ — соос Матвеевлэн героезлы кулэ ӧвӧл. Яратоно муртсэ со данъя но дунъя мукет мертэтъёсъя – чеберлык, чылкытлык но зӥбытлык ласянь. Со понна нылкышно котьку но пиосмуртлэсь йӧногес но вылӥынгес потэ.

Пилиськоз шори гранит изэд,
Чидатэк
Солэн чылкытэзлы…

яке
Ачид но тон татысь, асьме дауръёсысь,
Но чылкытгес бам вылысьтыд
синкылилэсь…

Тунсыко соиз но: Матвеевлэн яратон лирикаяз пумиськон мотив, азьло дышем сямъя, тулыс куазен, льӧмпу сяськаян вакытэн ӧвӧл ни герӟамын, яратон ӵемысь гомӟе гужем пумын яке сӥзьыл. Мукетыз тодмет: лирической герой яратоно муртэзлы туж огшоры «тон» шуыса вазиське. Азьло дышем «мусое, гажанэ» вазиськонъёслэсь куштиськон геройлэсь эриклыко луэмзэ возьматэ, кылбурез лыдӟисьлы матэгес каре.
Со дорозь удмурт кылэт ӧз берыктэ
Йылпумъяса, пусъеме потэ созэ но: Сергей Матвеев — усточи берыктӥсь но луэ. Удмурт кылэ со 200-лэсь ятыр кылбуръёсты ни берыктӥз (А. Пушкин, М. Лермонтов, В. Брюсов, И. Бунин, М. Цветаева, С. Есенин, мадьяр кылбурчиос но мукет авторъёс). Ӵемысь быръе яратон лирикаез, кудзэ со дорозь нокин но удмурт кылэ ӧз на берыкъя. Тани, шуом, И. Бунинлэсь туж чебер «Мы рядом шли, но на меня…» нимо кылбурзэ берыктӥз.
Мы рядом шли, но на меня
Уже взглянуть ты не решалась,
И в ветре мартовского дня
Пустая наша речь терялась.

Белели стужей облака
Сквозь сад, где падали капели,
Бледна была твоя щека
И, как цветы, глаза синели.

Уже полураскрытых уст
Я избегал касаться взглядом,
И был еще блаженно пуст
Тот дивный мир, где шли мы рядом.
28 сентября 1917

Артэ мынӥм, но мон пала
Ӧд дӥсьты ни учкылыны,
Март нуналлэн ыркыт тӧлаз
Ышылӥзы буш кылъёсмы.

Тӧдьы пилем пиштӥз кезьыт
Вайёс вылысь шапыкъёсын.
Туж кӧсытэсь вал бамъёсыд,
Нош синъёсыд – лыз тылъёсын.

Ӟубис луэм ымдуръёстэ
Ӧй йоттылы ни синъёсам,
Но туж чебер на вал дунне,
Кытын артэ ай вамышъям.

Кыкез но кылбур — яратон лирикаысь шедевр. Удмуртэз кылбур возьматэ кылмылэсь узырлыксэ, литературамылэсь бадӟымесь луонлыкъёссэ. Таӵе ӟеч берыктэм текстъёс одно ик удмурт кылэз но литератураез гажан мылкыд кельто.

В.Г. Пантелеева,
филологи наукаосъя кандидат

Удмурт Дунне
By Удмурт Дунне 20 августа, 2014 12:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<