Вормонъёс мед уноялозы

Сочиын ортчись Паралимпиадае Удмуртиысь 8 спортсмен мынэмын: кык мурт куасэн бызьылэ, мукетъёсыз следж-хоккеен шудо.

Россиысь команда 12-тӥ мартлы 11 зарни, 14 азвесь но 9 туй медаль басьтӥз ни. Со пӧлысь кыкез — зарни но туй медальёсыз Алнаш ёросысь Блатгуртысь 18 аресъем Владислав Лекомцевлэн. Туннэ со куасэн бызьылоз, 1 иськеме спринт амалъя вожвылъяськонэ пыриськоз. Нош нырысетӥ зарни медальзэ басьтӥз 8-тӥ мартэ биатлонын, туй медаль утӥз 20 иськеме классика амалэн куасэн бызьылыса. Та сюрес вылын ик кужымзэ эскериз мукетыз спортсменмы — Можга ёросысь Черёмушкиын улӥсь Владимир Кононов, со 8-тӥ инты басьтӥз.

Нимысьтыз верам потэ следж-хоккеен шудӥсьёс сярысь. Россилэн командаезлэн ӝыныез Удмуртиысь воргоронъёс: капка возьмась Владимр Каманцев но шудӥсьёс Андрей Двинянинов, Евгений Петров, Руслан Тучин, Алексей Лысов, Иван Кузнецов но Илгам Авзалов. В группаын шудыса, котькинлэсь трос очко люказы но полуфиналэ шедизы. Ӵуказе соос Канадысь командаен пумиськозы, нош туннэ висёме Владислав Лекомцев понна, спринт амалъя вожвылъяськонэ пыриське.

Валентина Кутузова
Туспуктэм: Илья Питалев/РИА Новости www.ria.ru