25-тӥ ноябре — Анайлэн нуналыз

Удмурт Дунне
By Удмурт Дунне 22 ноября, 2013 11:28
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

25-тӥ ноябре — Анайлэн нуналыз

22Кыӵе улӥськод, нэнӥе?

Фёдор Суворов
Я кыӵе улӥськод ни,
мусо нэнӥе?
Далайгес ни тонэн
ӝӧк сьӧрын пӧраммы.
Бертыло, шуисько,
вуоно арняе,
Малпамъя нош ваньмыз
уг, уг луы вылэм.

Ӧй, ӧй вунэт тонэ,
вордэм нэнӥе.
Атае куаретэ, дыр,
куддыр йыркурен.
Мӧзмылэ, дыр, огназ
бакчаын шупуэ,
Бертэмме возьмаса,
ӵыж кисьмам емышен.

Нош улон кыстӥське
весь азьлань но азьлань,
Будыло ни аслам
нылъёсы-пиосы.
Песянай-песятай
соослы но дуно,
Мӧзмыса дор пала
туж потэ бертэмзы.

Бурдъясько нылпиос,
кошкыло кыдёке,
Вордӥськем кӧкымы нош
дуно ваньмызлэсь.
Пичи дыр дуннее
бертэммы нош потэ,
Уд, уд ӵыды ноку
яратон палъёслэсь.

Тодӥськом ми ваньзэ,
яратон нэнӥе,
Чидамдэ, утемдэ,
синкыли кисьтэмдэ.
Ултозяд тырондэ —
берыктод-а сое,
Анайлы-атайлы
вань ӟечсэ, пунэмзэ.

Келяськон

Людмила Васильева
«Я, ӟеч», — шуылӥз анае
Дорысь кошкыкум
палэнэ.
Ӝожмыт кылӥськиз
куараез
Келяз со монэ улонэ.
Кыӵе луылӥз сюлэмыд,
Нылдэ но пидэ келякуд.
Адӟи, нюромо синъёсыд,
Бӧрсям капкаез ворсакуд.
Аръёс пытьызэс ни
кельто,
Эн сётскы ай тон
висёнлы.
Тон вить,
мон одно ик берто.
Анай туж кулэ
милемлы.
«Ӟечбур!» — мон шуо
анайлы.
Мон нош ик кошко
огдырлы…

Ӵошен пуком

Светлана Итешина
Анае, тон дуно, анае,
Макем юн яратско
мон тонэ.
Дуноесь сюрмем киосыд,
Пальпотӥсь
мусоесь синъёсыд.

Мон ачим кемалась ни
анай.
Тон понна нош
али но пинал.
Ӧтёмы мылкыдо
бускельмес,
Кырӟалом
яратон кырӟанмес.

Нылъёсы ни
аслам будӥзы,
Вордӥськем юртъерысь
лобӟизы.
Тон нош котьку
утись но юрттӥсь,
Анаймы, тон милем
визь сётӥсь.

Тон эн сюлмаськы, анай,
ми понна.
Ул но ул ай кема
ми понна.

Анаелы

Лидия Софронова
Туж секыт вакытэ
тон вордскид,
Пот нянен, ньылоен
тон будӥд.
Кык корка одӥгнад
тон лэсьтӥд,
Кык нылдэ калыке
тон поттӥд.

Вал тонэ адӟисез-юасез,
Вал тонэ кышнолы
курасез.
Палэнтӥд аслэсьтыд
шудбурдэ —
Шат тынад
адӟонэд-а сыӵе?

Яратӥз тонэ
вань бӧлякед,
Ӧз кушты тонэ
гурт калыкед.
Ужаса жадемын
вылтырыд.
Купырмизы
небытэсь киосыд.

Тон улэп дыръя ми, анае,
Ӧм тодэ ӟеч кылмес
вераны.
Табере, ортчемзэ
малпаса,
Вир вуэн пылаське
сюлэмы.

Нош гуртам бертыса,
табере
Уг, уг луы юртам
пыреме.
Ӵогамын тунгонэн
коркае.
Синкыли ни вотса
синъёсме.

Улонэз, дыр, уг лу
тодыны,
Весь улоз кожаськом
анаймы.
Табере со
инме ӝутскемын.
Эксэйлэн бурд улаз
ватэмын.

Тау шуэме потэ…

Надежда Романова
Анай… макем дуно,
сайкыт та кыл…
Анай шуса лушкем
вазиськисько…
Мон тодӥсько,
монэ со уз ни кыл,
Туссэ весь син азям
пуктылӥсько.

Анай… ачим ни
кемалась анай,
Йырсиосы ини
пужмертэмын.
Малы вӧзам дыръяз
янгыш малпай,
Кожай, котьку
луоз на милемын.

Вӧзаз улэм аръёс —
зарни дыръёс.
Тодам ке вайисько —
макем шуныт…
Кыӵе шудо ортчо вал
нуналъёс!
Шунды пазя вал
тылсиё мылкыд!

Вуриськыса,
берозь керттӥськыса,
Анай ортчытъялля вал
ӝытъёссэ…
Ӝуткам ӝӧккышетсэ
вӧлдылыса,
Шулдыр пумиталляз
кунооссэ.

Вӧзаз будӥм
вордэм нылпиосыз —
Озьы ик ужаны
тыршим, дышим.
Азьланезлы
бадӟым осконъёсыз —
Созэ улон сюресамы
басьтӥм.

Тау шуэме потэ анаелы
Та дуннеын
вань умоез понна.
Куке секыт,
уг мыно ужъёсы,
Инмын со вӧсяське, дыр,
мон понна…

Тон — дунне адями

Людмила Гирбасова
Котькинлы но
аслаз анаез, дыр, мусо,
Котькинлы но
аслаз анаез, дыр, дуно.
Котькинлэсь но потэ со
аслыд визьмогес,
Котькинлэсь но потэ со
аслыд йӧногес.

Бен маин дунъялод
анайлэсь тыршемзэ,
Бен маин ӵошатод
анайлэсь чеберзэ?
Сюрмылэм киосын
со йӧтске ке бордэ,
Син куспын сюлмаськон но
ортче кадь, вунэ.

Тон — дунне адями.
Тодӥськом ми сое.
Вордӥськем нуналыд но
тани матэктэ.
Тау тыныд, анаймы,
мед улод на кема,
Мед юрттоз Инмармы
тон понна, ми понна.

Удмурт Дунне
By Удмурт Дунне 22 ноября, 2013 11:28