Трокаез возьматон — бадӟым дан!

Удмурт Дунне
By Удмурт Дунне Ноябрь 1, 2013 14:02

Трокаез возьматон — бадӟым дан!

М. ОвчинниковКылем арын октябрь толэзе Ижын усьтэмын Трокай Борисовлы сӥзем синпелет. Со бордын ужазы Виктор Овчинников но Геннадий Кутлыбаев. Табере кыкназылы сётэмын Удмуртилэн Кун премиез.

Памятник бордын ужамзы сярысь, туннэ мылкыдзы-малпанъёссы сярысь вераны курим УдГУ-ысь Искусствоосъя но дизайнъя институтысь кафедраен кивалтӥсез, профессорез Виктор Овчинниковез.

— Туж умой, тыршеммы Кун премиен йылпумъяськиз шуыса. Ужмы огшоры ӧй вал: секыт но, со дыре ик туж тунсыко. Вис карылыса кык ар кошкиз солы. Геннадий Кутлыбаевен одӥг кыткетын вал, котькудмы ас ужмес быдэстӥм. Милемыз люкыны уг яра.

Но нырысь ик верано соос сярысь, кинъёс кема дыр ӵоже пушказы нуллӥзы удмурт калыклэн таӵе дано пиезлы синпелет пуктон сярысь малпанэз. Со «Удмурт Кенеш», со история наукаосъя доктор Кузьма Куликов, со трос мукетъёсыз, кудъёсыз сюлмынызы висё удмурт калыклэн ортчеменыз, туалаеныз но вуоноеныз. Соос туж чидаса, номыр шоры учкытэк, малпанзэс улонэ пыӵатыны быгатӥзы.

Нош милемлы кылдӥз соослэсь малпанзэс йылаз-пумаз вуттыны! Ачиз улон валтӥз кадь таӵе синпелет борды басьтӥськыны. Кутскон сётэмын вал ай 2006-тӥ арын. Соку Трокай Борисовлы синпелет пуктӥмы Алнашын. Тае лыдэ басьтыса ик, вылды, эшшо одӥг памятник лэсьтон вылысь дорамы вазиськизы Культурая, печатья но иворъёсъя министерство, «Удмурт Кенеш» огазеяськон.

— Тӥ бадӟым шудэн лыдъяськоды, таӵе синпелет борды басьтӥськиды шуыса…

— Трокай асьмелэн одӥг гинэ! Малпасько, Т. Борисовлэн кадь адӟонэн адямиосты возьматон художник понна — зэмзэ но, бадӟым дан, удалтон. Историын котькыӵе вакытъёс луо, но номыр шоры учкытэк, таӵе муртъёс Адямиен кылё.

Борисов — со республикамес кылдытӥсь. Валамон, Трофим Кузьмич огназ ӧй вал со аръёсы, соос сярысь но вунэтоно ӧвӧл. Но ваньмы валаськом, удмурт калыклы туж удалтӥз, секыт, позырес аръёсы солэн ӵапак таӵе азьветлӥсез вал шуыса.

Синпелет бордын ужаны соин но тунсыко вал: ортчемез шоры учконъёс али туж пӧртэмесь. Историяя учебникъёс гинэ ог 60 пумо. Соин трос материалъёсын бугыръяськоно, пӧртэм адямиосын кенешоно луиз.

— Туннэ, луонлык кылдысал ке, мазэ ке воштысалды на-а синпелетысь? Оло, интызэ…

— Таӵе ужмы понна мыным возьыт ӧвӧл. Сое урод лэсьтыны правомы но ӧй вал. Интыез но, малпасько, туж ярамон. Дэмласьёс вал сое городлэн шораз, ӝужыт интые пуктыны. Но Т. Борисовлэн шайгуэз но ӧвӧл, озьыен, та памятник — солэн лулпуш буйган интыез но. Иське, отын шыпыт дыръёс луыны кулэ…
Куд-огез вераны турттӥз, синпелетысь Трокайлэн тусыз зэмос улонысь Т. Борисовлы уг тупа шуыса. Туж кельше со! Бен, татын со мӧйы тусъем каремын ни, угось возьматӥськом республикамылэн кунлык басьтонэз понна нюръяськись адямиез. Нош тросэз сое син азяз пуктыны быгато егит туспуктэмъёсызъя гинэ — мукетъёсыз ӧвӧл угось.

Кун премилы лауреатъёсты бырйыку, комиссиын пукисьёс ӧтчазы доразы. Соку верай: гранитлэсь Трокай кияз возе кагазъёсты-документъёсты. Умойгес учконо ке — пӧрме кирос, Т. Борисовлэн адӟонэз. Сое аслыз нуоно вал удмурт калыклэн азинсконэз понна. Та памятник аслыз Трокайлы гинэ ӧвӧл, солэн быдэстэм ужезлы но.

— Виктор Михайлович, тросэз художникъёс уг ярато социальной заказ шуонъёс борды басьтӥськыны…

— Та ужме сыӵе куронъёс пӧлы ӧй но пыртысал. Со сюлэмылэн куронэз. Нош историе мур пытьы кельтэм муртъёсты возьматон мон понна нырысьсэ ӧвӧл. Калык понна тазалыксэс, куддыр улонзэс но жалятэк тыршемъёсты возьматон котьку тунсыко потылӥз. Репрессия улэ шедем удмурт писательёслы, кылбурчиослы, кылсярысь, Кузебай Гердлы, Кедра Митрейлы, Михаил Коноваловлы сӥзем ужъёсы но вань. Бен, соосты пӧрмытыны капчи ӧвӧл, трос кужымез-ӟигарез кыско…

Оскисько, Трокай Борисовлэн сюресэз, солы синпелет пуктыса, уз йылпумъяськы. Азьланьын та темаез одно азинтоно. Оло, кин ке диссертация гожтыны мылкыд кароз? Пуктоно, малпасько, фильмъёс, спектакльёс… Уж туж трос, лэсьтэмын нырысетӥ вамышъёс гинэ. Соин ик памятникысь Трокай но быдэсак мозмытскемын ӧвӧл на, солэн ӝыны мугорыз гинэ потэмын гранит пушкысь.

— Городын кылдо кечъёслы, крокодилъёслы, йыр сынъёслы но трос мукет чыры-пырыослы синпелетъёс. Та шоры кызьы учкиськоды?

— Табере, пе, Удмурт кун университет пала пуктэмын луоз кызяса сылӥсь пунылы синпелет. Шуо: мукет странаосын но вань ук таӵеез. Туж умой валасько: кытын ке но эркын вузало шузимытӥсь суретъёсты, кытын ке но урамъёстӥ ас понназы калтырто скалъёс, кытын ке площадьын, вань калык азьын, така вандо, со — отын улӥсьёслэн сям-йылолъёссы. Отын со интыяз, дыр. Но малы сое асьме доры ваёнэз? Иське, асэстэ вал пыдын ветлон сюресъёсты чылк-чылк миськыса, сюрес урдсысь жагтурынэз ӵышкыса возён сямъёсты. Таиз трослы умойгес луысал, дыр. Ачим Иже 1972-тӥ арын вуи Пенза палась. Та дыр куспын вань сюлмыным-лулыным бурми Удмурт шаер борды. Туж потэ, со йӧно, адӟем карымон мед луоз шуыса.

— Оло, художникъёсмы трос кужымез-быгатонэз кулэ карись ужъёс борды басьтӥськыны кышкало, капчи сюрес утчало?

— Ӟеч, дӥсьтӥсь художникъёс республикаямы ӧжыт ӧвӧл. Али дышетскись студентъёс пӧлын но визьмо, быгатӥсь муртъёс трос — соос кыдалозы. Малпасько, кыӵе синпелетъёс кылдозы республикаямы — та потэ политика бордысь но. Кун ласянь куронъёс-заказъёс луыны кулэ. Мед луозы.

Элина Кумачёва
Туспуктӥз Владимир Беломорских

Удмурт Дунне
By Удмурт Дунне Ноябрь 1, 2013 14:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<