Пилемо нуналэз шундыё карисьёс

Южтолэзе сайка инкуазь, тулкымъяське мылкыд, улӟе творчество. Соин, дыр, ӵапак тулыс асьсэлэсь праздниксэс пусъё культура удысын тыршисьёс.

25-тӥ мартэ Ижысь Ӟуч театре люкаськылӥзы быдэс шаерысьтымы артистъёс, крезьгурчиос, библиотекарьёс, искусствоосъя школаосын, культурая но крезьгуръя колледжъёсын дышетӥсьёс, клубъёсын, музейёсын ужасьёс. Соос пӧлысь устоосыз пусъемын вал Удмурт Республикалэн но Правительстволэн Данъян грамотаосынызы. Шумпотӥськом «Шулдыр ӝыт» ансамбльысь кырӟась Павел Васильев понна. Туннэ со луиз Удмуртиысь калык артист. Та нуналэ шаерамы йылӥзы «Удмуртиысь культура удысысь дано ужась» нимен пусъемъёс но. Люкаськем калыкез ӟечкыласа, республикамылэн Тӧроезлэсь ужзэ быдэсъясь Александр Соловьёв шуиз:

— Мон тау карисько ужамдылы. Тӥ — профессионалъёс. Асьтэлэсь удыстэс ӧд куштэ туж секыт 1990-тӥ аръёсы но. Культура но искусство удысын ужасьёс тыршемзыя уждун басьтыны кулэ, малы ке шуоно тӥ доры калык мынэ. Азьланяз но тазьы ик сюлмысь тырше.

Культура удысысь ужасьёслэн праздниказы калыкез шулдыртӥзы яратоно Брангуртысь песянайёсмы, пиослэн «Ингур» хор капеллазы, Алнашысь «Вуюись» калык ансамбль но мукетъёс.

Галина Семёнова