«Мар бӧрсьы марен» пиналэз уд гочаты

Удмурт Дунне
By Удмурт Дунне Ноябрь 20, 2013 14:04
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Мар бӧрсьы марен» пиналэз  уд гочаты

SONY DSCРимма Игнатьева-Лаптева — туннэ нуналлы одӥгез «емышоез» удмурт литератор. Ӵапак солэн пероез улысь потэмын берпуметӥез удмурт кылын роман («Игнаш сайкемын», 2004-тӥ-2008-тӥ аръёс, «Кенеш» журнал). Туэ гожъяськись басьтӥз Удмурт Элькунысь Кивалтэтлэсь литературая премизэ.

Таӵе премия нырысьсэ сётӥськиз. 4 номинация пӧлысь Римма Серафимовна бырйиз нылпи литератураез: конкурсэ келяз «Удмуртия» книгапоттонниын 2010-тӥ арын потэм «Оксилэн сюлмаськонъёсыз» бичетсэ. Веросъёсын повесть маде Окси нимо пичи нылаш сярысь, усьтэ пиналлэсь психологизэ.

— Вормо шуыса чик но ӧй малпа, — вера автор, — кужымме эскерыны келяй. Компьютерен, электрон почтаен уг выриськы, печатлан машинкаен кокаса, рукописьме сётӥ. Нылпи литератураен вырисьёс ӧжыт бере, мукетъёссэ азьпалтыны пӧрмиз.

Лаптевъёс уг потало калык азе, премьераосы но творческой ӝытъёсы уг ветло. Озьы ке но гожъяськон мылкыд квартираязы лоба: ӝажыосын кыллё почта пыр вуись «Литературная газета» но «Молодая гвардия», лыдӟыны черодзэс витё выль потэм книгаос.

— Гожъяськон понна адями ас малпанъёсаз выйыны кулэ, — вера Римма Серафимовна. — Интернетъёсын йырин таизлы дыр ӧжыт кыле. Гожъяськон — со ведь ас пушкад бугыръяськон.

— Кызьы малпаськоды, малы туннэ нуналлы нылпиослы гожъясьёс ӧжыт?

— Мугъёсыз трос. Азьло «Дась лу!» газет писательёслы нимысьтыз ӵектылӥз пӧртэм аресъем пиналъёс понна гожъяськыны. Оград писательёс печатласькемысь ик дугдӥзы, таиз герӟаськемын гонораръёс кулэсмемен но.
Мукетыз муг — огъя культураын кризис. Герӟаськемын экономикаен, нош шӧдӥське литератураын но. Мускоысь вуись журналъёсын бугыръяськиськом но, весь одӥг авторъёс потало — ӧй шуысал, произведениоссы туж золэсь. Оло, Интернетын ӝужало егит талантъёс, нош журналъёсы арлыдогес авторъёс гожъяло.

Со сяна, пиналъёслы гожъян понна писательлы валаны кулэ нылпиез, усьтыны пуш дуннезэ. Арлыд будэмъя пиналэз валаны шуггес. Али ведь пиналъёс воксё мукетэсь. Азьвылгес Ефим племянникме чакласько вал, али будӥз ини. Куное ветло ӵыжы-выжыосмы, пичи пиналъёсын вераськиськом — соос туж туалаесь ини.

Тодам лыктэ Герман Ходыревен эшъяськонмы: со монэ пиналъёслы гожъяськыны лӧпкытъяз. Берпуметӥез тужгес но кужмоез нылпиос понна гожъясь литератор вал, дыр, со 50-60 аресаз но, арлыдо визьмо мурт, ассэ пичи пинал кадь возиз. Нылпиослы гожъяськись ачиз пинал выллем луыны кулэ. Жаляса верано, мынам со быгатонлыке быре.
Берло вакытэ нылпиослы тросгес кылбур гожъяло. Кылбур гожтыны капчигес, шуэме уг поты. Нылпилы верос яке повесть гожтыку, одно ик тодын возёно: произведение быдӟалаезъя пичи луыны кулэ, нош пуштросэзъя — мур. Туж ӧжытэз веросъёс, нылпиослы чакласа, малпамын. Гожтэмъёслэн чеберъян амалъёссы но лябесь. Ивор-действие вань, но детальёс, чыры-пырыос уг тырмо. Фразеологизмъёсыз но идиомаосыз кутэм сяна, тыршоно чеберлыко суред кылдытыны. Ато ке пӧрме огшоры веран: мар бӧрсьы мар вал…

Журнал авторлэсь гожъяськон сямзэ ачизъя тупатъя, «колӟа» (собере литературоведъёс шуо: валаны ум быгатӥське писательлэсь аспӧртэмлыксэ).

Али авторъёсты будэтӥсьёс ӧвӧл. Азьло арлы быдэ семинаръёс ортчытъязы, комсомол со понна кыл кутӥз. Али Писательёслэн огазеяськонзы огназ кылемын — ӧжыт лэсьтэ кадь потэ: кужымез но, уксёез но ӧвӧл. Тодам вайисько, кызьы 1980-тӥ аръёслэн кутсконазы Иже литературая семинаре пыдам гипсэн вуи — сокем зол вал мылкыды! Гожъяськон потэ адямилэн бурдъяськемезлэсь. Адями азьтэм ук, сое ялан донгано.

— Нош тӥ басьтӥсь-кысалды-а егитъёсын ужан борды?

— Али ӧй басьтӥськысал ни. Туж бадӟым тазалык, бадӟым кужым кулэ. Пичиысен ик пиналлэсь мылкыдзэ ӝуткано. Лукерья Шихова но мукет егитъёслэсь гожъямзэс чакласькод ке, шӧдӥське: тылгизьы поттӥз школаысь кружок. «Кизили» но, «Ӟечбур!» но, «Шундыкар» но.

Дарали Лели
Туспуктӥз Владимир Беломорских

Удмурт Дунне
By Удмурт Дунне Ноябрь 20, 2013 14:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<