Ёжысь — Иже

Удмурт Дунне
By Удмурт Дунне 1 ноября, 2013 11:39
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ёжысь — Иже

Глазовысь нылпиосЮКАМЕНСК

«Удмурт нылкышно кенеш» шаерысьтымы нылпи садэ ветлӥсь пиналъёс пӧлын 7-тӥ арзэ ини радъя «Пичи Чеберай но Батыр» фестиваль.

Кылем арняе фестивале люкаськылӥзы Юкаменск ёросын улӥсь нылпиос. Ужрадэ пыриськизы Юкаменскысь, Пышкетысь но Ёжгуртысь 3 нылпи садъёс: «Берёзка», «Ладушки» но «Солнышко».

Тэшкылиос чупрес сямзэс, кырӟаны-вераны усточи луэмзэс, анай кылзэс яратэмзэс возьматӥзы, сузэр-вынъёсынызы но анай-атайёсынызы тодматӥзы. Нылпиос чебер удмурт дӥсен дӥсяськемын — анайёссы вуриллям. Нош кыӵе но вашкала удмурт сиёнъёс пӧрамын ӧй вал! Кин ке но анаеныз ӵош эмезен шаньги пыжем, пельнянь кутэм, кыстыбей пӧрам… Егит атай Константин Пономарёв ужрадэ мылысь-кыдысь пыриськиз. Уж дурысьтыз юромо куриськем. Таӵезэ ӵем уд адӟы, шуо нылпи садын ужасьёс.

Усточиослэн быгатонлыксылы дунъет сётӥзы Юкаменск роноысь методист Г. Булдакова, Глазовысь Эшъяськон юртысь удмуртъёсын ужанъя методист А. Бердова, Юкаменскысь «Удмурт Кенешен» кивалтӥсь Л. Трефилова.

«Чеберай» но «Батыр» ним понна вожвылъяськыны Иже мыныны шуд усиз Юкаменск черкогуртысь Антон Сунцовлы но Ёжгуртысь Елизавета Васильевалы.

ГЛАЗОВ

Уйпал устокайёс

Глазкарысь но ёросысь «Пичи Чеберай но Батыр» фестивале 20 нылпи пыриськиз.

Глазкарысь Эшъяськон юртысь залэ пуксьыны инты ик ваньмызлы ӧз тырмы. Нылпиос сяна, ужрадэ мыло-кыдо лыктӥллям анай-атайёс, песянайёс, нылпи садысь воспитательёс.

— Валля аръёсы таӵе вожвылъяськонэ 4-5 нылпи сяна уг пыриськылы вал, — ужрадлэн азинскемез сярысь маде Эшъяськон юртысь методист А. Бердова. — Нылпиос вормонъёссы сярысь, ма, ужрадэ пыриськемзы пумысен но ог-огзылы верало, шӧдске, анай-атайёс но, воспитательёс но чупресэсь луизы, нылпиоссэс юн ӟеч дасяло, учкемъя учкем потэ.

Жюри кудзэ бырйыны ик ӧз вала ни, угось таяз радэ фестивале туж трос усточи нылпиос пыриськизы. Вожвылъяськон йылпумъяськем бере сцена вылэ яркыт кизилиос, вормисьёс, потӥзы — Куреггуртысь Антон Иванов но Штанигуртысь Вероника Иванова.

Любовь Тихонова

Удмурт Дунне
By Удмурт Дунне 1 ноября, 2013 11:39