Вань-а фантастика удмурт литератураын?

Удмурт Дунне
By Удмурт Дунне Ноябрь 20, 2013 13:41

Вань-а фантастика  удмурт литератураын?

7«Фантастика» кыллэн паськыт пуштросэз — со художественной произведение но сое гожтон дыръя кутӥськись амал, кытын пумисько авторен малпам, зэмос дуннеын пумиськисьтэм явлениос, йӧспӧртэм арбериос.
Соин фантастической шуыны луоз выжыкылэз но, мифез но, фэнтезиез но…
М. Булгаковлэн «Мастер и Маргаритаез» — фантастика, Н. Гогольлэн «Носэз» — бен,
Ф. Кафкалэн «Превращениез» но «Курочка Ряба» ӟуч калык выжыкыл — нош фантастика.
Фантастикаез та ласянь учкид ке — удмурт литератураын со тырмыт, тужгес яркытъёсыз — Л. Нянькиналэн «Ау-ау, яке Инбамысь гожъёс», В. Ар-Сергилэн «Уй вадьсын — бубылиос», ма, Кузебай Гердлэн «Матӥез» но… Но эшшо трос мукет произведениос.

Фантастикалэн трос вайёсыз: научной фантастика, фэнтези, киберпанк, утопия но антиутопия. Огъя классификация та дырлы ӧвӧл на. Но фантастикалэн зэмос ымнырыз — со научной фантастика.
Татын возьматӥсько наукалэн пӧртэм удысъёсысьтыз азинсконъёс, вуоно улон, космосэн герӟаськем усьтонъёс, адямилэн обществоын интыез, воштӥськонэз.

Туала вакытэ книга лавкаосын ӝажыос тырмемын научной фантастика жанрын гожтэм книгаосын. Троссэ соос пӧлысь кие но басьтэм уг поты: отын, штампъёс но клишеос сяна, номыр ӧвӧл. Жуг-жаг, кудӥныз йырин научной фантастикаез тросэз лыдъяло пиналъёслы (тужгес но — пиослы) капчи лыдӟетэн. Нош мынам соку ик тодам лыкто Г. Уэллс,

С. Лем, Стругацкий агай-вынъёс, Р. Брэдбери, А. Азимов — ваньзы, кин дуриз зэмос научной фантастикаез, кудъёсыз малпам дунне пыр возьматӥзы зэмос улонлэсь ужпумъёссэ, урод палъёссэ, шекъёссэ. Пуктӥзы пумтэм-йылтэм юанъёс: шонер-а асьмеос улӥськом? Кытчы асьмеос вуом? Вань-а шонер сюрес?..
Научной фантастикалэн яркыт дуннеяз зымемды потэ ке, дэмласал лыдӟыны та книгаосты:

• Рэй Брэдбери «451 градус по Фаренгейту». Роман-антиутопия. Возьматэмын вуоно дунне, кытын адямиос шутэтскысалзы гинэ, книгаос сутӥсько, нош ас сяменыд малпаськыны быгатон йыружен лыдъяське. Та дунне доры асьмеос ум вамыштӥське меда?

• Олдос Хаксли «О дивный новый мир», Джордж Оруэлл «1984», Евгений Замятин «Мы». Антиутопиосты вань яратӥсьёслы одно лыдӟоно. Сыӵе пӧртэмесь но ог-огзылы кельшисесь книгаос. Нош кудӥз автор вуонозэ (вуонозэ меда?) зэмлыкогес, соин ик кышкытгес суреда — асьтэос быръёды.

• Адамс Дуглас «Автостопом по Галактике». Кин вераз, научной фантастикаын серекъянлы инты ӧвӧл шуыса? Таиз автор возьматэ бадӟым улонэз чыры-пырыос пыр — одно ик серекъяса.

• Стругацкий агай-вынъёс. Совето вакытысь тужгес яркыт гожъясьёс, кудъёсыз кылдытӥзы узыр, оскымон дунне: Мир полудня. Собыдӟа дуннеез суредакузы но, валтӥсь интые котьку пуктӥзы Адямиез но солэсь быръёнзэ. «Пикник на обочине», «Град обречённый», «Понедельник начинается в субботу», «Трудно быть богом» — тужгес пусйымон, тодмо романъёссы.

Мынам тау шуэме потэ Григорий Медведевлы «Выль дунне» веросэз понна. Бен, быдэс дуннеысь научной фантастикаез басьтоно ке, со — одӥг пичи шапык гинэ. Но малпаськоно ке, кӧня та пичи веросын фантастической инъетэз — дыр пыр ветлон, выль утопичной дунне, техникалэсь но обществолэсь азинскемзэ возьматон! Одӥг та верос понна но шуэм потэ (туж утопично ке но кылӥськоз, мед): вань, вань милям но удмурт научной фантастикамы!

Анастасия Шумилова
Туспуктэм: «Автостопом по Галактике» романысь

Удмурт Дунне
By Удмурт Дунне Ноябрь 20, 2013 13:41
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<