Депутатъёс дышето удмурт кылэз

Удмурт Дунне
By Удмурт Дунне 6 марта, 2014 17:56

IMG_9162Республикаысьтымы Кун Кенешысь депутатъёс, озьы ик ялан ужась комиссиослэн кивалтӥсьёссы, парламентлэн аппаратаз тыршисьёс та арняысен басьтӥськизы удмурт кылэз дышетон борды.

Депутатъёслэн удмурт кылэз дышетыны кутскемзылы, зэмзэ вераса, нырысь ӧй оскы. Ас поннам малпай: мылкыд карисьёс люкаськозы меда? Ма, ваньмон дыр но шедьтыны депутатъёслы капчи ик ӧвӧл. Озьы оскытэкгес усьтӥ Кун Кенешлэн юртысьтыз Президиумлэн кенешонъёсызлы чаклам заллэсь ӧссэ. Нош отын! Школаысь классын, урокын кадь гуж! вазе.Дышетскисьёс интыын — галстукен-костюмъёсын депутатъёс ке шат. Дышетӥсьсы Татьяна Волкова ӝӧк сьӧрын пукисьёс котыртӥ шумприч бызьылэ: котькудӥз доры нимаз матэктыса, эскере удмурт кылъёсты вераны быгатэмзэс.
— Чус — ӟус, чук — ӝук, суро — сюро, кун — куинь, туж — туш! — кужмо куараен чузъяське Кун Кенешлэн юртаз. — Кылдэс волятытэк, удмурт сямен вераськыны капчи уз луы. Мон нырысетӥ урокын гинэ ӟуч кылын валэктӥсько на, вуоноосаз мон тӥледын удмурт кылын гинэ лабырто на, — пусъе дышетӥсь. Отын ик кылъёсын шудонзэ азьланьтэ: ӧс — кӧш, лым — льӧм, кот — коть…
— О-о! Вож нуныос тазьы ноно — коть-коть куара поттыса! — дышетӥсьлэн кылъёсызлы валэктон шедьтӥз Кун Кенешлэн Тӧроезлэн воштӥсез Светлана Кривилёва. Удмурт кылъёслы ӵошатон шедьтыса, соос, пе, йыре мургес пыӵало но уг вуно.
Депутатъёсты, озьы ик парламентлэн аппаратаз тыршисьёсты удмурт кыллы дышетон борды басьтӥськиз республикаысьтымы Дышетӥсьёслэсь тодон-валанзэс будэтонъя институтысь удмурт кылэз дышетонъя кафедраысь доцент Татьяна Волкова.
— Нырысь-валысь кышкатски: пӧрмоз меда? Таяз радэ угось дышетскисьёсы — нимо-дано депутатъёс, улонын асьсэды шедьтэм арлыдо муртъёс, — шуэ дышетӥсь. — Но урокын синйылтӥ: соослэн синъёссы чиляло, удмурт кылэн тунсыкъяськонзы бадӟым.
Местоимениосты, куд-ог кылъёсты дышетыса, депутатъёс асьсэ сярысь мар но со вераны быгатӥзы ни нырысетӥ урокын ик. Уноезлы секытэнгес сётскиз ударение пуктон. Удмурт кылын угось со ӵем дыръя пуктӥське берпуметӥ слог вылэ.
— Котькуд учырын ударение берпуметӥ слог вылэ гинэ уг усьы, пумиськыло на исключениос, — школаын дышетон аръёссэ тодаз вайиз Кун Кенешысь Наукая, дышетонъя, культурая но егитъёсын ужан политикая ялан ужась комиссилэн кивалтӥсез Наталья Сударикова. Дышетӥсьлы юан сётытэк ӧз кельты: кызьы удмурт кылын кылдэ трос лыд?
— Озьыен, мынам нимы Света ӧвӧл, мон — Света?! — ударение пуктон пумысен паймытскиз Светлана Кривилёва. — Ма, паспортам но мон «зуч» пусъемын, нош шонер вылэм «ӟуч» шуыса вераны но, гожтыны но. Табере та кылэз янгышен верасьёсты мон одно тупато!
Парламентарийёслэсь удмурт кылын вераськыны дышетскемзэс ас синмыныз чаклаз Кун Кенешлэн Тӧроез Владимир Невоструев но. Анай кылзэ ӟеч тодэ ке но, дышетӥсьлэсь индылэмъёссэ со сак кылзӥз. Школаын тыро-пыдо дышетыны ӧз кылды, нош кыӵе тунсыко вылэм анай кылэз эскерон, ӝутскем мылкыдзэ ӧз ваты со.
Уроке вуэмъёс дышетӥзы улонамы тужгес но ӵем пумиськылӥсь кылъёсты: адями, ныл но пи, нылкышно но воргорон, кышномурт но пиосмурт, мон но тон, ми но соос. Тӧролэн воштӥсез Светлана Кривилёва удмурт кылъёсты маин ке ӵошатонзэ азьланьтӥз но капчи мылкыдын пусйиз:
— Кыӵе капчи йыре кельтыны «пи» кылэз! Математика удысысь Пи лыдпус кадь. Пи — мальчик! Макем ваньмыз огшоры но валамон!
Кун Кенешлэн аппаратэныз кивалтӥсьлы Виктор Жидковлы удмурт кылэз дышетон секытэнгес сётскиз: кылъёс трос, соосты вераны но капчи ик вылымтэ!
— В голове — каша! — серемпыр вера со.
— Йырам — ӝук! — верамзэ отын ик удмурт кылэ берыктэ дышетӥсьсы Татьяна Волкова.
— Ӝук, ӝук, ӝук! — бӧрсьысь бӧрсе верало ӝӧк сьӧрын пукисьёс. Та бӧрсьы дышетӥсьсы физкультминутка ялӥз: мугор ёзвиосын герӟаськем кылъёсты соос дышетӥсьсы сьӧры дэмен веразы — пыдъёсынызы тапыртӥзы, киосынызы шоназы, жадемзэс веськатӥзы. Нош кыӵе урок ортче, дорысь уж басьтытэк? Депутатъёслы но уж сётэмын: вуоно занятилы дышетоно сётэм кылъёсты. Макем троссэ — сокем ӟеч, пусйиз дышетӥсьсы.
Удмурт кыллы дышетон Кун Кенешын радъяськоз 72 час ӵоже. Та дыр куспын дышетскозы-а соос удмурт кылын лабыртыны?
— Валамон, 72 час ӵоже синмаськымон вольыт вераськыны соос уз дыше, — валэктэ Татьяна Волкова. — Но огшоры вераськонэз соос валалозы, вазьыны но быгатозы. Синйылтӥ: соослэн удмурт кылэз дышетыны мылкыдзы бадӟым. Оскисько, огъя ужмылэн пайдаез луоз. Но группа, зэмзэ вераса, пичи ик ӧвӧл — 24 мурт. Соин ик мон малпанэ вуи: соосты пичиесьгес группаослы люконо. Тазьы соослы но капчи луоз, вылаз ик, мон но котькудӥзлы тросгес саклык висъяны быгато, — пусйиз дышетӥсь.
Малпаськонэ усиськод: кыӵе пайда басьтозы парламентарийёс удмурт кылэз тодэмзылэсь? Валэктон сётӥз Тӧро Владимир Невоструев:
— Кун Кенешын удмурт кылэз дышетыны быгатэ парламентысь котькудӥз мылкыд карись, — пусъе со. — Но таяз радэ та уж борды басьтӥськизы парламентын ялан уже выжтэм депутатъёс, специалистъёс. Соослы 72 час ӧз тырмы ке, дышетонэз нуйтыны но быгатомы. Но валтӥсь пайдаез та курсъёслэн тани ма бордын. Удмурт гуртъёсын улӥсьёс депутатъёссылы ӟуч кылын вазиськыны ӵем дыръя керпото. Нош таӵе курсъёс пыр потэм парламентарийёс соосын удмурт кылын вераськыны но пӧрмытозы ни. Озьы ог-огзэс ӝоггес валалозы, — шуиз Тӧро.
Владимир Невоструев борды итӥськиз солэн воштӥсез Светлана Кривилёва но:
— Нырысетӥ урокмы ӝутскем мылкыдын ортчиз, удмурт кыл мыным туж тунсыко потӥз. Та проект пыр ми, Кун Кенешын тыршисьёс, калыкмылы возьматыны турттӥськомы: кун кылъёсты дышетон ласянь шаерамы ӟечесь луонлыкъёс кылдытэмын. Та музъем вылын улӥсь выжы калыклэсь кылзэ асьмеос тодыны кулэ. Со сяна, эмъясь сямен но вераны быгатӥсько: кыӵе ке кылэз дышетон йырвиымысь нейронъёсты бугыртэ-улӟытэ, йырез ӝоггес ужаттэ. Наука шараяз ни: мурт кылэз дышетэмъёс пӧлын йыр сураськонэн курадӟисьёс 30 процентлы ичигес, — пальпотыса вераз Светлана Петровна.
Урокысь пальышаса потӥз Кун Кенешысь Нациосын ужан политикая, кышкытлыклэсь утиськонъя, регламентъя но Кун Кенешлэсь ужзэ радъянъя ялан ужась комиссилэн кивалтӥсез Энвиль Касимов но: адӟоды, ог вить урок ортчыса, ай тани удмурт кылын кылбур пӧрало!
Удмурт кылэз дышетон курсъёс Кун Кенешын ортчо дано ужрадэз пусъён улсын — Удмурт Республикалэн Конституцизэ кутэм дырысен туэ 20 ар тырмонэн валче. Шаерысьтымы парламентлэн туала историяз таӵе кичӧлтон улонэ пыӵа нырысьсэ.

Елена Никитина
Туспуктэм: Олег Ларин

Удмурт Дунне
By Удмурт Дунне 6 марта, 2014 17:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<