Удмурт дэрем но арафатка

Удмурт Дунне
By Удмурт Дунне Июль 22, 2014 12:23

Сям-йылолъёсты гажамез котькытын дунъяло

Туэ кыкетӥ ползэ ни нылпиосы кузьым лэсьтӥзы — Египетэ путёвка. Мон талы туж шумпотӥсько!

Брангуртысь гур
Горд (Красной) зарезь дурысь Шарм-Эль-Шейх отельёсын тырмемын, но луэ нимаз адямиос доры но куриськыны. Отын адямиос ӟеч мылкыдоесь, котьку ӟечбуръясько, небыт вазисько, мыняло. Ӧжытсэ 3-4 кылэз тодо: англи, итальян, испан… Но ӟуч сямен верасько отельёсын ужаны нимысьтыз дышетскемъёс гинэ. Туж пайми, асьме теплицаослы укшась пукон-шутэтскон интыез адӟыса, но со сьӧд сеткаен шобыртэмын вал. Нош ог арня ортчыса, та котыре пичи гинэ убоос лэсьтӥзы ни — помидоръёс, кияръёс мерттӥзы. Бакчалэн кузёез кык-куинь ужасьёсты возиз. Малпай, бедуинъёсты, дыр, шуыса. Милям — чиганъёс, соослэн — бедуинъёс. Но интыысь интые тэтчаса ветлӥсь калык отын ас понназ улонлэсь палэнтӥське ни, шӧдске. Улон соос таборъёсын, городлы матэгес кариськыса. Егит воргоронъёссы ужало отельёсын, ресторанъёсын, утялтӥськись луыса.
Нылкышноос бисерлэсь турлы арбериос лэсьто, собере туристъёслы вузаны потто. Ужаны соос уг ужало, юртъер котырзэс возё, нылпиоссэс будэто. Семьяын коньдон поттӥсь — воргорон. Со огдыре 4-5 кышно возьыны быгатэ. Но тросэзлы одӥген но тырме, лэся. Аладин нимо пиосмурт серекъяса вераз:
— Уг поты 4 кышно воземе. Зундэс басьтоно ке — ньыльзэ, дэрем кузьмано ке — ньылезлы ик… Нош куспазы керетыны кутскизы ке – коть дорысь ик пегӟы.
«Евровидениысь» меда адӟизы ни «Брангуртысь гурез»? Одӥгез ресторан азе гур пуктӥллям — пичи гинэ, горд кирпичлэсь, трубаез но вань. Ӝыт пал поръян сяменым юромо со ресторан пала вамыштӥ: учко ай, малпай, кызьы отын пыжисько. Эсто пуэн, собере эгырзэ-пеньзэ палэнто но пӧсь гуре котрес нянь пыжыны пукто. Соос асьме перепечъёслэсь ӧжытак бадӟымесьгес, валамон, пуштростэк.
Сюрес но одӥг уй
Пӧртэм экскурсиос пӧлысь бырйи одӥгзэ — «Сюрс но одӥг уй» двореце. Синъёсты со мальдытэ. Зэм, отчы экскурсиос радъясько ӝытъёсы гинэ. Соин ик, жаляса верано, туспуктэмъёс лэсьтыны ӧз луы. Но адӟемъёсы али но син азям! Со залъёс вераны луонтэм чебересь. Ваньмыз сӥземын Египетлэн историезлы. Уката но кыдёкысь вашкала дауръёсы вуттэ кадь Египетлэн историезлы сӥзем спектакль. Со йылпумъяськем бере аренае потӥзы вал вылын адямиос, киосазы тӧласькизы Египетлэн но Россилэн куншетъёссы – экскурсие лыктэм туристъёс пӧлын трос вал Россиысь вуэмъёс. Люкаськемъёсты пӧртэм быгатонлыкъёсынызы паймытъямзы бере матэктӥз туристъёс доры – коньдонэн тау каремез возьмазы. Египетын улӥсьёс ярато уксё сётэмез.
Одӥг пол отельысь потӥ но, син шорам йӧтӥзы туж трос тӧдьы тылобурдоос – Египетысь цапляос. Мукет дыръя соос оген-кыкен гинэ поръяло. Кема ик дыр ӧз ортчы – тӧл ӝутскиз, кезьытскиз, зарезь тулкымъяськыны кутскиз. Та выллем ик суредэз адӟи чорыгъёсын но. Зарезь дурын поръясько вал. Адӟи: чорыгъёс уллёен-уллёен лыктӥллям ярдуръёс доры. Вуэ пырыса ик, чеберезлы паймыса сылӥсько. Та вискын пыд дортӥм ик ортчиз скат чорыг. Кышкатскеменым, эсьма, ӝогак ярдуре потӥ. Кошкыса но ӧй вутты, туж зол зорыны кутскиз. Иське, тылобурдоос но, чорыгъёс но азьло ик шӧдо куазьлэсь сӧриськемзэ, талы дасясько.
Египет данъяське инкуазь узырлыкъёсыныз, уте сое. Зарезьлэсь узырлыксэ нимысьтыз чакласа возе. Кылсярысь, исаны уг лэзё коралл рифъёсты. Эн ик малпа та узырлыклэсь пичияк чалепсэ ке но сьӧрад басьтыны, таможня пыр поттыны – сомында тыриськонъёс тупатозы, путёвкаедлэсь но дуногес луоз.
Озьыен, котькыӵе кунъёсы вуылыны луэ, но отчы мынэмедлэсь азьло тунсыкъяськоно отын улӥсьёслэн сям-йылолъёсынызы. Кылсярысь, Египетын туж уг ярато усьтэм пельпумъёсын ветлӥсьёсты. Асьме кышет интые соослэн – арафатка. Мон туж яратӥ зарезь дуртӥ поръяны: вылам удмурт дэрем, йырам – арафатка. Ой, кыӵе гажаса учкылӥзы шорам. Куд-огез ушъяз но: аслэсьтыд но кин луэмдэ уд вунэтӥськы, пе, милесьтым но сям-йылолъёсмес дунъяськод.

Людмила Созонова-Лукиных

Удмурт Дунне
By Удмурт Дунне Июль 22, 2014 12:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<