Кыкетӥ дор

Удмурт Дунне
By Удмурт Дунне 23 декабря, 2013 12:38

Кыкетӥ дор

petrov-mihail-petrovichМихаил Петровлы сӥзем лыдӟонъёс кыкетӥ нуналаз азьланьтӥськизы Кизнер ёросысь Короленко черкогуртын.
Конференцие лыктэм писательёсты, тодосчиосты, дышетӥсьёсты нырысь ик нуизы татысь музее. Кык этажъем корка азьын из вылын гожтэмын: та юртэ 1895-тӥ арын 5-тӥ ноябре дугдылӥз дано ӟуч писатель Владимир Короленко. Музеен кивалтӥсь Татьяна Анисимова верамъя, та коркалэн кузёез Василий Кузнецов но герӟаськемын Мултан ужен — 19-тӥ дауре удмуртъёсты адямиез вӧсязы шуыса янгыше уськытонэн.

— Купеч Василий Кузьмич но янгыше уськытэм удмуртъёс пӧлын вал. Кыкетӥ суд бере ӟуч писатель В. Короленко вуэ Вуж Мултанэ ваньзэ ас синмынызы адӟон, калыкен кенешон вылысь. Соос пыро ӵапак та корка. Юрт кузёлэн нылыз Матрёна Кузнецова (солы соку 12 арес вал) тазьы тодаз вайылӥз кыдёкысь куноосты. Владимир Галактионович удмуртъёслэсь бызьылэмзэс, куно карыны сюлмаськемзэс адӟыса, шуэм: номыр кулэ ӧвӧл, но мон туж яратӥсько зыретэн табань. Короленко тодыса вераськиз, малы ке шуоно 1879-тӥ-1880-тӥ аръёсы со ссылкае келямын вал Глазове. Короленколэн сюлмаськеменыз ик, 3-тӥ судын удмуртъёсты утьыны соглаш кариськиз, чик дунтэк, Санкт-Петербургысь со вакытэ дуно но дано адвокат Н. Карабчевский. Озьы 1896-тӥ арын мултанъёс шонере поттэмын вал. Соку мултан воргоронъёс гинэ ӧвӧл, быдэс удмурт калык утемын вал юнме янгыше уськытонлэсь, ултӥямлэсь. 1939-тӥ арын гурт калык ӟуч писательлы вуж мултанъёсты утемез понна черкогуртлэсь нимзэ воштыны куриз. Озьы милям гуртмы Короленко луиз, — шуэ Татьяна Филипповна.

Ижысь куноос Короленко черкогуртэ буш киын ӧз ветлэ. Протодиакон Михаил Атаманов татысь черклы удмурт кылын Библияез кузьмаз. Василий Ванюшев туэ Полтаваысь В. Короленколэн музеяз вуылӥз, отысь трос туспуктэмъёс вайиз, соосты музее сётӥз. М. Петровлэн нылыз Ольга Билоус атаезлэн архивысьтыз «Избранные письма В. Г. Короленко» книгаез но Мултан ужъя 1896-тӥ арын ортчем судысь стенограммаез (диске гожтэмын) кузьмаз. Ольга Михайловна гуртоослы шуиз:

— Анае но апае верамъя, атае, пе, шуиз: Вуж Мултан мынам кыкетӥ доре кадь потэ ини. Озьыен, тӥ но мыным ӵыжы-выжыос луиськоды.

Галина Семёнова
Туспуктэм: udmstih.ru

Удмурт Дунне
By Удмурт Дунне 23 декабря, 2013 12:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<