Вашкалаеныз долкатӥсь шормуӵ

Удмурт Дунне
By Удмурт Дунне Июль 22, 2014 14:04
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Грециын гуртъёсын уло узыръёс, городъёсын векало куанеръёс

Крит

Алигес ас синмыным адӟыны кылдӥз вашкала цивилизациослэсь кылдэм интызэ — вуылӥ Греция кунысь Крит шормуӵе. Быдӟалаезъя Средиземной зарезьысь шормуӵъёс пӧлын витетӥ интыын, историезлы 5 сюрс арлэсь ятыр.

Европаез сюдэ пичи шормуӵ
Улон майбыр луиз: Казаньысь аэропортысен самолётэ пуксьыса, ньыль но ӝыны час куспын кыдёкысь шормуӵе вуиськод. Самолётысен ик абдраны муг шедиз ни: паймытӥзы ӝужытэсь, курень-чилясь куо, йылсо ныро, пеймыт-вож синмо но чиль-сьӧд йырсиё нылашъёс — стюардессаос. Одӥг кылын вераса, Клеопатра тусоесь. Э-э, таӵеесь, иське, грек нылкышноос! Критэ вуыса, таӵе малпанэ чылкак тӧлӟиз. Грек кышноос мыным — егитъёсыз но, арлыдоосыз но — сюбег пельпумоесь но укыр паськыт сауроесь, секыт вамышъясесь потӥзы. Инметӥ самолётэн лобыку, паймытӥз на таиз: шурдӥсьёслы стюардессаос курытсэ но ӵектылӥзы. Бӧрысь кин ке валэктӥсь луиз: кудӟытӥсь юонъёслэсь возисько Россиысь авиакомпаниос гинэ, нош кунгожсьӧр авиалиниос та куронэз быдэсъяны уг дырто…
Инметӥ лобыку, самолётлэн бурд улаз чеберлэсь чебер суред усьтӥське: югыт-лыз зарезьын кытын но отын пумиськыло пичиесь шормуӵъёс. Крит котырын соос лачак, улӥсез ӧвӧл. Нош Крит интыяськемын дуннелэн куинь палъёсыз — Европа, Азия но Африка куспын, ог 8 сюрс гектар музъем вылын. Улӥсез 623 сюрс мурт пала. 365 нунал пӧлысь 300 нуналзэ Критын пиштэ яркыт шунды. Туристъёсты та шормуӵ пумита апрельысен октябрь толэзёзь.
Самолётмы пуксиз Ираклион городысь аэропортэ. Критэ нырысетӥ вамыш лэсьтӥ гинэ, соку ик син шорам йӧтӥзы пӧртэм пумо сяськаос. Жаг турынзы но татын яркыт бурдъёсын сяськая! Нош музъемзы… Горд сюй но тӥни, вамышлы быдэ — гурезьёс. Инмын пиштэ сутӥсь шунды. Паймоно кадь: кызьы такем начар музъем вылын ваньмыз сокем пушъе, син куспын чеберске? Юанэлы валэктон бӧрысьгес шедиз: ар куспын 300 нуналзэ шунды пиштэ ке, ог 70 нуналзэ дурыныз уен-нуналэн кисьтэ зор. Та дыр куспын сомында ву усе, шормуӵлы со тырме кӧс куазез чиданы — будосъёс мускытэз кыско пыдлось муысь, куасьмонлы уг сётско. Таӵе климат луонлык сётэ быдэс ар ӵоже пӧртэм пумо бакча сиён будэтыны. Соин ик Критын тужгес узыр адямиос — гурт удысэн вырисьёс. Греция Евросоюзэ пыремын, сиён-юонъёслы дунъёс но та огазеяськонлэн куронъёсызъя юнматӥсько. Бакча сиён будэтӥсьёс продукцизэс дуно дунын вузаны быгато, трос табыш потто. Грекъёс данъяськыса верало: емышен ми сюдӥськомы быдэс Европаез. Критын улӥсьёслэн учконзы асьсэлэн: гуртъёсын уло узыръёс, городъёсысь квартираосын ӝокало куанеръёс.

Астэ яратод — тонэ яратозыКрит4
Улон Грециын дунтэм ик ӧвӧл. Басьтом тани оливкаослэсь вӧйез. Сое плантациосын будэто – кызьы асьмеос шундыберганэз. Та емышсы отын сомында бере, озьыен, солэсь поттэм вӧй но, со вылын лэсьтэм кремъёс-суретъёс но дунтэм сылыны кулэ кадь. Но оливкаослэсь вӧй кисылы дунтэмгес усе вылэм, асьме магазинъёсысь ик басьтыса. Вылаз ик, сое таможня пыр поттыны лэземын, ӟенеликсэ пулэсь коробкае интыяса гинэ.
Критын шер пумиталод тамак пурккетӥсьёсты. Угось самой дунтэмез ӵындон ог 170 манет тыр усе. Курытсэ ӟамыръясьёсты но грекъёс пӧлысь адӟыны ӧйлась. Зэм, та курытэз но отын дунтэм уг сыло, но мугез, малпасько, татын мукетгес: грекъёс ужасесь, семьязы сярысь сюлмаськисесь, тордыса улыны дырзы ӧвӧл. Макем трос бызьылод-пӧсялод — сокем трос табыш поттод. Пӧятэк верасько: лошъяськись, бомж тусо грекъёсты Критын мон воксё ӧй пумита.
Евросоюзэ пырон Грецилэсь экономиказэ секыт югдуре вуттӥз, узыр кунъёсын кадь бадӟым уждунъёсын, пенсиосын грекъёс ушъяськыны уг быгато. Трос ужаса-пӧсяса, грекъёс шорлыдын ог 1 сюрс евро (ог 47 сюрс манет) пала уждун басьто. Улонзы дуно бере, та лыдпус воксё но ичи йӧтэ. Ма, мар веранэз: 9 нунал куспын Критын шутэтскытозям, евролы воштэм 20 сюрс манетэ ӧз тырмы — сиён-юонлы дун ӧй тыры, экскурсиосы маршруткаосын ас поннам ветлӥ ке но. Грецие мыныны дасяськисьёслы ӵектэме потэ: отелез бырйыкуды, быръе «всё включено» амалэз — отчы пыре ни тӥледыз интыян, ӵукнаысен ӝытозь сюдон-утялтон но. Сотэк грек шаерын шутэтскон кисыдылы туж дуно усёз.Крит2
Грекъёс оско, кунзылэсь экономиказэ ӝутыны туристъёс юрттозы шуыса. Вератэк кельтэме уг поты тазэ но: Турция но Египет кадь кунъёсы вуылэмъёслэсь ӵем кылод, татын туристъёс (тужгес но Россиысь) шоры кырыж учко шуыса. Грециын таӵе мылкыд ӧз кылды. Та кунын шутэтскыны туж ярато Германиысь, Польшаысь, Великобританиысь туристъёс.
9 нунал ӵоже Критын шутэтскытозям, син шорам умой пуксиз Россиысь но Европаысь семьяослэн пӧртэмлыксы. Критэ туристъёс вуэмын бере «всё включено» амалъя, кудӟытӥсь юонъёс но кунокуаын дунтэк ӵектӥсько. Россиысь вуэм семьяос висъяськизы трос пиналъёсын но… кышноослэн картъёссэс бордазы воземенызы, мултэссэ ӟамыръяны лэзьымтэенызы. Малпан кылдэ: зарезь дуре картъёссэс чакланы гинэ вуизы шуыса. Россиысь семьяос кышноос вылын возисько. Европаысь кузпалъёслэн кусыпъёссы мукетэсьгес: кышнооссы асьсэды ярато: быдэс нунал шунды шорын пыжо, дуно кремъёсын зырасько, спа-салонъёсысь уг потало. Маке шат, кузпалзы вӧзысьтызы тӧлӟиз ке! Нош таосыдлы эрик сётэмын ке но, курытсэ лушкем ӟамыртозы но син куспын — возьмаськись солдат кадь — кышнозы вӧзын ни.

Куалялюльыен шыд
Крит1
Крит люкемын 4 ёрослы: Ираклио (шоркарез), Лассити, Ретимно но Ханья. Ираклио тодам кылёз куалялюльыосыныз. Соосты кемалась веръяме потэ вал ни. Одӥгаз тавернае пырыса, быдэс тэркы пӧзьтэм куалялюльы вуттӥзы — лымен, эсьмаса. Соосты, пе, юри будэтӥзы-куайытӥзы виноград куакъёсын. Официант валэктӥз, кызьы соосты кӧм пушкысьтызы поттоно. Вилкалэн одӥг пиньыныз куалялюльыез дэмӟытӥськод но, со ачиз резина кадь золтӥськыса потэ, пе. Кытын ай мыным тае пӧрмытыны! Нырысетӥ кык куалялюльые тюргетыса ик кытчы ке лобиз. Соосты сиён — рогаткаен ыбылӥськон кадь, малпай ас поннам. Кыкетӥзэ веръяме уг поты ни. Шӧмыз — курегпузлэн кема пӧзьтэм тӧдьыез кадь.
Крит котькытын шӧдӥсько вашкала цивилизацилэн бервылъёсыз. Соку ик тодэ лыкто грек инмаръёсын герӟаськем мадёнъёс. Тани басьтом Ираклионлэсь кыдёкын ик ӧвӧл интыяськем Кносс дворецез. Котькудӥз ассэ гажась турист отчы вуылыны тырше. Сое усьтэм ай 1900-тӥ арын гинэ Англиысь арехолог Артур Эванс — муысь поттэм быдэс вашкала дворецез. Историкъёс пусъемъя, ӵапак отын кылдэмын Европаысь нырысетӥез город, вашкала минос цивилизация. Нимамын со Минос эксэйлэн нимыныз, со, пе, Зевс инмарлэн но Европа нимо огшоры нылашлэн пизы вылэм. Нош Кносс дворецлэсь кыдёкын ик ӧвӧл — Дикти гурезьёс вискысь Лассити интыын вордскем инмаръёслэн кивалтӥсьсы — Зевс. Со гурезьёсысь одӥгаз пещерае пегӟыса, Зевсэз вордэм Рея анаез. Озьы со пегӟем Крон кузпалызлэсь, таиз угось кышка вылэм вордэм пиналъёсыз ик сое быдтозы шуыса, котькудзэ сием-ньылэм, нош Зевсэз анаез утьыны быгатэм.
Кносс двореце вуыса, зэм но, нырысь воксё долкаськод. Йырын берганы ӧдъяло грек инмаръёслэн нимъёссы: Ариадна, Тесей, Зевс… Изъёс вылэ шуккем вашкала суредъёсты адӟыса, Минотаврлэн лабиринтэтӥз ортчыса, чылкак абдраськод: мадёнъёсысь учыръёс, иське, ваньмыз татын ортчизы. Нош мон ӵапак татын сылӥсько! Юзыр-кезьыр луыса кошкиськод. Но ӝоген син шоры йӧтыны кутско туала буёлэн шобыртэм колоннаос яке вашкала тусо карем из плитаос. Вашкалаеныз долкан-данъяськон шапыкен-шапыкен сылмыны кутске. Но ӝоген буйгаськод: ӵок ойдо, озьы-а, тазьы-а но, татын кылдӥз зол цивилизация. Кужымо инты!
Зевслэн пещераяз пеймыт, кезьыт. Йыр вадьсын — пӧртэм буёлъёсын кисьтаськись сталактитъёс. Пещераын кема ӧй чида: сюлэм куриське шунды шоры, отын нуныясь шунды, зарезь, омыр. Зевслэн пещераез 1 сюрс 25 метрлы вылӥе интыяськемын. Вамышъяны азьтэмъяськисьёслы амало грекъёс ӵекто ишакен тубыны. Со вылын кӧня ке мынэм понна самой ичизэ 20 евро куро. Эсьмаса, пыдын вамышъяса ик, пещерае ӝоггес вуод: дыг пудо угось вамыш лэсьтэ но ваменъяськыны кутске.Крит
Грекъёс шуо: Санторини шормуӵе ӧд вуылы ке, озьыен, Грециез но ӧд адӟы. Таиз шормуӵ кылдэмын вулкан пуштэм бере. Гурезьёсыз тӧдь-тӧдесь, нош соос вылын сыло горд, лыз, ӵуж липето вашкала коркаос — таос, пе, вашкала киклад архитектуралэн бервылъёсыз. Синэз воштонтэм чебер суред! Та шормуӵез, озьы ик со котырысь зарезьлэсь пушсэ ас вакытаз эскерем быдэс дуннелы тодмо луэм капитан Кусто. Санторини сярысь со шуэм: та шормуӵ — ву улэ кошкем Атлантида цивилизацилэн кесэгез. Ай соку, уно сюрс ар талэсь азьло, Санторини вулканлэн улӟемез кужмо цунамиез ӝутэм. Со ик ньылэм Критысь цивилизациез: ву улэ кошкем 34 шормуӵ.
Грекъёс шуо: Критлы синмаськытэк кылисьёс ӧвӧл, та мылкыд — быдэс улонлы.

Елена Никитина

Удмурт Дунне
By Удмурт Дунне Июль 22, 2014 14:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<