Зарни букваосын тэркы

Удмурт Дунне
By Удмурт Дунне 28 августа, 2014 12:29
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кытчы интыясько егит режиссёръёс…

эск Максим Эскандеров — егит режиссёр. Москваысь культурая но искусствоосъя кун университетэз быдтӥз. Али «Гелиос» киностудиын нылпиослы визь-нод сётыса тырше.

-Мар бордысь потӥз киноез тунсыкъяськемды?

-Со школа вакытысен ик кутскиз… Пичи дыръям профессиональной спортэ кыстӥськисько вал. Азьланяз асме тодмо военноен адӟылӥ, дышетскыны пыроно кадь ВУЗ-эз мон тодӥсько вал. Но армие но монэ ӧз басьтэ… Та учыр улонысьтым ваньзэ сураз… Соку умой-умой малпаськоно луи, кытчы азьланяз вамыштоно. Мынам атае — Николай Эскандеров ачиз но режиссёр. Со туж пумитъяське вал та удысэ мынэмелы, котьку нуллӥз монэ сьӧраз пӧртэм ужрадъёсы. Мон пушысьтыз ик адӟыны быгатӥ съёмкаослэн вань пушсэ. Уно пол кылылӥ режиссёръёслэсь операторъёсты но, вань съёмочной группаез но жоб кылъёсын тышкамзэс, съемочной площадкаысь вань керетонъёсты, шуг-секытъёсты… Оломалы, ваньзэ тае адӟыса, кино удысэ ик вамыштӥ.

-Кытын киное нырысетӥ вамышъёстэс лэсьтӥды?

-Нырысетӥ тодон-валанъёсме мон басьтӥ «Ракурс» киностудиысь. Отын кино мон йырыным ик выйи: малпаськылыны кутски, кызьы мудронгес сценарий пӧрмытыны, чебергес суред пуктылыны. 10-тӥ классы дышетскыку, нырысетӥ уже пӧзиз — «На экране окна» игровой фильм. Та уж бордын кема курадӟи но Москвае, конкурсэ лэзёно малпай. Конкурсэ пыриськисьёс пӧлысь самой егитэз луи, соин пыриськем сярысь сертификат сяна номырез ӧй возьма. Макем зол пайми вормемме тодыса! Али ке но конкурсын утем зарни букваосын тэркы но бадӟым кино сярысь энциклопедия шоры данъяськыса учкисько!

-Иське, та вормон бурдъятӥз та удысэ ик вамыштыны?

-Та вормонэ мон понна ӵыжан кадь луиз. Соку ик аслым выль ужпум пуктӥ — Москваысь культурая но искусствоосъя кун университетэ пырыны. Малпанме быдэстӥ. Отысь режиссурая, киноя но телевидениея факультетэз бырйи. Одӥгез сярысь гинэ жалясько — заочной отделенияз гинэ пыри. Берло вожъяськыса учкылӥ на дневной отделениысь студентъёслэн дышетӥсьёссы, лэсьтэм ужъёссы шоры. Со дыре ачим киноосты учкылӥ, аслам малпанъёсыным улӥ. Кызь арескын усто режиссёр луыны туж секыт, вормонтэм ик! Ӟеч специалист луон понна улонэз котыр ласянь тодоно, валано. Мынам сыӵе валанэ ӧвӧл на, котькуд шӧдон сярысь рос-прос уг на тодӥськы.

эск1 -Кыӵе уже интыяськыны быгатэ егит режиссёр?
-Университетын дышетскыку ик тыршылӥ яратоно кино удысам ик ужаны. Котьку но озьы ӧз пӧрмылы. Кӧня ке дыр ӵоже мон «Мынам Удмуртие» телеканалын оператор луыса ужай. Должносте туж паймымон вал — ӧтёнъя оператор. Кытчы ке снимать карисьёс уг ке тырмо, монэ ӧтчазы вал. Уже ӧтемзэс дорын возьмаса пуки, со вие аслэсьтым ужъёсме но вуттылӥ. Каналын кӧня ке дыр ӵоже ужаса, валай, малы операторъёс уж дуразы куддыръя азьтэмъяськыны но вуо. Кызьы гинэ эн тыршы, вань ужамысьтыд куинь план но интервью сяна уз пуктэ. Творчестволы паськыт сюрес уг усьтӥськы… Талэсь азьвыл МЧС-ысь съёмочной группаысь оператор луыса ужай. Со вакытэ уйин но, нуназе но гань-гань улонэз ӧй тодылы. Уж дурысь жингырто, 5 минут дасяськонлы сёто… Потӥськод шудтэм учыръёсты снимать карыны. Отын ужаса кӧня ке пӧртэм роликъёс лэсьтыса вуи. МЧС-ын ужаменым туж данъяськисько Али со уже туж берытскеме потэ мукет специалист луыса, выжъёс тупатӥсько ни…

-Али нылпиосын ужаськоды. Та удысэ кызьы вуиды?
-Улонын пӧртэм учыръёс луо, соин МЧС-ысь но, телеканалысь но кошконо луиз. Али берытскеме чик уг поты. Ӝыны ар пала ужтэк ветлӥ. Курьерен но ужаны интыяськылӥ. Солань-талань пӧртэм документъёсты нуллӥ. Жаляса верано, курьеръёс трос уг басьто — операторъёслэсь но ӧжытгес (серекъя). Ижкарысь 97-тӥ школае мультимедиа технологиосын верысь ӧнерчи кулэ вал. Та уже интыяськыса, школаысь вань ужрадъёсты пуктылӥ но кружок нуи. Озьы кылдӥз мынам нырысетӥ киностудие. Солы пиналъёсын «Идея» ним понӥмы. Студие пыриськизы 7-тӥ-11-тӥ классъёсын дышетскисьёс. Ваньмыз 15-20 кузя пиналъёслэсь 4 группа луиз. Соосын ми ужаны, азинскыны, школалы вормонъёс вайылыны кутским. Школалэн кивалтӥсьёсыз отысь ужрадъёсты тросгес сниматьтылыны косӥзы. Нылпиосын сыӵе ик ӵем адӟиськыны ӧй ни быгатылы, ваньмыз соос полысь киностудиын 15-20 сяна ӧз кыле. Со школаын ик кылдӥз журналистикая кружок. Соосын тупаны мон ӧй быгаты, кошки.

-Соку ик Кузебай Герд нимо гимназие интыяськиды-а?
-Бен. Зэмзэ верано ке, отын нырысетӥез ужан ар секытгес сётӥськиз, нокыӵе пайда ӧз вайы. Соку 7-тӥ классъёсын медиатехнологии урокез нуыны кутски. Вуоно арын со борды ӧй ни басьтӥськылы, нимысьтыз киностудия кылдытыны малпай. Кузебай Герд нимо гимназиын кылдӥз «Гелиос» киностудия. Отысь пиналъёсын кема ум ке ужаське на, маин ушъяськыны вань ини. Тужгес бадӟым вормонмы — «Святая Анна» фестивале вуылэммы. Со туэ тулыс Москваын ортчиз. Отысь нокыӵе вормонъёсын, данъянъёсын ӧм ке но бертэ, та ми понна туж бадӟым вамыш вал. Бадӟым вожвылъяськонэ вуыса, нырысь ик улон интылы ёрмыса улӥм. Ярам ай, кышноелэн сузэрез милемыз пумитаны быгатӥз. «Святая Анна» конкурсэ ми сяна пыриськизы тодмо киновузъёсысь студентъёс. Милям «Подарок» фильммы качествоезъя зол висъяськиз, соин вормонъёстэк бертӥм. Со понна студиысьтымы пиос кино удысысь бадӟым ӧнерчиосты — Никита Сергеевич Михалковеч, Александр Наумович Миттаез адӟизы.

эс -Студияды пиналъёсты кызьы бырйиды?
-Ужаме потэ мылкыд карисьёсын гинэ, нокинэ кужмысь уг возиськы, юри уг ӧтиськы. Пиналъёсын каньылгес вырыны, куке соос мылзы потыса уж борды басьтӥсько. Соку вормонъёс кылдо! Куд-огез али но, гужем вакытэ гожъяло: «Ку пумиськом? Ку кутскозы съемкаосмы?». Вань пиналъёсын туж умой кылмы тупаз. Соос ялан монэ «тон» шуыны туртто, эш каро. Жаляса верано, гужем вакытэ туж секыт люкаськыны. Озьы ке но, али МЧС-лы но пичи роликъёсты дасяса вуттӥм! ВГТРК-ен одӥг радэ султыса табере ужалом. Конкурсъёсы но фестивальёсы пыриськыса, валаськом кадрмылэн ӟечлыкез чутэ шуыса. Соин оло куд-ог вормонъёсты но кутэммы уг луы на. Укыр дуно усе ӟеч техникаен ужаны. Али юрттӥськисьёсмы но кылдо. Одӥгез — Красногорскысь Зверев нимо завод. Соос али ке но лэсьто на Россиысь самой тодмо «Зенит» объективъёсты. Коньдон ласянь юрттэт утчаку, соослы но гожтэт лэзи. Соку ик дорамы вуизы выль окуляръёс, линзаос, объективъёс. Шумпотӥськом, ужмылы юрттӥсьёс ке кылдо, туж соослы тау кариськом!

-Пиналъёсты дышетӥськоды бере, чеберлык сярысь малпанзэс кылдытӥськоды. Кыӵе фильмъёсты учкыны ӵектысалды?
-Уг яратӥськы мае ке но ӵектылыны. Мынам быръем фильмъёсы — мынам сямыя. Мукетъёсызлы соос оло чик но уз кельше. Ӟеч драматургиен но чебер суредэн фильмъёс пӧлы пыртысал «Остров», «Револьвер», «Бойцовский клуб» фильмъёсты. Адями учкыны кулэ трос киноосты. 10-15 минут учкыса, валано ини потэ-а та киноез пумозяз адӟемед. Кинотеатръёсын али туж трос шуш киноосты возьмато. Соин киное чакласькыса ветлэ! Залын кылемды уг ке поты, султыса кошке!

-Режиссёр синмын учконо ке, кызьы азинске Россиысь кино?
-Россиысь кино будэ но паськыта. Туж трос кылем совето вакытэ кадь ик ужась режиссёръёс — Алексей Учитель, Алексей Балабанов но трос мукетъёсыз. Мыным кельшо соослэн фильмъёссы. Али ӵем кылоно луэ: «Россысь кино — тужгес но уродэз! Мон сое ноку но уг учкы!». Мон озьы уг малпаськиськы. Берло дыре кылдо трос егит режиссёръёс, соослэн потэ выль тузӥ кино лэсьтэмзы. Мон но ужме кутскыку озьы малпалляй: «Тани кутско али уж борды! Ваньдылы возьмато кыӵе луыны кулэ зэмос кино!». Быдэ вуэмъя аслыд юан сётӥськод: «Нош мае мон лэсьтӥ ини кино удысын?». Соку валаськод, котькуд лэсьтэм ужез, котькуд экран вылэ потэм фильмез дунъяно. Адямиос кужымзэс поныса ужазы, сюлэмзэс усьтӥзы. Кельше-а уг-а со тыныд? — та мукетыз юан ини. Ми туж ӵем шундыпуксён палась фильмъёслэсь адӟем карыны тыршиськом. Суредлэн ӟечлыкез будэ, нош драматургия бордын ужано на. Уг быгатӥськы вераны, мар луоз Россиысь кинематографен азьпалан. Берло фильмъёслэн ӝоглыксы туж йылӥз. 80-тӥ аръёсысь киноосты учкыса, куд-ог пинал учкисьёс умме усьыло. Ми дышим ини учкыны западысь триллеръёсты но боевикъёсты… Оло ӝоген милям но фильмъёсмы соос дорозь вуозы.

-Матысь дыре мае лэсьтыны чакласькоды?
-Удмуртиын ми сяна вань на кӧня ке лад-лад ужась киностудиос. Кылсярысь, вожъяськисько Глазовысь киностудилы, соос туж быгатыса ужзэс радъяло. Туж потэ вылэм шаерысьтымы киностудиосты огазе люкаса, кыӵе ке проект кылдытыны. Глазовысь студилэн аслаз учкисез вань, милям — асьмелэн. Нош быдэс Удмуртиын ми сярысь тодо-а? Жаляса верано, уг… Оло матысь дыре ми сое ум на ворме. Али «Гелиос» студимес Ижкарлы тодмо кареме потэ. Туж трос ужаськом социальной реклама бордын, кусып возиськом МЧС-эн но мукет организациосын. Оскисько, ӝоген милемыз тодозы Ижкарын но Удмуртиын но!

Дарья Шиляева

Удмурт Дунне
By Удмурт Дунне 28 августа, 2014 12:29
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<