Гурезь

Удмурт Дунне
By Удмурт Дунне 28 августа, 2014 13:29
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмурт литературалэн атаезлы сӥзьыса…

Пичи дыръям, школаын дышетскыкум, мыным Гердлэн кылбуръёсыз — нош со вакытэ со мон понна кылбурчи гинэ вал — туж ик ӧз кельшылэ.
Солэсь утчаськон амалэн гожъям кылбуръёссэ (мон али валасько, со мынам авангардэн тодматсконэ озьы ортчиз шуыса — удмурт литература пыр) мон уг валаськы вал — соку мон понна «идеальной» кылбурчи вал Пушкин: йыг-йыг рифмаос, вольыт чуръёс, чебер образъёс, синмаськымон вакыт… Со вал — Поэзия. Кыӵе ке лычсузён но потылӥз: кӧня-о Герд сярысь вераським ини, тырмоз, со Пушкин ӧвӧл ук. Бен, ӧвӧл, со — Пушкинлэсь быдӟымгес.
Университетын дышетскыкум, мон тодматски выль Гердэн — удмурт Леонардо да Винчиен, удмурт литературалэн атаеныз. Со литературалы кузьмаз улон, акушер выллем, юрттӥз вордӥськыны, кулыны сётытэк, уйёссэ изьытэк, курадӟыса возиз нуныез капельницаос улын. Нырысетӥ лэсьтэм вамышъёсызлы шумпотӥз. Удмурт литературалы кулэ вал атаез. Но соосты люкизы — литературамы ӧксыз (сирота) кылиз. Зэм, сюратайёсыз вал, но вордэм атаез нокин уз вошты ук!
Кызьы-о валэктод нылпилы анай-атаен люкиськонэз? Нокыӵе кылъёсын сое валэктыны уз луы. Валантэм кӧтӝож кылдэ — куке шӧдӥськод, со шонер ӧвӧл шуыса, валаськод, озьы луыны кулэ ӧвӧл шуыса, тодӥськод, сое воштоно шуыса, но… номыр каремед уг луы. Сыӵе валантэм пуш тырон — зэмлыкез дэрие саптан — со ик вал Гердлэн быремез. Ачиз но со ӧз вала кадь: кытӥсь вордӥське адями пушкын сомында кырсез. Со сярысь ик «Матӥ» веросэз но — ачиз сярысь — малы чебер но пальпотӥсь, котыраз югытэз вӧлмытӥсь адямиез юнме шорись палэнтыны, мыскылляны дась калык. Малы? Кызьы калык, кудӥзлэн сыӵе узыр фольклорез, лякыт дунне шӧдонэз, адямиез пож вуэн пылатыны быгатэ? Но, номыр шоры учкытэк, Герд оскиз но нюръяськиз, адӟыса дуннелэсь чеберзэ, быдӟымзэ, выльзэ но мукет адямиослы сое возьматыны тыршыса.
Али но тодам возисько, кызьы, Герд сярысь мадьыкуз, дышетӥсьмылэн куараез дырекъяз. Зэмос литература гинэ, зэмос Кылбурчи гинэ быгатэ адямилэсь сюлэмзэ сокем позыртыны — дауръёс ӵоже нуыны сюлмаськонзэ, йыркурзэ, яратонзэ но мукет адямиослы ас мылкыдзэ паланы. Со понна ик дырекъяз дышетӥсьмылэн куараез. Нош эшшо быдӟым адямилэн быдӟым мылкыдызлы но лул кужымезлы йыбырттон со вал.
Инкуазьын трос паймымонэз но чеберез — ӝужыт гурезез, паськыт зарезез, пумтэм-йылтэм тэлез адӟыса яке син азе гинэ пуктыса, ӵоксузёно, дэймоно тырбыдэслыксылы (совершенстовезлы). Озьы ик быдӟым адямиос но — соос сярысь малпаса, паймоно лэсьтэм ужъёссылы. Удмуртиямы ӧвӧл ке но ӵоксузьытӥсь но шурдытӥсь гурезьёсмы, Герд вал сыӵе гурезь.
Пӧртэм вакытъёсы Гердлы абдразы но паймизы, тау каризы но курлазы. Куд-ог дыръя нимзэ пожазы, возьдаськыса кырсь ужъёссылэсь. Нош али удмуртлык, удмурт лулчеберет, литература, кыл понна вӧсяськоно — йыбырттоно Гердлы. Солэсь туссэ граффиотиосысь — мудорысь выллем — Ижкарлэн пӧртэм интыосысьтыз али адӟыны луэ. Со юа кадь: нош тон ма, удмурт, кариськод удмуртлык понна? Удмурт калыкез со котьку сайкатыны тыршиз. Кызьы тылпу дыръя гуртъёсын шуккыло вал тангырае — озьы ик коказ со кылыныз, кылбуръёсыныз, сайкатыны вырыса калыкез, утьыса сое кулонлэсь. Со вал сыӵе акылес будильник, кудзэ ӵукна нокинлэн кылзэмез уг поты. Али ини удмурт литературалы акушер кулэ ӧвӧл. Солы, егит ке но ай со, кулэ реаниматор. Нош эшшо — визьмо но малпаськись лыдӟись.

АНастасия Шумилова

Удмурт Дунне
By Удмурт Дунне 28 августа, 2014 13:29
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<