Азвесь воргоронъёс

Арнянуналэ Россиысь куасэн бызьылонъя воргоронъёслэн командазы Сочиын ортчись Олимпиадаын азвесь медаль утӥзы.

Воргоронъёслэн эстафетаязы кык спортсмен Удмуртиысь вал. Нырысетӥ этап бызьыны оскемын вал Можгаысь Дмитрий Япаровлы. 10 иськем сюреслэсь бадӟым люкетсэ азьветлӥсьёс пӧлын мынӥз, берпуметӥ круг гинэ ӟигарзэ быдтӥз. Финише тямысэтӥ вуиз. Кыкетӥ этапын бызись Александр Бессмертных Россилэсь командазэ витетӥ интые поттӥз, нырысетӥ интылэсь 41,3 секундлы кылизы. Кужмо нюръяськоно луиз Александр Легковлы, командаез со кыкетӥ интые ӝутӥз. Нош Шарканысь Максим Вылегжанин та вормонэз утьыны быгатӥз. Удмуртиысь спортсменъёсты но Россиысь воргоронъёслэсь тренерзэс, Шарканысь Олег Перевозчиковез бадӟым вормонэн ӟечкылаз Александр Волков. Азьланезлы эшшо но сэзьгес кариськыны куриз, батыръёслэн кадь кужым сӥзиз. Пусйыны кулэ, Россиысь команда тол Олимпиадаосын 1994-тӥ арысен медаль ӧз басьтылы.

Валентина Кутузова
Туспуктэм: ria.ru