Бӧдёно сиён но варсь пӧзьтон

Удмурт Дунне
By Удмурт Дунне Июль 22, 2014 16:13
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

SONY DSC18-тӥ-19-тӥ пӧсьтолэзе Шаркан ёросысь Быгы гуртын фин-угор сиёнъёсъя «Быг-быг» фестиваль ортчиз.

Быгы гуртэ мон нырысьсэ вуи. Соин ик вал маизлы паймыны. Та фестиваль Гербер кадь ӧз ортчы. Татчы туж трос выжыосысь калыкъёс люкаськизы. Милемыз сизьым ошмес йылтӥ нуллӥзы, эмъюм турынъёс бичаны луонлык сётӥзы. Гуртэз котыртэм бере ми вуим «Ческыт азбаре». Татын милемыз возьмаз варсен вина пӧзьтон но сиён пӧранъя ӵошатскон.
Варсен вина пӧзьтыны дышетӥзы кык баба Лида но Галяпай. Варсь ӟеглэсь, пе, лэсьтӥське. Ми дорын, лымшор палан, озьы уг йӧндыро бере, мон ымме усьтыса кылзӥськи. Варсь лэсьтон понна ӟегез кӧня ке нунал вуын котыса возё, собере куасьто но изо. Изэм ӟегез калыклы шӧмъяны сётӥзы. Соос ӟеглэн гольтресэзлы ӧз оске, пӧлаз сакыр понэмын, шуизы. Но тодӥсь адямиос оскытӥзы, удам ӟег коньыт луэ шуыса. Собере изэм ӟег пӧлы шуныт ву ватсало, горд сюйлэсь посудае поно но гурын возё. Озьы варсь пӧрме. Гольтрес юонэз нылпиос туж яратылӥзы. Варсь пӧлы аракы ватсаса, бадӟымъёслы но юон лэсьтыны кутскизы, варсь бервылэн сур пуктылӥзы. Ваньмыз со инкуазен сётэм юонъёс — адямилы пайда гинэ сёто.
Варсен вина юэм бере сиськоно, дыр, шуим но сиён пӧранъя ӵошатсконэз учкыны кошким. Татчы пыриськизы Франциысь Жюли Понти, Киров улосвылысь Антонина Каркова, Эстониысь Тауно Ласик, коми-пермякъёслэн музъем вылысьтызы Татьяна Снегирёва, Дэри ёросысь Евгений Кондратьев, Марий Элысь Галина Щербакова но Ижкарысь Ольга Царегородцева. Пӧраськыны ваньзылы огкадь сиёнъёс сётӥзы. Йӧл, чорыг, сылал, огреч, губи, курегпуз, картошка, ӵужкушман, сугон, кубиста – ваньмыз, мар будэ гуртын. Пӧраськисьёс пӧлын котькинэз вал: ансамблен кивалтӥсез но, гуртын пукисез но, шеф-поварез но, университетын дышетскисез но, нылпиосты дышетӥсез но.
«Ческыт азбар» резь-куаж поттӥз. Жюли Понтилэн эшъёсыз пӧраськыны юрттӥзы эктыса-кырӟаса. Француз но пӧраськон ваче вамышто, та быгатонзы соослэн виразы, шуиз мыным одӥгез француз. Коми-пермякъёс палась Татьяна Снегирёва мылкыдзэ кисьтӥз: «Кин озьы каре. Продуктъёсты вить минут талэсь азьло сётӥзы. Мар таослэсь пӧраны луоз, паймисько!». Нош Эстониысь шеф-повар Тауно Ласик чик но уг сюлмаськы, ӵошатскон кутскиз гинэ, нош солэн чорыгъёсыз маринадын уяло ни, юрттӥсьёсыз бадӟым чугун тэркыын кубиста дасяло. Италмас черкогуртысь Евгений Кондратьев ӝӧк вылаз чурак пӧраськон пуртъёссэ поттэм. Таиз но угось ресторанын ужа, али, пе, удмурт сиёнъёсын вырисько. Гур сьӧры Ижкарысь Ольга Царегородцева интыяськем. Со бакча сиёнъёслэсь «Чипполино» рагу, пе, лэсьтӥсько. Киров улосвылысь Антонина Каркова котырысьтыз нокинэ ӧз адӟылы, быдэсак сиён пӧранэ выйиз.
Пӧраcькисьёс сиёнъёссэс возьматыку калык кагаз вылэ рецептъёссэс гожъяз. Соос мылкыдзэс веразы, вуоно арын фин-угор сиёнъёсты пӧраны дышетсконъя мастер-класс ортчытоно шуыса. Быгы муниципал кылдытэтэлэн йырыз Владимир Макаров, сиёнъёсты дунъям сяна, ачиз но пӧраськиз: со пуштыё шыд пӧзьтӥз.
Котькуд пӧраськись кык минут куспын аслаз сиёнэз сярысь вераз. Татын но эстонецъёс паймытӥзы. Сиёнзылэсь нимзэ «Быгы» кылын ӧз герӟалэ, кызьы ваньзы каризы. Соос кункышетсылэсь буёлъёссэ сиёнэнызы возьматӥзы, шоккетыны быгатэменызы, адямиослэн сюлэмъёсазы усизы. Соос ик та ӵошатсконын вормизы. Мукет нуналаз но Тауно Ласиклэсь сиёнъёссэ басьтыны трос калык люкаськиз, уго солэн пыжем бӧдёноосыз 1 быген (10 манетэн) гинэ сыло вал.
Трос пӧртэм фин-угор сиёнъёсты оскалтыны кылдӥз та нуналъёсы. Котькуд сиён калыклэсь пуш дуннезэ, улэм-вылэмзэ, ортчем сюрессэ возьматӥз кадь. «Быг-быг» фестивале вуылэмелы мон шумпотӥсько. Татысь мон кырӟанъёс, эктонъёс, сиёнъёс, выросъёс, вераськонъёс пыр котькуд лыктэм калыклэсь лулчеберетсэ адӟи но озьы узыргес луи.

Мария Векшина

Удмурт Дунне
By Удмурт Дунне Июль 22, 2014 16:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<