Скал антилопа ӧвӧл

Удмурт Дунне
By Удмурт Дунне Март 4, 2014 13:30

Ӵемысь кылоно: скалэ йӧлзэ ичигес сётыны кутскиз. Уноез тае тол вуэмен герӟало. Но со гинэ-а мугез?
Африкаысь тужгес бадӟым Серенгети нимо национальной парк — кыр инкуазьлэн зэмос узырлыкез. Миграциос дыръя татысь турынэз сиыны олокинэз но люкаське: антилопа, зебра, буйвол, газель.

Мар утчало соос ваньзы Серенгетиысь? Паймеменызы тодосчиос парклэсь музъемзэ эскероно кариськизы. Шараяськиз: татысь му фосфатэн узыр. Та элементэз сюпсьыса ӝужам ожо туж ческыт но пайдаё луэ. Фосфаттэк уго огез но пудо таза пи вайыны, сое нонтыны уг быгаты.

Басьтом асьмелэсь скалмес — йӧл поттонъя «биофабрикаез». Инкуазь солы кужым сётӥз кунянзэ будэтон понна араз 700-800 литр йӧл сётыны. Ӵапак тамында сётыны юртто бакча сиён, турын, нянь. Нош асьмелэн куддыр кӧтмы уг тыры, вить поллы тросгес йӧл сётэмзэ возьмаськомы, тышкаськиськомы но. Но вить поллы уногес йӧл сётон понна ӵапак сомында поллы ик тросгес скал басьтыны кулэ минералъёс но витаминъёс! Сюролэн йӧлыз кыл вылаз, шуо.

Йӧлын трос фосфорез — одӥг литрын 1 грамм. 1 литр йӧлын 1,4 грамм кальциез. Нош турынын трос-а та элементъёс?

Тани куд-ог выль лыдпусъёс:

Табере лыдъялэ, кӧня турын но тысь скал сиыны кулэ уй-нунал куспын, мугораз кальциез но фосфорез тырмыт медло шуыса! Кытысь пудо басьтыны кулэ тырмисьтэм элементъёсты? Жаляса верано: ас мугорысьтыз ик. Йӧл сётон понна скал ассэ ачиз сиыны кутске: лыысьтыз, быгытъёсысьтыз ваньмыз сямен элементъёсыз гылтӥсько кӧня ке литр йӧл кылдытон понна. Нош асьмеос паймиськомы: малы пудомы начарме, чутыны кутске, йӧлыз кулэсме? Йӧнатыны котьку секытгес, висёнлэсь утиськон сярысь. Соин ик пудоез ӟеч сюдоно, биодобавкаос басьяно. Тужгес но толалтэ, гидысь потаны быгатымтэзы дыръя. Кезьыт гидын сюролэн эшшо ке ассэ но шунтыны ӟигарыз уг тырмы, нош татын йӧл поттэмзэ возьмало на.

Туннэ капчиен шедьтыны луэ фосфорен но кальциен «Фелуцен» брикетэз. Тае скаллэн ымаз туйылыса курадӟонэз ӧвӧл. Тусяз понэ но, кулэ дыръяз ачиз сое нюлоз сомында, кӧня мугорызлы кулэ. Йӧл но сётоз, ӟигарыз но потоз, мылкыдыз но капчи луоз. Кунян но брикетэз нюлыштӥз ке, эн курдалэ — ӝоггес будоз. Отын уго йодэз но, сылалэз но, магниез но, цинкез но, кобальтэз но вань — пудо огзэ но инкуазьысь тырмыт уз шедьты.

Скал эркын калгись антилопа ӧвӧл: думетын сылэ, сие сое, мар сётэ кузёез. Жалялэ сое. Соку со но тӥледыз шумпоттоз.

Екатерина Михеева
Туспуктэм: susanin.udm.ru

Удмурт Дунне
By Удмурт Дунне Март 4, 2014 13:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<