Утён нуналэн!

Удмурт Дунне
By Удмурт Дунне Февраль 21, 2014 14:47
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Элькунмы понна валтӥсь иворез телевидениын-радиоын, Интернетын ужась эшъёсмы толон вӧлмытӥзы ни — Удмуртиын Президентэз воштӥз Йыр. Шонергес ке, Йырлэсь ужзэ быдэсъясь.

Озьыен, президент вакыт шаерамы йылпумъяськиз. Волков кылиз нырысетӥ но берпуметӥ Президент луыса. Со кошкиз, но власть ӧз воштӥськы. Мар ватонэз, котькуд кивалтӥсьлэн вань солы юрттӥсьёсыз, оскымон матысь адямиосыз, вань пумитъяськисьёс, гажасьтэмъёс. Куд-огез, киоссэс посыса ик, возьмазы солэсь кошкемзэ. Но срокез йылпумъяськон азьын малпаськыны кутскизы: нош мар луоз, варяг вуиз ке? Кулэ-а милемлы сьӧрлось бай, сотэк но куанер шаермес уз сузя-а? Соин асьме адямиез кивалтонэ кельтон калыкез керӟегъяськонлэсь-бугыръяськонлэсь утиз, шуыны луоз. Сентябрёзь. Отӥяз туж тросэз потоз асьме бордысь, угось быръёнъёс ортчозы, меӵак куара сётыса, лыдэ басьтӥськоз котькудмылэн куарамы. Толон выль кивалтӥсен тодматон ужрадын табере ини азьвыл кивалтӥсь Александр Волков шуиз: ум сётэ шаермес зуркатыны сентябрёзь но, собере но!

Шонер. Ужаны ке — асьме калык, кузёяськыны ке — палэнысь? Ӟеч сямъёсты (та учыре — власть юнматонэз) утьыны кулэ.

Нялтас вераса, таяз арнянуналэ пусйиське Атыкай музъеммес утисьёслэн нуналзы. 15-тӥ феврале 25 ар тырмиз асьме ожгарчиосты Афганистанысь поттэм дырысен. Отысь улэпкын берытскемъёсты кылзыса, сюлэм шымырске. Соин валче амалтэк жаляса но куалекъяса учкиськод бускель Украина шоры. Кунзэс, шаерзэс утем интые, сое пазяло-суто, асьсэ адямиосты быдто. Толон отын ялэмын вал траур. 28 адями быриз ни, 500 палаез шуккиськизы-сӧсырмизы. Пӧлазы вань нылпиос но. Марлы сыӵе курбон — Европа азьын чеберъяськон понна? Туж оскем потэ, асьме кивалтӥсьёслэн визьзы тырмоз, асьме пиосты отчы ыстытэк. Кӧня кулэ на юрттыны асьме пала сяламзы понна.

Лыдъясько, шаермес, Атыкай музъеммес утён армия бордысь гинэ уг поты, со понна сюлмаськыны ас интыяз кулэ котькудӥз! Туж ӝож асьме хоккей понна. Спортлэн аслаз законъёсыз. Сое валаса, нокин ӧз тыпырты, Тютинлэсь голзэ берыктыны курыса, но малы нокин интыяз ӧз пукты юромо ӧчкарись американ вратарез? Кышкам керетонлэсь. Со понна Обама лӧптылыса пуке.

Политика пурты пӧземен, палэнэгес кылиз Анай кыллэн нуналыз. Тая но юанъёс-валамтэос туж трос. Берло толэзьёсы асьмеос, удмуртъёс, туж ӟеч валам: кылмы, асьмелы сяна, нокинлы кулэ ӧвӧл. Соин ик — утёме сое. Угось со бордысен кутске Атыкай музъемез гажан.

Зинаида Рябинина

Удмурт Дунне
By Удмурт Дунне Февраль 21, 2014 14:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<