«Куртчылӥське» кияр

Удмуртстатысь специалистъёс арнялы быдэ чаклало вузъёслы но услугаослы дунъёсты. Иж, Вотка но Можга городъёс котьку син азязы.

Дунъёс ог интыязы воксё уг сыло: кӧня ке копейкаысен кӧня ке манетозь я усё, я будо. Берло кык арня ӵоже гинэ 1 килограмм картошка шорлыдын 43 копейкалы дунояз, талэсь бере уг кыльы сугон но. Кампет-шоколадлы дун 1 манет но 16 копейкалы йылэмын. Нош кузятэм ог 5 манетлы дуногес луэмын. Али 1 килограммез 198 манет сылэ, 1 литр йӧл — 52 манет.

— Берло дыре гуртоосты туж сюлэмшугъяськытэ ни вал курегпузлы дун — ялан выллань тубиз. Но берло дыре со 39 манетлы ке но усиз ни. 10-эз курегпуз 58 манет котыр сылэ. Но Выль ар матэктон азьын выльысь дуноялоз на, дыр, — шуэ Удмуртстатылэн кивалтӥсезлэн воштӥсез Татьяна Фалалеева. — Праздникъёс дыръя котьку сямен «куртчылӥськыны» кутскозы ай помидор-кияр кадьёс но. Соослы дун, октябрь толэзен ӵошатыса, туннэ сотэк но 18 процентлы будэмын ни.

Со понна полукочёной колбаса 1 манет но 33 копейкалы дунтэмамын. Зэм, парсь но скал сӥль дунъёс 20-30 копейкалы ке но ӝутӥськемын.

Елена Федорова
Туспуктэм: vk.com