«Гурт адями» ӵектэм мурт Юрий Никонов

Удмурт Дунне
By Удмурт Дунне 22 ноября, 2013 11:58

«Гурт адями» ӵектэм мурт Юрий Никонов

Азинске «Гурт адями-2013» конкурсмы!

55Алнаш ёросысь Тылоын туж трос сюлмо адямиос. Но туннэ шуныт кылъёс вераме потэ Юрий Александрович Никонов сярысь.

Гуртмылы туэ тырмиз 303 ар. Вашкалаосмы ӝуам нюлэс бервылэз тазатӥллям но бусы, бакча гыриллям-кизиллям, сад мерттӥлям. Туннэ но татын уло ужез яратӥсь, кырӟаны но эктыны быгатӥсь адямиос. Соос пӧлын Юрий Никонов но. Гуртамы сое Юра гинэ шуо.

Вордӥськиз Юрий Александрович 1961-тӥ арын. Туж капчиен дышетскиз шофёрлы. Колхозамы водительын но, механизаторын но ужаз. Котьма борды мед кутскоз, ваньмыз киосаз эктэ-шудэ.

Выльдӥськон вакыт кутскем бере Юра трос малпаськыса ӧз улы, мыло-кыдо басьтӥськиз выль улон лэсьтон борды. Елена Петровна кузпалыныз кенешизы но ужбергатон борды гижысь-пиньысь кутскизы.

Кыӵе но могӟетъёс пыр потоно ӧз луы кагазъёс бичанын гинэ но! Мылкыдзэс сурасьёс но сюрылӥзы. Но кузпалъёс ӧз чигналэ. Туннэ но удыссэс ас кужыменызы синмаськымон нуо. Гурт калык шумпотэ ужаны пӧрмытэмзылы. Соос 8 кужмо егит воргоронъёсмылы ужан инты сётӥзы. Уждун но тыро.

Туннэ Никонов пилорамаен кивалтэ, ужасьёсыз нюлэс корало, пу пилё, корка но мунчо ӝутыны брус лэсьто. Асьсэлэсь тракторзэс но уг жаляло: кулэяськисьёслы горбыль пузэс люкыло. Ужзы секыт. Нюлэс погыръян-дасян ноку но капчи ӧй вал.

Юра но Лена секыт уж бордын гинэ уг выро. Кузпалъёс мыло-кыдо пырисько концертъёсы но. Юралэн куараез чебер, баянэн шудыны йӧндыре. Леналы нош воксё но 40 арес уд шуы — егит нылъёслэсь устогес эктэ. Соос шоры учкиськод но, мылкыд ик бурдъяське.

Тау шуэм потэ на Юрий Никоновлы ӵыпет вамен выжмы понна. Гурт пумамы 1992-тӥ арын азьвыл колхоз предмы Пётр Петров шурмес ӵыпиз вал ай. Солэн бур палаз бызе Бадӟым ошмес. Но дораз потан вылысь лэсьтэм выж пумен вужмиз. Ошмес ву дорын кунояськыны луонлык быриз. Та шугадӟонысь но Никонов Юрамытэк потыны ӧм пӧрмытэ. Со Азамат гурт поселенимылэн депутатэз но ай. Нош ик дораз вазиськимы. Поселенимылэн йырыныз Пётр Лебедевен кенешем. Вакчи дыр куспын шедьтэмын вал корт трубаос, пу ваемын, ужась вуттэмын. 24 метръем выж герӟаз меӵ яръёсты. Калык талы кыӵе шумпотэ!

Ма, Юра туж трос лэсьтэ калык понна! Со — калыклэн быръем зэмос депутатэз! Данъян грамотаосыз но солэн уно.

Вань гуртоослэн нимынызы верасько: Юрий Никонов зэмос «Гурт адями»!

Родион Лесников.

 

 

Дэмлалэ асьтэлэсь гуртоостэс, данъялэ соосты милям газетмы пыр!
Лэсьтэ ас гурттылы кузьым — вормисез данъяны «удмурт дуннеос» гуртады лыктозы артистъёсын ӵош! Газетын сяна, «Гурт адямиез» возьматозы «Мынам Удмуртие» телеканалын!
Гожтэ электрон почтаямы, сайтамы яке огшоры гожтэтэн.
Жингыртэ (3412)73-33-43, 8-951-195-37-66 телефонъёсъя.

Удмурт Дунне
By Удмурт Дунне 22 ноября, 2013 11:58